Не приемлющих же наказания, и не хотящих исправитися, от церкви отлучати.

Господь наш Исус Христос во святом евангелии рече [Матф. зач. 75]. Аще согрешит к тебе брат твой, иди и обличи его между собою и тем единем. Аще тебе послушает, приобрел еси брата твоего. Аще ли тебе не послушает, поими с собою паки единаго или два, да при устех двою или триех свидетелей станет всяк глагол. Аще ли не послушает их, повеждь церкви. Аще ли церковь преслушает, буди ти яко язычник и мытарь.

Подобно сему и святый апостол Павел пишет [к римл. зач. 116]. Должни есмы мы сильнии, немощи немощных носити, и не себе угождати. кождо же вас ближнему да угождает в благое к созданию. И паки [солуняном зач. 272 и 273]. Сего ради утешайте друг друга, и созидайте кождо ближняго; яко же и творити. [ниже][ зач. 277] Повелеваем же вам братие, о имени Господа нашего Исуса Христа, отлучатися вам от всякаго брата безчинно ходяща, а не по преданию еже прияша от нас; [ниже] Аще ли же кто не послушает словесе нашего, посланием его сказуйте, и не примешайтеся с ним да посрамится. И паки инде [Тимоф. 1 зач. 286]. Согрешающих же пред всеми обличайте да и прочии страх имут. И божественный Златоуст, о том же сице завещавая глаголет [беседы апост. ефесян. зач. 229]. И не приобщайтеся, рече, делом тмы неподобным, паче же и обличайте. яко бо тай бываемая от них, срамно есть и глаголати. Вся же обличаемая от света являются. Услышите молю, вси елицы не хощете туне ненавидими быти [лист 1759 обор. обличать брата благопритно есть]; похищает, и не обличаеши ли, но боишися ненависти: [ниже] обличи брата, приими вражду, любве ради юже в Христа, любве ради яже к нему; возбрани ему в ров отходящему. Еже бо трапезы приобщитися, и глагол благих и привета, и пресыщения, не зельныя любви есть. Таковыя другом нашим даруем дары, да души их извлечем от гнева Божия, в пещи злобы возлежащих их зряще, воставим. но не исправляется рече, но ты свое сотвори, и дал еси ответ Богу. не скрый таланта. Сего ради слово имаши, сего ради язык и уста, да исправляеши ближняго, безсловесныя токмо не печалуют о ближнем, ниже слово имут некое о безсловесных. Ты же Отца нарицая Бога, и брата искренняго, зря его бесчисленная творяща злая; благодать юже от онаго пользы ради предлагаеши ли. Ни молю, ни единоже есть сице дружества знамение, яко еже не презирати согрешающих братий. Видел ли еси лихоимствующия, возбрани; видел ли еси обидимыя, заступи; не онем но себе первому угодил еси. И паки [лист 2503]. Согрешающих пред всеми обличай, да и прочии страх имут. сиречь, не скоро отсецай; но со многим опасением вся много испытуй. Егда убо увеси яве, зело казни, да инии уцеломудрятся. яко же просто осуждати вредно есть, сице еже не казнити явленныя грехи, путь есть подаяти иным, еже таяжде творити и дерзати, обличай же, рече, являй яко не просто, но с отсечение. тако бо и прочии страх имети будут. И инде той же [Маргарит лист 158]. Да не речеши к себе, мирский человек есмь, жену имам и дети, и сия иерейска суть, сия иноческая; не бо самарянин он сицевая рече; где ныне фарисее, где июдейстии учителие; но яко же некий лов великий обрет, тако восхити прибыток. И ты убо егда видиши кого требующа врачевания, или телесное, или душевное, не глаголи к себе, чесо ради он сица, и он сица того не уврачева; но премени его от болезни, и не истязуй оных вины небрежения. На небрегущих же о том и молчащих, сице божественное писание грозно воспрещая глаголет [Никон Черныя горы слово 3]. Аще истину скрыем, ияже имать суть на слабость советуем. никоеже различие имать ложных пророк, иже прельщаху люди, и желаемая комуждо глаголаху. И инде [Потребник больш. лист 700. Номоканон прав. 165]. Аще кто сведе согрешающаго [глаголет] и могий возбранити греху, а не возбранит. или обличен быв от епископа, скры; толико время и той запрещен будет, елико же и грех сотворивый, по 71-му правилу Великаго Василия.

Пристижение. Се же разумно да будет, яко же людини, или духовнии, иже от сожительства и пребывания вкупе, сведят, или слышат прочих грехи и беззакония, вреды и тщету творящих; тогда любовию исправления, и спасения ради ближняго, должни суть предстателем и старейшим возвестити, да препнутся от греха и зла оного. да убо утаенныя грехи души не погубят, ниже падежа какова не наведут. но творяй грех исправлен же сый да спасется. И Василий Великий глаголет [О Постничестве, глава 39, лист 138 часть 2]. Всяко согрешение воспоминати подобает настоящему, или от самого согрешившаго, или от познавших. Лучьше же обличение со дерзновением крыемыя дружбы. ниже убо ин иному да скрывает, да не братоубийца вместо братолюбна будет. Из апологии святаго Иустина Философа [в толковом Апостоле зач. 195]. Яко достоит казнити лукаваго и не благочестно жительствующих християн. [ниже], сия бо казнь в церкви святей тако бдети имать, да не абие упрямство, и невоздержание приидет ко безумию. сего ради сия подобия даны суть, в совет благим старейшинам; и да возбраняют, его же возбранити должни суть. Паки святый Златоуст на послание к коринфом пишет [нравоучение 14 лист 1294]. Свяжи согрешившаго донележе милостива сотворит Бога, не оставляй его разрешена, да не паче связан будет Божиим гневом. Аще бо аз свяжу, Бог нектому связует. Аще ли же не свяжу. нерешимыя его ждут узы Аще бо быхом себе осуждали, не быхом осуждени были. Не убо суровства быти непщуй сицевое дело и безчеловечия [лист 1296], но крайния тихости и изряднаго врачевания, и многаго попечения. Но довольное даша время мучению рече, но колико, рцы ми лето едино, и другое, и третие; но не сие ищу, множество времени, но души исправление. Сие прочее[?] покажи, аще умилишися, аще преложишася, и все бысть; яко аще и сие будет, ни едина есть польза от времене. ниже бо многажды взыщем, аще связана бысть рана, но аще пользова что связание. аще убо пользова, и в кратце времени не ктому да прилагается; аще ли ничтоже пользова, и по десяти летех еще да прилагается. И аще сице и о нас самех. и о прочих прилежание имеем, и не к человечестей взираем славе и срамоте, но тамошнюю муку и поношение помышляем; и прежде всех еже Бога прогневание, зельная былия покаянию приложим; и на чисто приидем здравие скоро, и будущая получим благая.

Выше елицы подобает терпети запрещение отец [лист 1294]; сице с предводительми должно сболезновати о согрешающих. не в тех бо лежит вред[?] и в нас. Аще бо видит согрешивый, яко запрещение убо прият от отец, ласкаем же есть от братии, ленивейший бывает. Но егда отец запретит, прогневайся и ты, или аки о брате печаль или аки со отцем негодуяй; точию покажи многое тщание, и во плачи некако запрещен бысть, но яко согреши. аще ли же созижду убо аз, а ты разоряеши; что пользовахом вящьше, разве труди; паче же не даже долго тебе яже тщеты, но и муку приведи на ся возбраняяй бо. язву исцеляти, от сотворшаго ю неменьшую имать муку, но и большую а несть бо равно уязвити, и уязвенному возбранити исцелитися; сие бо убо и смерть весьма раждает. оное же не весьма. Сия мною речена быша к вам, да с начальники гневаетеся, на них же тии праведне негодуют. да егда видите коего в запрещении суща, вси обращайтеся больше нежели учитель: вас да боится согрешивый паче нежели начальников. Аще бо убо учителя боится токмо, скоро согрешит. аще ли же толиких очес вспрятается, толиких устен, в множайшем будет утвержении. Яко же бо аще не творим сих последнюю приимем казнь; такожде аще сия делаем, приобретения приобщимся еже о исправлении. Сице прочее да творим. и аще речет некто, яко человеколюбствовати брата, сие лепо християном; да весть, яко гневаяйся, человеколюбствует, не оныи прежде времене призываяй его, и ниже оставляяй ощущение прияти согрешения. Кто бо рцы ми огницею жегома и иступлением ума сдержимаго милует, иже возлагает на одре, и вяжет, и брашен и пития неподобающаго отводит; или иже дает нерастворенаго вина исполнитися, и на власти повелевает быти, и вся творити яже здравому подобает; не сей ли убо и взражает недугование, иже мнится человеколюбствовати, а оный исправляет; такожде и зде судим. Ибо человеколюбия есть, еже не всюду угождати недужным, ниже ласкати безместным их вожделением. Никтоже сице любяще у коринфян соблудившаго, яко же Павел; иже повеле предати его сатане: никтоже сице ненавидяше и, яко иже плещущии с ним и угождающии ему. и конец указа. Они убо того и на душа, и кручину большую соделаша; сей же и утоли, и не отступи, дондеже на чисто здравие приведе. Сия же и мы да навыкнем человеколюбия законы. и во коня егда видиши на низ брег несома узду влагаеши и встаеши с зельностию, и язвиши многажды; аще и сие мука есть; но мука сия спасения мати; тако и на согрешающих сотвори. Паки той же [к евреом нравоучение 30 лист 3082]. Друг друга, рече, тяготы носите, и тако исполните закон Христов. тако убо и обличающе, и терпяще друг друга, возможем исполнити здание Христово.

ГЛАВА, 8.