О еже нецыи сумневаются, яко бы за сие многия уклонятся во иноверие.

Но аще бы сие и было, и тогда смущатися не подобало бы. Ибо божественное писание сице нас о том утверждает.

Святый Иоанн Богослов во евангелии глаголет [зач. 24]. От сего мнози от ученик его идоша вспять, и ктому не хождаху с ним. рече же Исус обеманадесяте, еда и вы хощете итти. [ниже] [зач. 38] Моя овца гласа Моего слушают.

Зрите опасно како Господь наш Исус Христос, не по человекоугодию закон утверждаше, и учение свое простираше; но еже Ему бе угодно и владычески. Аще и видяше нецыих обращающихся вспять, не снизхождаше им, но признавая не от своего стада быти им, и небрежаше о том. Такожде и святии апостоли, и святии отцы, учили людей не по воли человечестей, но по воли и хотению Божию. Что подтвердят и ниже следующая краткая свидетельства.

Глаголет убо божественный апостол Павел [к римл. зач. 83]. Что бо аще невероваша нецыи; еда убо неверствие их, веру Божию упразднит, да не будет. И паки той же [Тимоф. зач. 293]. Верно слово, аще бо со Христом умрохом, то с ним оживем. Аще терпим, то с ним царствуем. Аще отвержемся. и Той отвержется нас. Аще не веруем, Он верен и пребывает, отврещибося не может. дозде апостол.

Видите ли, яко Господь не может отврещися, или раскаятися о словесех своих, за неверствие и отвержение наше, но пребывает верен и истинен, тако и судити имать нам. Яко же той же апостол Павел, словеса Давыдовы о Нем глаголет. Яко да оправдишися в словесех своих, и победиши внегда судиттися. И паки глаголет Господь [Матф. зач. 76]. Идеже бо еста два, или трие собрани во имя Мое, ту есмь посреде их. Сия словеса разсуждая святый Златоуст тако глаголет [беседы на деяния нравоуч. 26]. А идеже Христос, посреде много множество есть: идеже Христос, нужда и ангелом быти, и архангелом и инем силам. Тем же не сами есте, Владыку всех с собою имуще. И паки послушай пророка глаголюща [Сирах. 17]. Лучше есть един творяй волю Господню, нежели тмы беззаконных. Ничто же не мощнейше многих законопреступных. Ничтоже крепчайше единаго по законе Божии живущаго.

Он же паки гневаяся на некиих безчинников, сице глаголет [беседы апостол. лист 2112]. Се предлагаю: не к тому наказую, но повелеваю и завещаваю, хотяй да слышит. а не хотяй да не покаряется. Яко аще пребудете сия творящии, не стерплю, ниже прииму вас, ниже попущу сия праги преходити. Что бо ми требе есть множество недужных: [ниже][лист 2113] Во училище ли приходиши, научайся любомудрию духовному; отъими напыщение оное. сему и мужей наказую, и жены. и аще инако кто творит, прочее не терплю. Дванадесять быша ученицы, что глаголет к ним Христос. Еда и вы хощете итти. аще бо везде ласкаем, когда притяжем, когда пользовати будем; Но суть, рече, ереси иныя, и прелагаются. Студено есть сие слово. Лучше един творяй волю Господню, нежели тмы беззаконник. Зане и ты что хощеши, рцы ми; безчисленныя бегуны имети, и татей рабы; или единаго благоразумнаго. [ниже] хотяй да отскачет, хотяй да порицает, не терплю ни единаго. Егда имам судитися пред судищем Христовым, далече вы станете. от вас благодать нивочтоже, мне испытания подающу. Сия глаголы растлиша все; да отъидет, рече. и пременится в иную ересь: немощен есть: сходи. даже доколе; единою, дважды, и трижды, а не выну. Се заповедаю, и засвидетельствую по блаженнем Павле; яко аще прииду паки, не пощажду. Той же паки [беседы евангел. от Матф. нравоуч. 17]. Ибо лучше с двема и треми Божия хранящими законы, обычныя возсылати молитвы, нежели множество привлачити законопреступных, и иных растлевающих. Подобно сему и священномученик Киприян пишет [книга 1 послание 3]. Пастух тот не точию не полезен, но и безумен, который хворых овец во все стадо случает; чтобы и прочих овец тою же болезнию заразить. Не смотри ты на число их, лучше един есть бойяся Бога, паче тысящ сынов человеческих. И паки [книга 4]. Лучше Христос бывает со двема, или трема единомысленно молящимися, нежели множайшими несогласными. Паки Златоуст [беседы на деяния лист 234]. Лучше быти десятим искусным и доблестным мужем, нежели тмам неискусным. [ниже] [лист 235] Сущим бо могущим в церкви просияти, вскоре будет и множество. сим же не сущим, множество никогдаже будет искусно.

ГЛАВА, 11.

Аще ли нецыим возмнится в главизнах сих быти нечто прикруто,