ЖИТИЯ СВЯТОГО ПЕТРА МИТРОПОЛИТА И САМЫЙ ТЕКСТ ОДНОГО ИЗ НИХ, НАПИСАННЫЙ ЕПИСКОПОМ ПРОХОРОМ

Нам известны три жития святого Петра. Первое — рукописное, как значится в заглавии, «творение Прохора, епископа Ростовского», скончавшегося в 1327 г. (сборн. Новг. Соф. библ. XVI в. в четв., № 410. Л. 334 [15]). Второе — печатное (Степ. кн. 1. 410 [308]), сочинение митрополита Киприана, встречающееся с некоторыми вариантами и в рукописях (сборн. Новг. Соф. библ. № 527. Л. 136 [14]; сборн. моей библ. № 66. Л. 21 °). Третье — также печатное безымяннаго автора (Пролог, под 21 числ. декабря [365]), встречающееся и в рукописях (сборн. моей библ. № 51. Л. 177 [151]). Первое кратко, но весьма важно, как написанное современником. Второе излагает те же самые известия в гораздо распространенном виде с некоторыми, впрочем, дополнениями из других источников. Третье представляется только сокращением второго без всяких новых сведений. Представляем здесь первое житие, написанное Прохором Ростовским: «Преставленье Петра, митрополита всея Руси, а се ему чтение, творение Прохора, епископа Ростовьскаго. Отче, благослови!

Сей св. Петр митрополит родися от родителю-крестьяну, отца Федора, матери же благоверныя суща. Да егда ношаше мати его младенець во утробе, и виде сон тако: агнец доброзрачен на руку своею, имущи на рогу своею древо, различный цвет имуща, и не домыслящися о сем, что се боудет. Роди же ся отроча и бысть 7 лет, нача учити грамоту сию, вскоре навыче всей мудрости. Бывши же ему 12 лет, иде в монастырь и бысть мних; слоужаше в монастыре в поварне и воду нося на всю братью и дрова на свою раму. И пребысть в той службе неколико, и по сем въжелев, да навыкнет иконному письмени, и бысть иконник чюден, прообразуя и написа образ Господа нашего И. Христа и святыя Богородица, пророк и апостол, мученик, святых, когождо по сличью образа их и писану написывая. А посту и молитве прилежа, якоже никто же ин в нынешнее время, и к сему милостыню творя, яже притяжа от праведных своих труд. И посем постави церковь святаго Спаса на реке Рати, и створи монастырь, и собра братью, и прилежаше со уветом, уча о спасеньи душ их.

Не утаи бо Бог таковаго светилника, якоже бо евангелист глаголет: «Не может град укрытися верху горы стояй, ни вжег светилника покрыет съсудом» — тако и сего Бог просвети. Написа святую Богородицю и вда Максиму митрополиту. Святителю же видевши, яко сан бысть святыя Богородица истинны, украси ю златом и каменем драгим и моляшеся ей, прося милости миру. И преставшися Максиму митрополиту, и деръзну Геронтий игумен подъята сан святительский, возмя ризницю, и рипидию, и многиа иконы, и сановники, якоже подобает святителю, и ону икону святую Богородицу, юже написа угодник Божий Петр, еще сый игумен. Пойде в Костянтин град, по случаю же прииде в корабль и явися ему та икона святаа Богородица, юже бе написал преподобный Петр игумен, рече ему: «Не имаши ты подъяти мене, ни великаго чину священническаго, но от негоже руку створена есмь, тый мя восьприимет, той убо святитель будеть». Утру же бывши, заблудися корабль в мори и бысть блудя многи дни. Преподобному же Петру игумену вшедши во иный корабль, по Божью устроенью, вскоре прииде корабль в Костянтин град. И вниде, по обычаю, в сбор ко преподобному патриарху Афонасию, исполнися храм благоуханиа, и разуме духом преподобный патриарх Афонасей, яко Богом послан есть пути святительскому, освяти его и бысть митрополит. И видеша мнози вернии лице его, яко солнце светящися. По времени же прииде Геронтий; патриарх же Афонасей, испытав, не освяти его, но весь сан возмя и дасть Петру митрополиту и ону святую икону, идеже бе написал.

И пришед во свою митрополью, и нача учити заблужшаа крестьяны, ослабевшаа нужа ради поганых иноверець, протолкуя евангельскаа писаниа и апостольскаа, якоже Великий Василей, Иоан Златоустый, Григорей, та ученья излагав и к семоу свое смирение являя, и тем утвержая истинную веру во крестьянех, преходя Волыньскую землю; и Киевьскую, и Создальскую землю, уча везде вся. Позавиде дьявол, вложи в сердце вражду Андрею, епискому Тферьскому, послати хулу на святаго Петра митрополита Афанасию патриярху. И посла преподобный патриярх Афанасей единаго от клирик своих, мужа сановита, разсудна и разума мудра и тиха, ркущи: «Чадо Петре! Не аз тя избрах, но Святый Дух постави тя пастуха и учителя Христову стаду словесных овець. Се приидоша от вашего языка словеса тяжка на твою святыню. Подщився буди пред святым Сбором и дай ответ сим словом». Бывши же Сбору в граде Переславле и ту бывшю преподобному Семеону, епископу Ростовскому, и преподобному игумену Прохору сущи; приехавши же клирику от Костянтина града и призвану сущи Андрею епископу, а князю великому Михаилу в Орде бывши, но приехавши сыну его, князю великому Дмитрею, и брату его Олександру, и ины князи мнози, вельможи, и воеводы, и множество преподобных игумен и ерей. И абие посрамлен бысть Андрей, епископ Тферьский; святый же Петр митрополит ничто же не створи ему зла, но рече:

«Мир ти, чадо, не ты бо се створи, но диавол». Святый же святитель паче нача учити не токмо по градом, но и вся си в странах, и вся места преходя, ни труда бо собе имея, ни болезни чюя на теле своем, ни лености имея, но пекийся стаде Христово словесных овець. И се тако еретика препре, приехавши на прю, и прокля и. Святый же боле подвиг подъя лощение, и милостивый милостыни утвержаа и ереи, како водити стада Христовых овець, словеснаго стада, и черноризец, и черноризици.

Паче преходя грады, обрете град честен кротостью, зовомы Москва, в немже князь бочтив (богочтив?) именем Ивана, сына Данилова, внука Александрова, милостива до святыих церкви и до нищих, самого горазда святым книгам, послушателя святых учений. Обитав во граде том и рече бочтивому князю: «О, сыну! Многое твое благочестие, послушай мене днесь». Благочестивому князю обещавшися, и рече святый митрополит: «Да зижется церковь камена во граде твоем святаа Богородица». Благоверный князь поклонися и рече: «Твоею молитвою, святый отче, да будет». Основанной же бывши церкви, и гроб собе сотвори святыма своима рукама. По мале же времени възвещена бысть святым ангелом смерть его. Си же нача литургию творити о здравие благоверных царей и за благовернаго князя Ивана, за княиню, и за дети, и за вся воя его, и о всем мире, за вся усопшаа цари и князи, и за вся крестьяне усопшаа. Кончав святую службу и созвав многи нищиа, но иереи, и черноризици, и черноризци, и створи милостыня многи, и раздая именье свое не токмо нищим, и ереом, черноризцем, черноризицам, всем церковником и домочадцам. А благоверному князю не сущи тогда во граде. И призва единаго от вельможь, иже бе устроин старейшина граду, нарецаемь именем Протасей — сей бе на нищаа милостив и милосерд сердцем — и рече ему: «О, чадо, мир подай, иже благоверному князю и всему дому его, и тобе мир». И вда ему влагалище на устрой церкви и на поминание своеа памяти, и прочаа домы церковныя призва. Вечеру же бывшю, и нача святый вечернюю молитву, и еще сущи молитве во устех его, и рече преподобному архимандриту Феодору, егоже воименова на митрополию: «Мир ти, чадо, аз почити хощу». И абие предает дух. И послаша весть ко князю. Благоверный же князь вскоре приеха во град. Несену же святому ко гробу, они же мнеша, яко мертвеца несущи, но открыся некому иноверию о святем, и видев святаго сидящи на одре своем, с оба полы одра его благословяюща носящаа одр, и благовернаго князя, и весь род его, и вся крестьяне. Онем же донесшим в основанную церковь, надгробную песнь певши и вложиша во гроб святое его тело, иже бе сам створил, месяца декабря в 21 день.

Яко же пророк Давид рече: Праведник, яко финике, процветет, яко кедр, иже в Ливане — тако и сей святитель великий процвете, приим дар от Бога, исцеление хромым подая от гроба своего. И быть ему 20 дни имущи во гробе, уноша некий, имея руце от рожениа своего, но не владея ими и кормим быша другом, и тому от гроба своего исцеление даст. Овому слу (слух?), кому прострение дарова [425], и етеру очима слепу, и тому даст прозренье. Молитвою святаго и ина исцелениа быша от гроба его. Да егда благоверный князь Иван, написав та чюдеса, и посла в град Володимерь ко святому сбору, и взем свиток, преподобный епископ Прохор взиде на онбол и нача чести чюдеса, бывшаа в граде Москве от гроба святаго Петра митрополита. В той час он иноверець нача исповедати, иже виде благословляюще с одра своего, и почюдися князь великий Иван и весь народ, иже бе в сборе, възрадовашеся радостью великою. Тако бо Бог просвети землю Создальскую и град, зовомый Москву, и благовернаго князя Ивана, княиню, и дети, и раба Божиа старейшина града. Ты же, святый святителю, нам испроси грехов оставление. От гроба же того исцелениа бывает что ся приходящим. И се паки ино знамение его: создана бысть церкви в сборе милостью святыя Богородица и Божиа угодника, святаго святителя Петра митрополита, а створение великаго князя Ивана».