Студопедия

КАТЕГОРИИ:

АвтомобилиАстрономияБиологияГеографияДом и садДругие языкиДругоеИнформатикаИсторияКультураЛитератураЛогикаМатематикаМедицинаМеталлургияМеханикаОбразованиеОхрана трудаПедагогикаПолитикаПравоПсихологияРелигияРиторикаСоциологияСпортСтроительствоТехнологияТуризмФизикаФилософияФинансыХимияЧерчениеЭкологияЭкономикаЭлектроника



В срѐду сы̀рную




ТРИОДЬ ПОСТНАЯ

 

СЫРНАЯ СЕДМИЦА (с понедельника по пяток)

СРЕДА

 

Во вторник вѐчера.

 

От нача̀ла вечѐрни начина̀ем покло̀ны. На Го̀споди воззва̀х, стихѝры я̀ко обы̀чно.

 

На стихо̀вне самогла̀сен, гла̀с 1:

 

Ра̀достно приѝмем вѐрнии богодохновѐнное завеща̀ние поста̀, я̀коже прѐжде ниневѝтяне: и па̀ки, блуднѝцы и мытарѝ: я̀же покая̀ния про̀поведь от Иоа̀нна ѐсть. Воздержа̀нием угото̀вимся к преселѐнию в Сио̀н, Влады̀чняго священнодѐйства. Слеза̀ми предочѝстимся в нѐм божѐственнаго умовѐния. Помо̀лимся вѝдети обра̀зныя здѐ Па̀схи совершѐние, и ѝстинныя явлѐния. Угото̀вимся на поклонѐние Креста̀, и Воскресѐния Христа̀ Бо̀га, вопию̀ще к Нему̀: не посрамѝ нас от ча̀яния на̀шего Человеколю̀бче.

 

Стѝх: К Тебѐ возведо̀х о̀чи моѝ:

 

И па̀ки ту̀же стихѝру.

 

Стѝх: Помѝлуй на̀с Го̀споди, помѝлуй на̀с:

 

Му̀ченичен: От до̀брыя ку̀пли ва̀шея святѝи! Я̀ко кро̀ви да̀сте, и Небеса̀ наслѐдовасте: и врѐменно искусѝвшееся, вѐчно ра̀дуетеся. Воѝстину до̀брая ва̀ша ку̀пля: тлѐнная бо оста̀вльше, нетлѐнная восприя̀сте, и со А̀нгелы лику̀юще поѐте непреста̀нно Тро̀ицу Единосу̀щную.

 

Сла̀ва, и ны̀не, крестобогоро̀дичен:

 

Подо̀бен: Прехва̀льнии му̀ченицы:

 

Дѐва несквѐрная, иногда̀ на дрѐве вѝдевши, Его̀же родѝ из безсѐменныя утро̀бы, не терпя̀щи утро̀бнаго уязвлѐния, власы̀ терза̀ющи глаго̀лаше: ма̀нием содержа̀й тва̀рь всю̀, ка̀ко я̀ко осуждѐнный на крѐст вознесѐн есѝ, вся̀ко хотя̀й спастѝ человѐчество.



 

Ны̀не отпуща̀еши: По Трѝсвятом, тропа̀рь: Богоро̀дице Дѐво ра̀дуйся: Покло̀н 1. Сла̀ва: Крестѝтелю Христо̀в: Покло̀н 1. И ны̀не: Молѝте за ны̀: Покло̀н 1. Под Твое ̀благоутро̀бие прибега̀ем Богоро̀дице: без покло̀на. Го̀споди помѝлуй, 40. Сла̀ва, и ны̀не: Честнѐйшую Херувѝм: Ѝменем Госпо̀дним благословѝ о̀тче. Иерѐй: Сы̀й благословѐн Христо̀с Бо̀г на̀ш: И мы̀ глаго̀лем молѝтву: Небѐсный Царю̀: и покло̀ны трѝ велѝкия, с молѝтвою свята̀го Ефрѐма: Го̀споди и Влады̀ко живота̀ моего̀: и про̀чих, 12. Па̀ки сконча̀вше покло̀ны, глаго̀лем молѝтву вышепѝсанную Го̀споди и Влады̀ко живота̀ моего̀: и покло̀н едѝн велѝкий. Трисвято̀е. По О̀тче на̀ш: Го̀споди помѝлуй, 12. Сла̀ва, и ны̀не: Го̀споди помѝлуй, трѝжды. Благословѝ: И отпу̀ст. Повечѐрие поѐм велѝкое с покло̀ны. По Досто̀йно ѐсть, тропарѝ дневны̀я и хра̀му. И отпу̀ст мѐньший. Та̀кожде и протѝву пятка̀ творѝм.



 

В срѐду сы̀рную

 

Полу̀нощница, с покло̀ны ея̀.

 

На у̀трени: Поѐм Аллилу̀иа в настоя̀щий гла̀с окто̀иха, и тро̀ичны гла̀са, и обы̀чныя кафѝзмы двѐ. Я̀ко в срѐду и в пято̀к седмѝцы сы̀рныя недѐли поѐм Аллилу̀иа.

Сотворя̀ем и покло̀ны вѐчер и у̀тро, я̀коже вы̀ше речѐся. И по̀ст соверша̀ем по чѝну, а̀ще и ко̀еголибо прилучѝтся свята̀го, и тропа̀рь имѐяй бу̀дет. Междоча̀сия же не поѐм.

 

А̀ще же пра̀здник срѐтения Госпо̀дня, илѝ хра̀м ко̀его свята̀го, поѐм тропа̀рь, и покло̀нов не творѝм, то̀чию по трѝ покло̀ны велѝких.

 

По 1-м стихосло̀вии седа̀льны осмогла̀сника крѐстны.

 

По 2-м стихосло̀вии седа̀лен трио̀ди: Гла̀с 2.

 

Подо̀бен: Благоутро̀бия су̀щи:

 

С мѝром прейтѝ на̀м смирѐнным, предочищѐние благоволѝ посто̀в, неизречѐнным человеколю̀бием Твоѝм Христѐ Бо̀же: низложѝ вра̀жия кова̀рствия, и кресто̀м Твоѝм вся спасѝ, едѝне свѐдый сердѐчная.



 

Сла̀ва, то̀йже. И ны̀не, крестобогоро̀дичен. Подо̀бен:

 

Предстоя̀щи кресту̀ Твоему̀, безсѐменно ро̀ждшая Тя̀, и не терпя̀щи зрѐти непра̀ведно стра̀ждуща, рыда̀ше с пла̀чем, и вопия̀ше Тѝ: ка̀ко стра̀ждеши естество̀м безстра̀стный, сладча̀йший Сы̀не; пою̀ Твою̀ кра̀йнюю благосты̀ню.

 

Здѐ чтѐм сло̀во о постѐ, велѝкаго Васѝлия, его̀же нача̀ло: Утеша̀йте утеша̀йте: и псало̀м 50. Кано̀н во окто̀ихе кресту̀ со ирмосо̀м на 6: и в минѐи свята̀го на 4: и в трио̀ди на 4. В ко̀их же пѐснех приспѐет трипѐснец, и поѐм кано̀н трио̀ди со ирмосо̀м на 6: и трипѐснец на 8. И последѝ ирмо̀с трипѐснца. В сѝх же пѐснех оставля̀ется кано̀н окто̀иха, и минѐи: И поѐм минѐи в вы̀шних пѐснех сѝце: 1 пѐснь кано̀на окто̀иха со ирмосо̀м на 4: И в минѐи свята̀го 1-ю и 3-ю пѐснь, на 6: И в трио̀ди на 4. Подо̀бне поѐм осму̀ю с шесто̀ю и девя̀тую с седмо̀ю пѐсньми.

 

Кано̀н трио̀ди.

 

Пѐснь 1. Гла̀с 4. Творѐние господѝна Андрѐя Крѝтскаго.

 

Ирмо̀с: Воспою̀ Тебѐ Го̀споди Бо̀же мо̀й, я̀ко извѐл есѝ лю̀ди из рабо̀ты егѝпетския: покры̀л же есѝ колеснѝцы фарао̀новы и сѝлу.

 

Постя̀ся Госпо̀дь человѐчески, ко изображѐнию на̀шему, побежда̀ет искусѝтеля, показу̀я на̀ше, и предѐлы подпису̀я на̀м.

 

Моисѐй божѐственный на Сина̀и, воздержа̀нием Бо̀гу лицѐм к лицу̀ глаго̀лати сподо̀бися: тому̀ вѐрнии поревну̀им.

 

Очѝсти Го̀споди, лю̀ди Твоя̀, и призрѐв я̀ко Бо̀г мѝлостивым о̀ком, посетѝ всѐх мно̀жеством мѝлости Твоея̀.

 

Богоро̀дичен: К Тебѐ всѝ притека̀ем Богоро̀дице, я̀ко побо̀рнице твѐрдей, на молѝтву двѝжуще Тя̀, изба̀вити ста̀до Твоѐ от вся̀каго обстоя̀ния.

 

Пѐснь 3.

 

Ирмо̀с: В Го̀споде Бо̀зе моѐм сѐрдце моѐ утвердѝся: тѐм немощству̀ющии препоя̀сашася сѝлою.

 

Чу̀дный Ено̀х воздержа̀нием преложѝся от землѝ: тому̀ образорувну̀юще преложѝмся от тлѝ к животу̀.

 

Молѝтвами и пощѐньми Изба̀вителя умо̀лим: сра̀дуется бо Созда̀тель покая̀нию созда̀ний своѝх.

 

Гото̀вися о душѐ, и предочѝстися прѐжде стра̀сти Христо̀вы, да воскресѐнием духо̀вно спра̀зднуеши Ему̀.

 

Богоро̀дичен: Я̀ко ро̀ждшая Бо̀га, о на̀с непреста̀нно молѝся: к Тебѐ бо Богоро̀дице, грѐшнии прибега̀ем.

 

Та̀же трипѐснец Ио̀сифа. Гла̀с 2:

 

Пѐснь 3.

 

Ирмо̀с: На ка̀мени мя вѐры:

 

Простѐрл есѝ дла̀ни на крестѐ Твоѐм, умертвѝл есѝ умерщвлѐнием Твоѝм кля̀тву, оживѝл есѝ стра̀стию Твоѐю человѐки. Тѐмже поѐм Твоѐ божѐственное распя̀тие, Иису̀се Человеколю̀бче Бо̀же на̀ш.

 

Снѐдию дрѐва умертвѝвшеся, дрѐвом ожѝхом Креста̀ Твоего̀. Того̀ у̀бо прино̀сим Тебѐ в молѝтву: благода̀ть и мѝлость на̀м низпослѝ, Благодѐтелю Влады̀ко многомѝлостиве.

 

Преддвѐрия отверзо̀шася пощѐния, по̀прище приближа̀ется воздержа̀ния, горя̀щим усѐрдием воста̀нем, приѐмлюще да̀р богода̀нный, утоля̀ющий зно̀й прегрешѐний.

 

Врѐмя блажѐнное поста̀, лучѝ испуща̀ющее покая̀ния возсия̀, присту̀пим любочѐстно, отгоня̀юще тьму̀ глубоча̀йшую лѐности, всѝ веселя̀щеся.

 

По̀ст освятѝм любому̀дренно, проповѐдаим воздержа̀ние страстѐй, возопиѝм во слеза̀х Влады̀це: да̀ждь на̀м Го̀споди благода̀ть, содѐйствующую в Твоя̀ хотѐния, Многомѝлостиве.

 

Приѝмше дарова̀ния поста̀ просла̀вим Да̀вшаго во спасѐние, и сиѐ содѐлаим трудолю̀бно, да оставлѐние согрешѐний на̀ших от рукѝ восприѝмем Сотво̀ршаго.

 

Богоро̀дичен: Утолѝ смущѐние страстѐй моѝх, исцелѝ я̀звы душѝ моея̀, воздвѝгни мя̀ от сна̀ уны̀ния хода̀тайством Твоѝм, и предста̀тельством, Пресвята̀я Влады̀чице Ма̀ти Дѐво.

 

Ѝный, гла̀с то̀йже:

 

Ирмо̀с: Непло̀дствовавший мо̀й ум:

Вознѐсшуся Ти Спа̀се, во̀лею на крѐст, вся̀ тва̀рь земна̀я подвѝжеся, и раздра̀ся хра̀мная завѐса.

 

Уязвѝлся есѝ на крестѐ Иису̀се мо̀й менѐ ра̀ди, и прободѐн в рѐбра Бла̀же: отню̀дуже вѐрою покланя̀юся божѐственней держа̀ве Твоѐй.

 

Сла̀ва, тро̀ичен: Прекло̀нь колѐна на зѐмлю, Отцу̀, покланя̀юся, Сы̀на сла̀влю, и Ду̀ха воспева̀ю, единово̀льное нача̀ло, и триипоста̀сное.

 

Богоро̀дичен: Непостижѝмо ѐсть та̀инство Чѝстая, Твоего̀ рождѐния: ражда̀еши бо Марѝе неискусому̀жно Бо̀га, и пребыва̀еши нетлѐнна.

 

Сла̀ва Тебѐ Бо̀же на̀ш, сла̀ва Тебѐ.

 

По̀стное время̀, сѝлою Твоѐю Христѐ, освятѝв, спасѝ вся̀ ны̀ сетѐй вра̀жиих, покланя̀ющияся Тебѐ.

 

Ирмо̀с: Непло̀дствовавший мо̀й ум, плодоно̀сен Бо̀же покажѝ ми, Дѐлателю до̀брых, Насадѝтелю благѝх, благоутро̀бием Твоѝм.

 

Седа̀лен минѐи свято̀му. Сла̀ва, и ны̀не, крестобогоро̀дичен.

 

Пѐснь 4.

 

Ирмо̀с: Услы̀шах слу̀х Тво̀й, и убоя̀хся, разумѐх дела̀ Твоя̀, и ужасо̀хся Го̀споди.

 

Авраа̀м добродѐтелию и страннолю̀бием Тро̀ицу прия̀т, а̀нгельски пришѐдшую.

 

Бога̀тство некра̀домое воздержа̀ния ѐсть да̀р: и сѝм обогатѝвыйся, обогатѝтся Божество̀м.

 

Сла̀ва: Приидѝте, воспла̀чим вку̀пе сло̀вом, вѐрою вопию̀ще: Бо̀же, очѝсти ны̀ мно̀го согрѐшшыя.

 

Богоро̀дичен: Ма̀ти непоро̀чная, благословѐнная, чѝстая Дѐво, Сы̀ну Твоему̀ и Бо̀гу на̀шему, о мѝре молѝся.

 

Пѐснь 5.

 

Ирмо̀с: Возсия̀вый свѐт, и просветѝвый у̀тро, и показа̀вый дѐнь: сла̀ва Тебѐ, сла̀ва Тебѐ, Иису̀се Сы̀не Бо̀жий.

 

Постѝвся дрѐвле Моисѐй в горѐ Сина̀йстей, боговѝдец явѝся: и Илия̀ на о̀гненней колеснѝце возноша̀шеся.

 

Пощѐнием иногда̀ му̀дрый Иса̀ия, у̀гля о̀наго клещѐю вкуша̀ет, егда̀ ко устна̀м его̀ прикосну̀ся.

 

Сла̀ва: Постѝвся прѐжде Даниѝл, и триѐ о̀троцы вку̀пе, чѐлюсти льво̀в сокрушѝвше, горя̀щий пла̀мень попра̀ша.

 

Богоро̀дичен: Богородѝтельнице чѝстая, Бо̀га по чрѐве Твоѐм носѝвшая нетлѐнно, сохранѝ ста̀до Твоѐ, и соблюдѝ невредѝмо.

 

Пѐснь 6.

 

Ирмо̀с: Я̀коже проро̀ка Ио̀ну от кѝта изба̀вил есѝ Христѐ Бо̀же: и менѐ из глубины̀ прегрешѐний возведѝ, и спасѝ мя едѝне Человеколю̀бче.

 

Ио̀ну в кѝте честно̀е спасѐ пощѐние иногда̀: постѝмся у̀бо от сѐрдца, и убежѝм о̀наго в геѐнне тлѐния.

 

Ниневѝтяне же па̀ки гнѐв Бо̀жий претворѝша тѐплым покая̀нием и любо̀вию: тѐм ны̀не любѐзно всѝ поревну̀им.

 

Сла̀ва: Настоя̀щий по̀ст созыва̀ет на̀с на покая̀ние: притецѐм у̀бо с любо̀вию, и уразумѐим, что̀ ѐсть да̀р воздержа̀ния.

 

Богоро̀дичен: Несказа̀нно ро̀ждшая Спа̀са мѝру Христа̀ Бо̀га на̀шего, Того̀ моля̀щи не преста̀й, ро̀д вѐсь спастѝ воспева̀ющих Тя̀.

 

Конда̀к свята̀го: а̀ще святы̀й не ѝмать конда̀ка, глаго̀лем му̀ченичен гла̀са, ѝже и седа̀лен.

 

Пѐснь 7.

 

Ирмо̀с: Отѐц на̀ших Бо̀же, не посрамѝ на̀с, но да̀руй на̀м со дерзновѐнием вопѝти Тебѐ: благословѐн есѝ Бо̀же отѐц на̀ших

 

Бу̀дем и мы̀ я̀ко Даниѝл о̀ный, львы̀ иногда̀ посто̀м укротѝвый в ро̀ве рыка̀ющия.

 

Ю̀ношам трѐм поревну̀им со стра̀хом, да убѐгнем огня̀ геѐнскаго, я̀коже сѝи вавило̀нския пещѝ.

 

Сла̀ва: Постѝмся и мы̀ чѝстым сѐрдцем, и очѝстим тѐло, и вѐсь вся̀ко дух Бо̀гу посвятѝм.

 

Богоро̀дичен: Дѐво Ма̀ти чѝстая, из Тебѐ воплощѐннаго превѐчнаго Сло̀ва моля̀щи не преста0й, спастѝся душа̀м на̀шим.

 

Песнь 8.

 

Ирмо̀с: Царя̀ Христа̀, Его̀же исповѐдаша пленѐнии о̀троцы, в пещѝ глаго̀люще вѐлиим гла̀сом, вся дела̀ по̀йте Го̀спода.

 

Постѝвся прѐжде Ио̀сиф, смшѐния избежѐ беззако̀нныя жены̀, и ца̀рство улучѝ. Тѐмже и мы̀ угасѝм пощѐнием разжжѐнныя стрѐлы врага̀ велиа̀ра.

 

Пощѐнием Давѝд побѐду поста̀ви на иноплемѐнника, и ца̀рство обрѐте: тѐмже и мы приѝмем воздержа̀нием побѐду на врагѝ, и во Го̀споде венча̀ни бу̀дем.

 

Сохранѝм и мы̀ добродѐтели их, Ѝовлево му̀жество, Иа̀ковле незло̀бие, вѐру Авраа̀мову, целому̀дрие Ио̀сифово, и Давѝдову до̀блесть.

 

Богоро̀дичен: Царя̀ Христа̀, Его̀же родѝ на̀м Дѐва Марѝя, и по рождествѐ пребы̀сть Дѐва чѝстая, вся дела̀ госпо̀дня Го̀спода по̀йте, и превозносѝте Его̀ во вѐки.

 

Та̀же трипѐснец ѝный. Ирмо̀с: В пѐщь о̀гненную:

 

Крестоявленно Моисей длани возводя на горе, враги побеждаше: Ты же Спасе, на кресте ру̀це простѐр, умертвѝл есѝ всепа̀губное а̀да мучѝтельство.

 

Гвоздьмѝ прибиѐн на крестѐ, и в рѐбра прободѐн Христѐ Спа̀се мо̀й, кля̀твы изба̀вил есѝ земноро̀дныя, и ра̀дости несконча̀емыя о̀бщники показа̀л есѝ: тѐмже благословѝм человеколю̀бие Твоѐ.

 

Воздержа̀ния врѐмя возсия̀вшее мы̀сленно просвеща̀ет душѐвная чу̀вства, и страстѐй мглу̀ отго̀нит: тѐмже лобыза̀им сиѐ от сѐрдца, превознося̀ще во вѐки.

 

Стра̀сти всегубѝтельныя душѐвныя, сла̀сти смертоно̀сныя по̀ст умерщвля̀ет, и ѝстинно в постоя̀нии творѝт сѐрдца устремлѐния и движѐния: сѐй у̀бо вѐрою восприѝмем любѐзно.

 

Не поста̀ нача̀ло настоя̀щий святы̀й дѐнь вѐрнии вѐдуще, сѐй чѝстым помышлѐнием почтѝм, но вхо̀д глаго̀люще, и пришѐствие к преддвѐрию по̀стному.

 

Предприѐмлет дѐсно боголюбѐзную ду̀шу предпу̀тиями добрѐйший по̀ст, предочистѝтельных по̀честей преподо̀бный, степѐньми и лѐствицею, к сѐй прило̀жься ны̀нешний дѐнь.

 

Богоро̀дичен: Отверзи толкущим нам, и милость Твою призывающим, скорое человеков прибѐжище, и твѐрдая во всѐх Дѐво помо̀щнице, и су̀щим в ну̀ждах извѐстная Засту̀пнице.

 

Ины̀й.

 

Ирмо̀с: В купинѐ Моисѐю:

 

Вознесы̀йся на крѐст всѐх Влады̀ко, Ада̀ма со Ѐвою па̀ки воззва̀л есѝ, и в ра̀й Христѐ Спа̀се ввѐл есѝ, Тя воспева̀ющия во вся̀ вѐки.

 

Тебѐ вознѐсшуся Христѐ на крѐст во̀лею, лучѝ со̀лнечныя стра̀хом помрачѝшася, и за̀йде дѐнь: отоню̀дуже Тя̀ разбо̀йник Бо̀га исповѐда во вся̀ вѐки.

 

Благословѝм Отца̀, и Сы̀на, и Свята̀го Ду̀ха, Го̀спода.

 

Тро̀ичен: Ра̀вна Отцу̀ Сы̀на, и Свята̀го Ду̀ха вѐровахом бы̀ти Святу̀ю Тро̀ицу в Божествѐ едѝном: Ѐйже вѐрою покланя̀емся, А̀риево учѐние прѝсно попира̀юще.

 

Богоро̀дичен: Ка̀ко Тя̀ воспою̀, я̀коже подоба̀ет, Богоро̀дице Дѐво, смра̀дными греха̀ми аз ны̀не помрачѐнный; но у̀бо Пресвята̀я, простѝ моѐ дерзновѐние убо̀гаго моего̀ пѐния.

 

Сла̀ва Тебѐ Бо̀же на̀ш, сла̀ва Тебѐ.

 

Крѐсте, вѐрных упова̀ние, царѐй ору̀жие, свящѐнников сла̀во, мона̀шествующих крѐпосте, Твоѐю сѝлою вся Тя̀ славосло̀вящия спаса̀й во вѐки.

 

Хва̀лим, благословѝм, покланя̀емся Го̀сподеви:

 

Ирмо̀с: В купинѐ Моисѐю Дѐвы чу̀до, на Сина̀йстей горѐ, прообразѝвшаго иногда̀, по̀йте, благословѝте, и превозносѝте во вся̀ вѐки.

 

И стихосло̀вится Честнѐйшую:

 

Пѐснь 9.

 

Ирмо̀с: Велича̀ем всѝ человеколю̀бие Твоѐ Христѐ Спа̀се на̀ш, сла̀во раб Твоѝх и вѐнче вѐрных, возвелѝчивый па̀мять ро̀ждшия Тя̀.

 

Моисѐй во Егѝпте мо̀ре разделѝ, и лю̀ди проведѐ, и сия̀ препита̀ в пусты̀ни непрохо̀дней, посто̀м творя̀ чудеса̀.

 

Иису̀с Навѝн воздержа̀нием лю̀ди освятѝ, и наслѐдствова зѐмлю обетова̀нную, Иорда̀н прешѐд прѐжде.

 

Гедео̀н о̀ный, то̀кмо с тремѝ сты̀ мужѐй хлепта̀вшими, побежда̀ет иноплемѐнники воздержа̀нием и молѝтвою: тому̀ ревну̀юще и мы̀ уподо̀бимся.

 

Богоро̀дичен: Ра̀дуйся Всечестна̀я, Чѝстая дѐвства похвало̀, А̀нгелов утверждѐние, человѐков помо̀щнице, мѝра ра̀досте, Марѝе, и Ма̀ти, и рабо̀ Бо̀га на̀шего.

 

Та̀же трѝпеснец. Ирмо̀с: От Бо̀га Сло̀ва:

 

На крестѐ простѐр божѐственныя дла̀ни, совокупѝл есѝ прѐжде расточѐныя, Изба̀вителю: и Отцу̀ осуждѐное хода̀тайством я̀ко да̀р принѐсл есѝ существо̀ человѐков: сего̀ ра̀ди поѐм пречѝстое Твоѐ распя̀тие.

 

Свята̀го поста̀ возсия̀вшая благода̀ть, лучѝ испуща̀ет нам предочища̀ющия, па̀ки течѐние помышлѐний, и зѐницы тьму̀ отгоня̀ющия, вѐрнии: сего̀ ра̀ди усѐрдно сѐй восприѝмем.

 

Светоно̀сное пощѐние, дарова̀ний божѐственных ча̀шу почѐрпшее на̀м, днѐсь всѐм предъя̀вляет: хотя̀щии сея̀ причастѝтися на по̀льзу душѝ, всѐх Влады̀це, содѐйствовати на̀м помо̀лимся.

 

Гвоздьмѝ божѐственных Твоѝх ру̀к пригвоздѝл есѝ Щѐдре на̀ша грехѝ на крестѐ: копиѐм же рѐбр Твоѝх растерза̀л есѝ лука̀вое писа̀ние согрешѐний, и падѐний лю̀тых. Сего̀ ра̀ди поѐм пречѝстое Твоѐ распя̀тие.

 

Добродѐтелей добрѐйшая отверза̀еся стезя̀, по̀прище божѐственных пощѐний, сиѐ всѐм благоукраша̀ется: подвиза̀тися зако̀нно хотя̀щии, просѝте Христа̀, мѝрное от высоты̀ врѐмя на̀м дарова̀ти.

 

Богоро̀дичен: Скорѐйшею молѝтвою, бо̀дрым Твоѝм покро̀вом, держа̀вною Твоѐю Влады̀чице чѝстая по̀мощию, ны̀не соблюдѝ вѐрныя Твоя̀ рабы̀ от вся̀каго сопротѝвнаго прило̀га, и страстѐй и прегрешѐний, и напа̀стей спасѝ.

 

Ѝный. Ирмо̀с: Преестѐственно пло̀тию:

 

На дрѐве крѐстнем во̀лею пригво̀ждься, всѐх на̀с свободѝл есѝ кля̀твы зако̀нныя: тѐм Тя̀ по до̀лгу велича̀ем Христѐ.

 

Всѝ покланя̀емся страстѐм Твоѝм Спа̀се, я̀же во̀лею восприя̀л есѝ, да свободѝши ро̀д человѐческий рабо̀ты вра̀жия.

 

Тро̀ичен: Присносу̀щно Отѐц и нетлѐнно Сы̀на родѝ, и Ду̀х ѐсть единосу̀щен Отцу̀ же и Сы̀нови, Нераздѐльная Тро̀ица.

 

Богоро̀дичен: Да̀ти прощѐния прегрешѐний Марѝе преблагословѐнная, от Тебѐ вопло̀щшагося молѝ Спа̀са, на̀м грѐшным.

 

Сла̀ва Тебѐ Бо̀же на̀ш, сла̀ва Тебѐ.

 

Лобыза̀ющия Тя̀, сѝлою Твоѐю Крѐсте, по̀стное врѐмя прейтѝ в мѝре сподо̀би, и изба̀ви рабо̀ты вра̀жия.

 

Ирмо̀с: Преестѐственно пло̀тию Зачѐншую во чрѐве, от Отца̀ безлѐтно предвозсия̀вшее Сло̀во, в пѐснех немо̀лчных велича̀ем вѐрнии.

 

Светѝлен во окто̀ихе гла̀са, трѝжды: тро̀ичен.

 

На стихо̀вне самогла̀сен днѐ, гла̀с 1:

 

От бра̀шен постя̀щися душѐ моя̀, и страстѐй не очѝстившися, всу̀е ра̀дуешися неядѐнием: а̀ще бо не вина̀ ти бу̀дет ко исправлѐнию, я̀ко ло̀жная возненавѝдена бу̀деши от Бо̀га, и злы̀м дѐмоном уподо̀бишися, николѝже яду̀щим. Да не у̀бо согреша̀ющи, по̀ст непотрѐбен сотворѝши: но непоколебѝма к стремлѐнием безмѐстным пребыва̀й, мня̀щи предстоя̀ти распя̀тому Спа̀су, па̀че же сраспя̀тися тебѐ ра̀ди Распѐншемуся, вопию̀щи к Нему̀: помянѝ мя Го̀споди, егда̀ приѝдеши во ца̀рствии Твоѐм.

 

Глаго̀лем сѐй два̀жды.

 

Та̀же му̀ченичен: Ва̀с прехва̀льнии му̀ченицы, ни ско̀рбь, ни теснота̀, ни гла̀д, ни гонѐние, ни беда̀, ни я̀рость зверѐй, ни мѐчь, нижѐ о̀гнь претя̀й разлучѝти от Бо̀га возмого̀ша: любо̀вию же па̀че к Нему̀, я̀ко в чуждѝх подвѝгшеся телесѐх, естество̀ забы̀сте, смѐрть презрѐвше: тѐмже и по достоя̀нию болѐзней ва̀ших мзду̀ прия̀сте, небѐснаго ца̀рствия наслѐдницы бы̀сте. Молѝтеся о душа̀х на̀ших.

 

Сла̀ва, и ны̀не, крестобогоро̀дичен. Подо̀бен: Небѐсных чино̀в:

 

Вознесѐна я̀ко вѝде на крестѐ А̀гнца,/ непоро̀чная Дѐва, пла̀чущи вопия̀ше:/ сладча̀йшее моѐ Ча̀до,/ что̀ но̀вое, и пресла̀вное видѐние;/ ка̀ко держа̀й вся̀ дла̀нию,// на дрѐве пригвоздѝлся есѝ пло̀тию;

 

Та̀же, Бла̀го ѐсть: Трисвято̀е. И О̀тче на̀ш: И тропа̀рь: В хра̀ме стоя̀ще сла̀вы Твоея̀: Го̀споди помѝлуй, 40. Сла̀ва, и ны̀не: Честнѐйшую херувѝм: Ѝменем Госпо̀дним благословѝ о̀тче. Иерѐй: Сы̀й благословѐн Христо̀с Бо̀г на̀ш, всегда̀ ны̀не и прѝсно, и во вѐки веко̀в, амѝнь. Та̀же, Небѐсный Царю̀: И творѝм 3 покло̀ны велѝкия с молѝтвою свята̀го Ефрѐма: Го̀споди и Влады̀ко живота̀ моего̀: И про̀чих покло̀нов 12: излегка̀ утомлѐния ра̀ди, глаго̀люще себѐ вта̀й на кѝйждо покло̀н: Бо̀же очѝсти мя грѐшнаго. И па̀ки сконча̀вше покло̀ны, глаго̀лем молѝтву всю̀ вышеопѝсанную: Го̀споди и Влады̀ко живота̀ моего̀: И покло̀н едѝн велѝкий. Присовокупля̀ем же и 1-й ча̀с. Начина̀ет игу̀мен, илѝ экклисиа̀рх илѝ предстоя̀щий мона̀х: Приидѝте, поклонѝмся, трѝжды. Покло̀ны 3, и ча̀с 1-й, Во̀ньже чтѐм и оглашѐния студѝтова. На 1-м часѐ тропа̀рь: Зау̀тра услы̀ши гла̀с мо̀й: Ско̀ро, без пѐния. Стопы̀ моя̀ напра̀ви: и Да испо̀лнятся уста̀: По Трисвято̀м тропа̀рь: Ско̀ро предварѝ: Го̀споди помѝлуй, 40. И молитву: Ѝже на вся̀кое врѐмя: Го̀споди помѝлуй: трѝжды. Сла̀ва, и ны̀не: Честнѐйшую херувѝм: Ѝменем Госпо̀дним: И обы̀чныя покло̀ны. Трисвято̀е. Го̀споди помѝлуй, 12. Христѐ свѐте: И отпу̀ст. И исхождѐние в притво̀р: И лития̀ за упоко̀й.

 

В ту̀южде срѐду сы̀рную. Поѐм часы̀, 3-й, и 6-й, с покло̀ны, и тропарѝ по̀стными: на часѐх в кампа̀н не ударя̀ют.


Дата добавления: 2015-09-15; просмотров: 5; Нарушение авторских прав







lektsii.com - Лекции.Ком - 2014-2021 год. (0.054 сек.) Все материалы представленные на сайте исключительно с целью ознакомления читателями и не преследуют коммерческих целей или нарушение авторских прав
Главная страница Случайная страница Контакты