На 6-м часѐ.

Тропа̀рь проро̀чества, гла̀с 3:

Царю̀ святы̀й всесѝльне, Его̀же боя̀тся и трепѐщут вся̀ческая, спасѝ на̀с: мо̀жеши бо простѝти грехѝ, я̀ко благоутро̀бен. Сла̀ва, и ны̀не, то̀йже.

Прокѝмен, гла̀с 6: Спасѝ Господи лю̀ди Твоя̀, и благословѝ достоя̀ние Твоѐ. Стѝх: К Тебѐ Го̀споди воззову̀:

Проро̀чества Ио̀илева чтѐние. [Глава 2, ст. 12-26].

Та̀ко глаго̀лет Госпо̀дь: обратѝтеся ко Мнѐ всѐм сѐрдцем ва̀шим в постѐ и в пла̀чи, и в рыда̀нии, И расто̀ргните сердца̀ ва̀ша, а не рѝзы ва̀ша, и обратѝтеся ко Го̀споду Бо̀гу ва̀шему, я̀ко мѝлостив и щѐрд ѐсть, долготерпелѝв и многомѝлостив, и раская̀вайся о зло̀бах. Кто̀ вѐсть, обратѝтся ли, и раска̀ется, и оста̀вит за собо̀ю благословѐние, и жѐртву, и возлия̀ние Го̀споду Бо̀гу ва̀шему; Вострубѝте трубо̀ю в Сио̀не, освятѝте по̀ст, проповѐдите цельбу̀. Соберѝте лю̀ди, освятѝте цѐрковь, изберѝте старѐйшины, совокупѝте младѐнцы ссу̀щия сосцы̀: да изы̀дет женѝх от ло̀жа своего̀ и невѐста от черто̀га своего̀. Между̀ степѐньми жѐртвенника воспла̀чутся жерцы̀ служа̀щии Го̀споду, и реку̀т: пощадѝ Го̀споди лю̀ди Твоя̀, и не да̀ждь достоя̀ния Твоего̀ на укорѝзну, да не облада̀ют ѝми язы̀цы, да не реку̀т во язы̀цех: где ѐсть Бо̀г ѝх; И возревнова̀ Госпо̀дь о землѝ Своѐй, и пощадѐ лю̀ди Своя̀. И отвеща̀ Госпо̀дь лю̀дем Своѝм, и речѐ: сѐ А̀з ва̀м послю̀ пшенѝцу, и вино̀, и ма̀сло древя̀ное, и насы̀титеся их, и не да̀м ва̀с ксему̀ на поруга̀ние во язы̀цех. И су̀щаго от сѐвера отжену̀ от ва̀с, и отрѝну его̀ на зѐмлю безво̀дную, и погублю̀ лицѐ его̀ в мо̀ри пѐрвем, и за̀дняя его̀ в мо̀ре послѐднем: и взы̀дет гнѝлость его̀, и взы̀дет смра̀д его̀, я̀ко возвелѝчи дела̀ своя̀. Дерза̀й землѐ, ра̀дуйся и веселѝся, я̀ко возвелѝчи Госпо̀дь, ѐже сотворѝти. Дерза̀йте ско̀ти по̀льстии, я̀ко прозя̀бнуша поля̀ пусты̀ни, я̀ко дрѐво принесѐ пло̀д сво̀й, виногра̀д и смо̀кви да̀ша сѝлу свою̀: И ча̀да Сио̀ня ра̀дуйтеся, и веселѝтеся о Го̀споде Бо̀зе ва̀шем, я̀ко дадѐ ва̀м пѝщу в пра̀вду, и одождѝт ва̀м до̀ждь ра̀нний и по̀здний, я̀коже и прѐжде. И напо̀лнятся гу̀мна ва̀ша пшенѝцы, и преизлию̀тся точѝла вино̀м и елѐем. И возда̀м ва̀м вмѐсто лѐт, в ня̀же поядо̀ша пру̀зи и мшѝца, и сѝплеве, и гу̀сеницы, сѝла Моя̀ велѝкая, ю̀же посла̀х на вы̀. И снѐсте яду̀ще и насы̀титеся, и похвалѝте Ѝмя Го̀спода Бо̀га ва̀шего, я̀же сотворѝ с ва̀ми чудеса̀: и не посрамя̀тся лю̀дие моѝ во вѐк.

Прокѝмен гла̀с 7: Госпо̀дь крѐпость лю̀дем Своѝм да̀ст, Госпо̀дь благословѝт лю̀ди Своя̀ мѝром.

Стѝх: Принесѝте Го̀сподеви сы̀нове Бо̀жии.

Та̀же, Ско̀ро да предваря̀т: Трисвято̀е. И про̀чая по обы̀чаю поста̀. И молѝтва: Бо̀же и Го̀споди Сѝл:

Вку̀пе же поѐм и 9-й ча̀с, и молѝтву: Влады̀ко Го̀споди Иису̀се Христѐ Бо̀же на̀ш: Посѐм изобразѝтельныя, и блажѐнны: Во Ца̀рствии Твоѐм: Ско̀ро, без пѐния. Сла̀ва, и ны̀не: Помянѝ нас Го̀споди: и покло̀ны трѝ. Лѝк небѐсный: И про̀чая. И по О̀тче на̀ш: Кондакѝ хра̀ма, и свято̀му. Сла̀ва, конда̀к: Со святы̀ми упоко̀й: И ны̀не, конда̀к: Предста̀тельство христиа̀н: Го̀споди помѝлуй, 40. Сла̀ва, и ны̀не: Честнѐйшую херувѝм: Покло̀ны трѝ велѝкия, и про̀чих 12.

Посѐм другѝй лѝк начина̀ет вечѐрню: Приидѝте поклонѝмся: трѝжды, и псало̀м: Благословѝ душѐ моя̀ Го̀спода: И про̀чая.

В срѐду вѐчера,

На Го̀споди воззва̀х, стихѝры, я̀ко обы̀чно.

Сла̀ва, и ны̀не, богоро̀дичен.

Прокѝмен, гла̀с 5: Бо̀же, во ѝмя Твоѐ спасѝ мя, и в сѝле Твоѐй судѝ мя. Стѝх: Бо̀же, услы̀ши молѝтву мою̀, внушѝ глаго̀лы у̀ст моѝх.

Проро̀чества Ио̀илева чтѐние. [Глава 3, ст. 12-21].

Та̀ко глаго̀лет Госпо̀дь: да воста̀нут и взы̀дут всѝ язы̀цы на юдо̀ль Иосафа̀тову, я̀ко та̀мо ся̀ду разсудѝти вся̀ язы̀ки я̀же о̀крест. Испустѝте серпы̀, я̀ко предстоѝт обыма̀ние виногра̀да: внѝтиде, топчѝте, я̀ко испо̀лнь точѝло, излива̀ются подточѝлия, я̀ко умно̀жишася зло̀бы их. Гла̀си прогласѝша на по̀ли судѐбнем, я̀ко блѝз дѐнь Госпо̀день на юдо̀ли судѐбней. Со̀лнце и луна̀ помѐркнут, и звѐзды скры̀ют свѐт сво̀й. Госпо̀дь же от Сио̀на воззовѐт, и от Иерусалѝма да̀ст гла̀с Сво̀й, и потрясѐтся нѐбо и земля̀: Госпо̀дь же пощадѝт людѝ Своя̀, и укрепѝт [Госпо̀дь] сы̀ны Изра̀илевы. И увѐсте, я̀ко А̀з Госпо̀дь Бо̀г ва̀ш, вселя̀яся в Сио̀не в горѐ Моѐй святѐй: и бу̀дет Иерусалѝм свя̀т, и иноплемѐнницы не про̀йдут сквозѐ его̀ ктому̀. И бу̀дет в то̀й дѐнь иска̀плют го̀ры сла̀дость, и хо̀лми источа̀т млеко̀, и всѝ исто̀чницы Иу̀дины источа̀т во̀ды, и исто̀чник от до̀му Госпо̀дня изы̀дет, и напоѝт водотѐчь сѝтия [евр. ситтѝм] Егѝпет в погѝбель бу̀дет, и Идумѐя в по̀ле погѝбели бу̀дет за озлоблѐние сыно̀в Иу̀диных, понѐже пролия̀ша кро̀вь пра̀ведную на землѝ своѐй. Иудѐя же во вѐки населѝтся, и Иерусалѝм в ро̀ды родо̀в. И взыщу̀ кро̀ви ѝх и не обезвиню̀: и Госпо̀дь вселѝтся в Сио̀не.

Прокѝмен, гла̀с 6: Да упова̀ет Изра̀иль на Го̀спода, от ны̀не и до вѐка. Стѝх: Го̀споди, не вознесѐся сѐрдце моѐ, нижѐ вознесо̀стеся о̀чи моѝ. И Сподо̀би Го̀споди в вѐчер сѐй:

На стихо̀вне самогла̀сен днѐ, гла̀с 3:

Возсия̀ весна̀ по̀стная, цвѐт покая̀ния, очѝстим у̀бо себѐ бра̀тие, от вся̀кия сквѐрны, Светода̀вцу пою̀ще рцѐм: сла̀ва Тебѐ, едѝне Человеколю̀бче.

Стѝх же глаго̀лем: К Тебѐ возведо̀х: И повторя̀ем самогла̀сен. Та̀же стѝх: Помѝлуй на̀с Го̀споди: и му̀ченичен:

Му̀ченицы Твоѝ Го̀споди, вѐрою утвѐрждшеся, упова̀нием известѝвшеся, любо̀вию Креста̀ Твоего̀ душѐвно соединѝвшеся, вра̀жие мучѝтельство разрушѝша, и улучѝвше венцы̀, со безпло̀тными мо̀лятся о душа̀х на̀ших.

Сла̀ва, и ны̀не, богоро̀дичен: Первосвята̀я, чѝстая, похвала̀ су̀щи небѐсных чино̀в, апо̀столов пѐние, проро̀ков сбытиѐ, Влады̀чице, приимѝ молѝтвы на̀ша.

Ны̀не отпуща̀еши: по Трисвято̀м, тропа̀рь свято̀му: Сла̀ва, и ны̀не, богоро̀дичен его̀. Ащѐ нѐсть, тогда̀ тропа̀рь днѐ. Сла̀ва, и ны̀не, богоро̀дичен, по гла̀су тропаря̀. Ектения̀: Помѝлуй на̀с Бо̀же: Покло̀ны 3 велѝкия. Бу̀ди ѝмя Госпо̀дне: Благословлю̀ Го̀спода: Досто̀йно ѐсть: И отпу̀ст. И исхождѐние в притво̀р. И быва̀ет обы̀чная лития̀ о усо̀пших. [зрѝ] Разу̀мно же да бу̀дет, я̀ко в Палестѝне, ѐже ѐсть во Иерусалѝмской странѐ, не прия̀хом от святы̀х отѐц сотворя̀ти совершѐнныя литургѝи в срѐду и в пято̀к сы̀рныя недѐли, нижѐ преждеосвящѐнныя: в та бо два̀ днѝ поѐм аллилу̀ия с покло̀ны вѐчер и у̀тро, я̀коже вы̀ше речѐся.

По вечѐрни же, в сѝх дву̀ днѐх, ядѝм сы̀р и я̀йца, соблюда̀юще и пра̀вило во святы̀х отца̀ на̀шего Никѝфора, патриа̀рха Константинопо̀льского, исповѐдника, глаго̀люща: подоба̀ет постѝтися мона̀хом в срѐду, и пято̀к сыроя̀стный. Отвраща̀ет же сиѐ пра̀вило преда̀ние иаковѝтское и тетрадѝтскую ѐресь. [зрѝ] В срѐду сы̀рную вѐчер. Повечѐрие поѐм ма̀лое. И поѐм кано̀н, ѝже в минѐи на ряду̀, в суббо̀ту хотя̀щаго прилучѝтися свята̀го.