Или же паки соблазнительности ради нынешнего времене, не снизходительно.

То мы нижайшии, таковым разслабленно зиждущим столп сей, не обинуяся речем. Яко несть воля Божия, имети снизхождение к беззаконию и разрушению заповедей Его. Понеже бо токмо [Кормчая лист 568] в начале евангельския проповеди, не требоваху твердаго законоположения, но точию еже приводити на крещение; по крещении же и по исполнении веры, дерзновение восприемше, вся совершаху елико подобаше, яко со властию Владычнии заповеди совершиша. Тогда убо основанием твердым, святую церковь оградиша; запрещения же и отлучения соборныя церкве, безчинным и непокоривым по божественному закону положиша; некия же и до смерти осудиша. Яко же в деяниих верховный апостол Петр, Ананию и Сапфиру: и велегласный апостол Павел, судив соблудившаго в Коринфе, таковаго рече предати сатане, во измождение плоти.

Аще ли кто паки возглаголет нам, яко да того ради имут быти которы и расколы; и мы им паки возответствуем.

Не везде бо есть добро соединение, но бывает иногда и разделение добро [евангелие а неделю всех святых]; ниже всяко умирение похвально, но бывает множицею и мир на повреждение, и далече от божественныя любве отгоняющь. Егда убо миримся о разрушении истины, погрешно есть и неподобно зело. Никон Черногорский [слово 6 лист 42]. Уне есть о благочестии растояние, неже пристрастное соединение.

Сварятися же рабом Божиим аще и не лепо есть [беседы апостол. лист 1661], в подобающее же время и похвально есть. по сицевому свидетельству. Обаче есть похвала и сваритися о церковных [Альфа глава 28 лист 172 и 173], на утвержение им. [ниже] [беседы апост. лист 1475] таковии убо не сварливи, но паче похвальни и премудри; и прочее зри тамо. Подобно сему и в сказании, о первом и втором соборе речено [Кормчая лист 218].

А еже яко бы по слабости народа, и за соблазнительное время сие, не подобает законныя употребляти строгости, но смягчати и уступати. О сем приникнем к божественному писанию и узрим, подобает ли ныне творити снизхождение.

Великий апостол Павел глаголет [галатом зач. 214]. Доброе же творяще, да не стужаемси, во время бо свое пожнем неослабеюще. Тем же убо дондеже время имамы, делаем благое ко всем, паче же к присным в вере. И паки [евреом зач. 324]. Да разумеваем друг друга в поощрении любве и добрых дел, неоставляюще церковных собраний своих, яко же есть некиим обычай, но друг друга подвизающе. И толико паче молящеся, елико видите приближающься день судный.

Зде не о единой любви и молитве апостол беседует, но прирек: и добрых дел. Проявленно яко и прочая вся добродетели, ныне наипаче подобает нам творити. Такожде и Христос Спаситель предвозвещая о сем времени глаголет. Евангелие [Благовестник на Луку зач. 107 лист 224]. Внемлите же себе, да некогда отягчают сердца ваша объядением и пиянством, и печальми житейскими, и найдет на вы внезапу день той. яко сеть бо приидет на вся седящия на лицы всея земли. бдите убо на всяко время молящеся, да сподобитеся убежати всех сих хотящих быти. и стати пред Сыном человеческим. Толк. [лист 225][ниже] Не с наблюдением бо грядет день той, но нечаянно сокровенно, яко же сеть объимая невнимающих. Обаче кто пытати хощет речения сего, седящих на лицы всея земли. тех бо уловляет сеть она и день, без печали живущия и праздны; то бо суть седящии и тии уловляемы. Елико же действенни и крепцы и трезвы суть о благотворении, и подвизающися присно к добру, не спяще ни почивающе зде глаголюще сами себе, востани и иди. яко несть ти се покой, и отчины лучшия желающе. Таковым несть день он сеть и беда, но яко праздника день. И того ради достоит бдети и молитися Богу, да возможем избежати хотящих быти. [ниже] тех бо инако не возможем избежати, разве бдением и молитвами. И паки [от Матф. зач. 100 лист 195 обор.]. Бдите заповедает и готовитеся; сиречь, имейте дела добрая и уготованная, яко да егда приидет Господь просити еже хощет, имам давати. [ниже] отнуду же не ленитеся но подвизайтеся. Понеже печали помяну и беды [от Луки зач. 88 лист 192], наносит и врачбу тем. есть молитва, не просто молитва, но терпеливне и с печалию; хотят бо рече сия вся тогда случитися. но велика помощь тем молитва, юже с терпением часто творити подобает нам. [ниже][лист 193] Сице убо научив и явль нам, во время скончания, молитвам быти требе. И паки глаголет Христос [Благовестник на Матф. зач. 99 лист 189 об.]. Да не будет бегство ваше зиме, ни паки в суботу. О сем святии толкуя сице гадательствуют. Яко подобает молитися, да не будет бегство ваше от жития сего, сиречь, исход души в суботу, рекше в праздность от добрых дел. ни в зиме, еже есть безплодие благих; но в тишине благих духовных дел, и в безмолвии житейском. И паки [от Марка зач. 60]. О горе же зиме бегающему. подобает бо ныне бегати от греха с теплотою; сиречь, с покаянием; а не измерзшу и неподвижне, се бо есть еже зиме бегати. И паки [Анастасий Синаит во ответе 77]. В зиме же есмы, егда бо вредове плотнии обладают в нас. И в суботу же, егда празднии жизнь нашу препровождаем.

Согласно же Христу, и святым евангельским толкователем, и преподобный Ефрем Сирин, о настоящем времени пиша предупреждает нас. Крепцей быти убо души есть [слово 105 лист 297], могущей содержати свое глаголю житие посреди соблазн. аще убо кий человек пренемогая обрящется, удобь разоряется. и будет пленен знаменьми злаго лукаваго змия; без милости обрящется таковый в день судный. видя бо лице мучителево, верова волею. многих убо молитв и слез суть требе. О возлюбленнии, да обрящемся тверди в тыя напасти. многим бо бывающим привидениям от зверя, богопротивен бо сый, всех хощет погубити.

Внимайте же молим вас, како вси вышепоказаннии святии, по научению Христову, нимало небрегоша, еже аще и отступают нецыи от церкви. но они о том точию попечение имели, еже сохранити заповеди Божия; и от безсловеснаго схождения оградити церковь Христову. Наипаче же в сие горькоплачевное антихристово время, предповелевают за належащую скорбь, всю жизнь християном провождати: в терпении, молитвах, и слезах; но не изыскивати себе ослабы пространьства и плотоугодия. О чем и преподобный Никон Черногорский пространно завещавает. Мы же хотя мало нечто вашей любви предложим зде.

И таковыя рече [Тактикон слово 14, лист 77], [снизхождения] отче мой многия требуют боязни; и убо егда удержан будет человек, сице лепо есть сотворити, яко же сей старец; а не яко же преднаписанный; и яко схождения ради, ходатай в роду бывает, и себе и сущим с ним; то же творя яко же и Аарон он. Ибо и сам той мняшеся снити израильтяном, яко да пребудут с ним в пустыни; а не отъидут во Египет, и обратятся во идолослужение. Сии же присно нравом суще искривлении; и еже хотяху во Египте содеяху, идолослужение глаголю. се в пустыни сотвориша. Сице мню, бывает и в безсловесных схождениих. [ниже] Сего ради добро есть, и зело добро и спасительно, яко изначала весть кождо своея меры, и избирает в нем же может довлети; и паки совершеннейшим бегати от таковых. И зри ми отче мой начальника спасению нашему, Господа нашего Исуса Христа. Како егда мнози от ученик его слышавше слово, и соблазнишася, шедше вспять; Сам же Господь не сниде к тех пренемоганию; но паче и обанадесятим великим рече: Еда и вы хощете итти; идите. Подобно же и великий чюдотворец Симеон, внегда рекоша ему братия; зане мнози яко же труждахуся и моляху его пустити еже приимати овыя приходящия; не сниде тем отнюд, но отвеща глаголя; Аз нестяжатель есмь, хотяй убо отъити, се во обители двери четыре, яковою же хощет койждо да идет. Тако отче мой, елицы мирских возмогоша убежати, таковых подражают. и первие начальника нашему спасению Господа и Сына Божия; а не инех. Дозде преподобный Никон.

А по таковым свидетельствам, паче протребно быти ныне подкреплению, а не снизхождению и послаблению. О чесом и писатель книги О вере согласно тому разсуждая глаголет [глава 30 лист 270]. Антихрист многих прельстит и отлучит от правды, а наипаче тех иже растленное любят житие. И ныне преболе тии от святыя церкве, и от православныя веры отпадают, иже не хотят уским путем ходити.

Паки преподобный Никон, яснейше навершая главизну сию сице глаголет [Тактикон слово 20, лист 116 об.]. Яко и кроме будущаго воздаяния, и ныне несть время долготерпения, но время воздаяния и отмщения. и нужда есть раздражившему Бога, да не показан будет зде и тамо, и паки вся зде, или тамо вся. Обаче убо нужда належит, яко да восприимет койждо по своих деяниих. [ниже] [лист 121] Увы мне окаянному; посреде же праведный судия Бог, венчатель и мучитель. и сущия по Бозе венчавает, супротивныя же мучит. Паче же ныне несть время долготерпения, но время отмщения. и сего ради егда во общине исправление не бывает, кождо слышал есть божественнаго гласа глаголющаго, яко спасаяй спаси свою душу. Не восхощем убо со грехи чюжими погибнути; но убоявшеся тяжкаго суда, и страшный день пред очима имуще, с таковыми погибнути не изволим. но засвидетельствовати день и нощь, в народе и особь должни есмы; соотводитися же лукавством их не восхощем; прилежати же паче и приобрести их, и изъяти от сети лукаваго. Аще же се не возможем, потщимся поне своя души от вечнаго осуждения спасти.

На таковом же убо твердом и непоколебимом Христовом, и святых Его основании и наши первоначальнии поморстии отцы церковь свою и общежительства основали. А егда начаша у них некоторыя безчиния и проказы проявлятися; тогда они не снизхождение и не попущение употребляху; но запрещениями и наказаниями, церковь Христову подкрепляху. Что и доныне после их свидетельствует; сиречь, написанныя их статии 23 и прочии, и поучительное о благочинии пустынном наказание; в нем же сице они настоятельно повелевают [большой сборник лист 280]. [ниже]

Вы же [глаголют] о богособранный пустынный народе, обоего пола, мужеска и женьска, юноши и девы, мужие и жены, подклоните выи ваши под ярем Божиих законов, возлюбите церковная законоположения, благочинным житием исполняти. восхощите воле Божией святей, а не своей последовати. Да и зде срама и поношения, и написанных клятв от Господа, в будущим же вечнаго томления избавитися. А иже жестоковыйнии от вас, и необрезаннии сердцы и ушесы, присно противляющиися церковным преданиям, и в своевольном ума скитании хотящии жити; и на наказующия гневающиися. Почто убо зде в пустыни живете; пространен мир вмещаяй вы; широка вселенная приемлющая вы; по своему нраву прочее избирайте места. Что убо спастися хотящим соблазн подаваете; чесо ради добре живущим, вместо диявола бываете. Аще убо по месту не хощете жити, изберите место по житию вашему, и прочим спасающимся, в претыкание и в соблазн не бывайте, да имя Божие святое и славное, нашими безчинии не хулится во языцех, но да паче свет преподобнаго благочиннаго пребывания, возсияет пред человеки; о самом Христе Бозе нашем, Ему же слава со Отцем и со Святым Духом, и ныне и присно и во веки, аминь.

Такожде и по них бывшия благочестивыя предки наши, никаковым беззакониям и своеволиям в церкви быти отнюд не попущаху, но всегда наказоваху и запрещаху, а по временам и единокупно собирахуся, и общесоветно по божественным правилом и статии излагаху, коими всякое беззаконие, своеволие же и безчиние отсецаху и изкореняху. хотяй да прочтет самыя статии тыя, и увесть.

Тем же убо ныне и мы последороднии, по долгу своему, подражая и последующе первие начальнику спасения нашего, Христу Сыну Божию, и духоносным его апостолом, и вышеписанным святым учителем церковным, такожде и благочестивым предкам нашим, соловецким, и первоначальным поморским пустынножителем, и по них бывшим единомудренным им, отцем нашим. И вас убо, о вожделеньнии и единоумнии сынове, кафолическия церкве, разсеянное о Христе братство наше, любезне молим и просим, и заповедуем, стати крепце на камени благодатныя ревности, оставльших песок человеческаго малодушия. Подвигнетеся за благочестивая церковная заповедания, возблагоревнуйте о благоговейнем благочестиваго пребывания жительстве. Потщитися святая отеческая благочиния в церковь Христову, и в своя жительства вводити. безчинная же мирская предания, подзазорная и противозаконная сожития, схождения витания собеседования с зазорными лицы, и на всякое беззаконное дело, советование поможение же и соизволение; их же ради бывают прелютая падения; за которая по апостолу: грядет гнев Божий на сыны противления; сия от среды и от исполнения искоренити потщитеся. На людей же растлевающих и истребляющих християнское благочестие, и святоотеческия обычаи презирающих не взирайте. Не ужасайтеся наветов от ненаказанных бывающих, не бойтеся поношений, не устрашайтеся ненависти. Глаголет бо пророк; Страха человеческаго, да не убоишися и устрашению его не у повинуйся. яко же бо ухлебленая овчата, тако снедени будут. Похвальна убо вражда за ревность яже по Бозе, паче мира от Бога разлучающаго. Якову же ревность показа в ветсем, блаженный он присно поемый Финеес; Что же сей, возревнова по Бозе возгореся рвением любве Божия, обрете согрешающа нека, прободе своим копием оба, наложи страх прочим сквернолюбцем, устави скверное греха разжение, и страхом прободения; устави же и гнев Божий иже на израиля; прият завет мирный от Господа. отступи и всегубительная язва казнящая люди израилевы. Сего предобрую ревность, похваляя и богоотец поет, и ста [рече] Финеес и угоди, и преста сечь. Сия ли приобрет ревностию, еже гнев Божий уставити токмо; ни, но вменися [рече] ему в правду в род и род до века. Зрите же, елико ревность яже по Бозе, вознесе онаго мужа; и всей вселенней даже до века, славна и чюдна сотвори. Подобно же сему ревность и прочии святии ветхаго и новаго завета, за любовь Божия чествования показаша, и даже до смерти о заповедех его подвизашася: и друг друга поощряху и наказоваху и обличаху, и в хранение закона Божия принуждаху. и нам всем християном той же закон положиша; что отчасти выше сего во главах 6-й, и 7-й, вашей любви показахом.

И оным убо божественным писаниям, долженствуем мы вси, яко же старейшии в християнех последовати; тако и прочии церковныя чистоты ревнители, яко же присная церковная чада, матерьней болезни сболезновати, и за священныя ея законы мужественне стояти, и всякому безчинству и злодеянию возбраняти. И яко же убо сами должны есмы, вся заповеди Божия и отеческая предания делом исполняти. тако и инех к тому же наставляти, понуждати же и наказывати, не боящеся ниже срамляющеся никого же; о сем бо и божественное писание нам заповедая глаголет.

Потщимся убо братие потщимся [евангелие поучительное, генваря, 1 день], яко да сами спасемся и другия научим. Не глаголы токмо, но и делы еже делаем. Да просияет свет наш пред человеки, яко да видят добрая дела наша, и прославят Бога; и они таковая начнут творити. И паки [в неделю 2, слово 23]. И не токмо мы делатели евангелию будем, но и другим будем наставницы и учители, и к нашей ревности их подвигнем.

И тако отцы и братия и чада, потщимся Господа ради, и ради спасения душ своих потщимся; отвергше всякую леность и небрежение. Теплое же усердие и желание восприимше, и по силе нашей стяжем богодухновенныя книги, и соборныя отец наших статии, с ними же, и 18 статей, прошлаго 7403 [1895] г. написанныя. И трудолюбне подвигнемся начасте прочитовающе, и лежимый в них разум со вниманием испытуем. Тогда нашими прилежными подвиги, и Божиею помощию удобно можем, израстшия нерадением нашим плевелы вся искоренити, и ниву церковную очистити и угладити. Добрую же и душеспасительную пшеницу, рекше; святоотеческия обычаи и святоцерковная законная повеления, и предков наших соборная подтверждения, на ниве той посеяти. благодатию же Божиею укоренитися и возрастет, и обильный принесет плод.

Тогда мы и звание православнаго християнства носити на себе будем, не словом, но вещию; тем и различимся от прочих еретиков, насильственно присвояющих себе звание староверцев.

Равно же и противу лживых християн, новых отщепенцев наших, чисто и ясно правоту свою покажем. Потомственное же происходение, и духовное сродство наше, к благочестивым соловецким страдальцем, и первобытным поморским пустынножителем, достоверно и неотъемлемо имети будем у себе. Тогда паки, видящии нас благоговейнии и благоразумнии людие почюдятся и прославят Бога о нас; врази же Божии церковнии отступницы посрамятся, и положивше руку свою на уста своя умолкнут, и отбегнут от нас яко же совы нощныя, не терпяще полуденнаго света.

Мы же о укрепляющем нас Господе Бозе Спасе нашем Исусе Христе, в веце сем потрудимся пожити в покаянии, и в душеспасительных подвизех богоугодно; в будущим же благодатию Его и человеколюбием, сподобимся получити блаженную жизнь со всеми святыми в безконечныя веки, аминь.

При сем было суждение на пятую главу, за погружение креста; определили мы оному крестителю наложить, шестинедельный пост с отлучением. А потом запретить ему, чтобы никогда до крещения ни касался. К тому и подписуемся. о. Л. Е. о. Герасим Ефимов. о. Козма Николаев. о. Захар Карпов. о. Петр Данилов. о. Михаил Миронов. о. Тимофей Иванов. о. Иван Григорьев. о. Филипп Александров.

СЛЕДЫ РАЗДЕЛОВ.

Старопоморскаго монастыря и последователей онаго православных християн,

с Феодосием Васильевичем.

Еще в первых летех, до Лексинскаго основания, Феодосий Васильич, с некими себе последователи, посети Выгорецкую обитель. и беседоваше о благочестии и содержании обычаев. где и был зазрен выгорецкими отцы в некоторых обычаях. [которыя вам известны. писаны в поморском житейнике] [ниже] И по довольном показании ему о сем от божественнаго писания и увещания, обещался вся сия исправить; и тако с миром яшася в пределы Польши к своей обители.

По прибытии же собра братию, и возвести о всем вышеписанном; отчего нача происходити в них смущения, и возгореся огнь вражды и несогласия. И по некоем времени поя с собою, шесть старейших ему единомысленных; и потече к краям поморским. И егда прииде в выгорецкое общежительство, где был прият с християнскою любовию.

И по обычном собеседовании бысть меж их велие несогласие, [паче же] в торжищных брашнах, и внешних браков в приятии, паче же в четырелитерном оных на крестах надписании титлы, I Н Ц I. за которую по заочности христоборцами и иудеями поморских последователей нарицаху. [пис. в пом. жит] отцем оным боящимся сих приятия, Феодосию же Васильеву непреклонным сих изъятию.

И в такой непреклонности Феодосий Васильич с товарищи яшася восвоя си. В лето 7214 [1706] [пом. жит. ихних отеческих завещаний, глава 9, лист 59].

По выходе же из монастыря отрясоша прах, прилепший к ногам, с сими словесы; Не буди нам с вами имети общения, ни в сем веце ни в будущим; и в сицевом положениии отъиде света сего.

Аще от блаженныя памяти Андрея Дионисьевича, и был наставляем и увещаем, к первобытному его положению и единомыслию, чрез послание писанное в 7217 [1709] году, но оное было безуспешно. что видно из ответа Феодосия Васильева писаннаго на оное, в 7218 [1710] году. А что в книге Отеческих завещаний, оное послание Андрея Дионисьича означено, 7220 [1712] год. [глава 17, лист 132] то явно есть, яко то неправильно [а сие было писано к сыну его Евстрату Феодос., или сущая ошибка]. Понеже Феодосий Васильич, в 7219 [1711] году, отъиде света сего.

Еще обносится, в книге Отеческих завещаний, [глава 54] яко бы Андрей Дионисьич, по прошествии двух лет после раздела, был в Нове граде; и с Феодосием Васильичем имел всякое согласие. То сие в дело миротворения привести несвойственно. Понеже аще бы сие было правильно; почто бы после сего писать к Феодосию Васильичу увещание о миротворении в 7217 [1709] году. И аще бы мир сей имел законное утверждение, почто бы Игнатию Трофимову повторять мир своим прибытием, в 7235 [1727] году, уже после смерти Феодосия Васильича; что показуется от тоя же [глава 54 книги Отеческих завещаний].

По смерти же Феодосия Васильича, оставшемуся сыну его, Евстрату Феодос., в обитель Ряпину, бысть два послания миротворения, в лето 7220 [1712]. которыя обносятся в книге Отеческих завещаний, [главы 51, и 52] и еще одно которое обносится в поморском о Феодосии Васильиче житейнике, с 8-ю вопросами о титле и о прочих вещех, составленное трудами, Андрея же Дионисьевича; при них же зело плачевное сожаление и увещание написа; яко да престанут от раздорных бурь. и да приидут в тишину любовнаго соединения. И иными письмами писанными Евстрату Феодосьичу, Андреем Дионисьевичем, в разныя времена, но все было безуспешно. и церковь пребывала в плачевном раздора состоянии.

В двадесять же первый год от разделения. от мироздания же, 7235-й [1727]. некто Игнат Трофимов, еще при животе премудраго Андрея Дионисьича, прибы в Выговский монастырь, и сотвори любовное соединение, где ему было снисходительное попущение о титле, впредь до обыскания.

Но закоренелость раздора вкрадшаяся в сердца малодушных и упорных, осталась в своей неистребимости; и мнози от сицевых мира сего. и во ушеса своя не прияша. яко же новгородстии старорустии и великопольстии. Да и самый Евстрат Феодосьевич, мир сей ни во что вмени, и пребы в первобытном своем положении [Поморский епитимейник].

И в таком мирораздорном положении церковь православная пребывала до лет прибытия в монастырь Ильи Алексиевича Ковылина, [по Московской смертоносной язве] где конечне показа свое несогласие и разделение, которое обносится и в книге Отеческих завещаний, в 6-й главе. статия 4-я. собора бывшаго в Польше, в 7260 [1752] году [и главах 47-й, и 60, статии 11, главе 27. письмо 7308. пункт 5-й. глава 30. пункт 25. глава 9. и поморский житейник].

Первой же статьей сего собора, [7260 (1752) года] сотворили отречение от всего православия не приемлющаго означенную в ней титлу. И о сем дозде.

Показание изыскания.

Аще и бысть примирение, Игнат Трофимович к Андрею Дионисьичу, в лето 7235-го [1727]. но по приятии тропаря в лето 7247-го [1739]. [а по вашему показанию 1740] бысть новое церковное разделение старца Филиппа, с Семеном Дионисьичем. Вы же до 7260 [1752] года, аще временем и делились с оными. но как видно [от Поморскаго житейника] до прибытия в монастырь Ильи Алексиева Ковылина, бысть един пастырь и едино стадо.

И того ради, яко же оныя, сице и вы, остаетеся вне церкви православныя. Оныя за приятие тропаря, вы же за сообщение с ними, и за утверждение отец ваших предания; Которое показуется от книги Отеческих завещаний, от главы 6-й, собора 7260 [1752] года, статьи, 1, 4, 6, и 45-й. И тако пребывает церковь православная, и до сего настоящаго времени.

А что касается до присоединения вашего к християнскому обществу старопоморскаго сословия в Питербурге в лето 7299 [1791], генваря в 4-й день, и кончавшагося в лето тоже, апреля в 21 день. которое обносится в главе 11, книги Отеческих завещаний, было частное а не всеобщее, и прочих стран согласию непричастное, что ясно зримо есть от рукоприкладственнаго утверждения. За что были разборы от всего общества християнскаго. а наипаче от отцев на Топ озерском острове проживающих, писмом в 7314, году, марта 24 день, писанным питербурскому обществу християнскому. Да при сем же соединении обретается уложение в статии 4-й, чуждое уставом церкви православныя.

Такожде и в Москве бысть соединение ваше, с обществом старопоморскаго сословия, что на Балчуге, в лето 7312 [1804], декабря в 20 день. [книга Отеческих завещаний, глава 32]; Но и сие во всем подобно первому, частное, а не всеобщее; и прочия страны ему были непричастны. И того ради следы сего миротворения, ни в кое утверждение или основание довольствоватися не могут.

Такожде и пиcьмы.

1-е, настоятеля Михайлы Григорьича, писанное к Алексию и Григорию Яковлевым, которое обносится в книге Отеческих завещаний [в главе 57], полученное вами, 1771 году, такожде вероятию недостойное. Понеже по деятелному нами о сем изысканию, оказалось что он в 1771 год, чужд был сицеваго понятия, что показуется собранием бывшим в Москве сего года, [жит. Алексия Яковл.] где собственноручно им подписано, далече имеющееся сего понятия. и от собора бывшаго в Москве, в лето 7268 [жит. Алексия Яковл.], и от писма его в лето 7279-е.

2-е, московскаго отца Алексия Яковлевича, которое так же обносится, [в книге Отеческих завещаний, глава 55] писанное к Тимофею Ивановичу, в лето, 7305 [1797], генваря в 19 день.

Сие писмо аще мы и не возмогохом обрести, обаче и сему от вас показанному, был сицеваго понятия исполненный, даст всякое вероятие. Понеже оный Алексий Яковлев, до 7288 [1780] года, сиречь, до посещения Данилова монастыря, чюжд был сицеваго понятия, но оттоле был действително гораздо снисходительнее, и время от времени согласовал себе с показанным от вас понятием. Но сицевое его понятие простирашеся точию, до 7316 [1809] года, марта 20 дня. где он общесоборне приносил о сем раскаяние, на заданное ему от общества християнскаго 6 вопросов. И оттоле уже до дня отшествия [его] света сего, конечне чюжд был сицеваго понятия.

Посему и письмы сицеваго понятия к подтверждению, или коему либо основанию, такожде прияты быти не могут; яко же и следы питерскаго и московскаго миротворения. Что показуется яснейше всего от книги Отеческих завещаний, составленной вами 7313 [1805] года, апреля 26 дня, глава 30. где обретается послание в Сибирь, 7312 [1804] года.

Пункт, 1. На крестах четырелитерное надписание оставляется примирения ради церковнаго, от тоя же главы другаго счету.

Пункт, 10. Староженов за чадородие наказывать и отлучать по разсмотрению усердия их.

Пункт, 14. За купленное брашно полагать, 100, поклонов.

В день Преображения Господня за яблоки, в Пасху за сыр, на Петров день, на праздник Успения Пресвятыя Богородицы, Рожества Христова, и на вся праздники, после часов по 100 поклонов, и прочая.

Вся сия писанная, до конца есть чужда церкви православныя. А наипаче всего, писанный со стороны вашея житейник, о разделе инока Филиппа, исполненный всякаго истины удаляющагося термина.

1-е; Яко бы инок Филипп поречен был от отца своего, [а какого отца духовнаго, или евангельскаго не показуется] что от него миротворных действ не окажется.

Сие сказание исполнено всякаго сумнения, понеже сицеваго человека, он не должен нуждным случаям допускать до дела духовнаго. Аще бысть сие проречение, благодатию Святаго Духа. Аще ли сие проречение бысть точию по единому мнению, то его в такое достопамятство приводити не лепствует. Да и самый злобный дух поморцев, описывая его разделение, внести сего не дерзнуша.

2-е. Яко бы инок Филипп, отца Симеона, папою называл, яко духовну и гражданскую власть приявшу.

Сие проречение аще и сумненно есть, понеже не согласует с житейником поморцев. Обаче и действительны сии глаголы суть, то не подлежат никоему осуждению. понеже Симеон Дионисьич занимал должность проповедника; яко же зримо есть от жития Корнилия благословившаго Даниила Викуловича на духовное правление; Андрея же Дионисьевича на учительство.

Да и вы же сами пишите, яко бы был лист написанный и утвержденный рукоприкладством. чтобы по смерти Андрея Дионисьича, быть настоятелем Симеону Дионисьичю. То Симеон Дионисьич, по возложенной ему обязанности в духовное правление входить не может. Но как увидим ис предыдущаго, что он действительно входил до таких дел, которыя приискренны точию отцу духовному. [да како и лист сей имать написатися, понеже Андрей Дионисьевич преставился гораздо раньше Даниила Викуловича; то почто же было и писать его].

Яко же се; некоторыя духовныя его дети, [сиречь, инока Филиппа] без службы на труды ходят. которую старицу определил замолитствовать, и он Симеон не допустил.

От зде всякому благоразумному, добре зримо есть, как ложь облекается в личину истинны. ни вы ни поморцы, на все его предложения, оправдание Симеона не показуется. а кольми паче потребно, чинить вам ответы на сии пункты, того ради что самыя поморцы пишут; что тамо сие строго соблюдашеся, [чтобы не отправя чин молитвы, не ходить на труды монастырския] сице глаголюще; с велиим опаством сие храняху. Но во оправдание Симеона пишите, яко же вы сице и поморцы глухо и безответно. Того ради сии доводы ваши к подтверждению истины неудовлетворительны, но наипаче зело зазорны, и исполнены всякаго сумнения.

3-е. В едином месте пишите, яко бы инок Филипп, вышел из монастыря за два года с лишком. и мало ниже пишите, яко бы за три года. но самою истинною рещи; и то и другое цели мимо.

4-е. Яко бы по выходе из монастыря инок Филипп; поселился от Алексы[Лексы?] за седмь верст, в Надеждине ските, точию с одною вышеписанною старицею.

Сие сказание не точию вероятию достойное, но и доконца нехристиянское; понеже сицевое дело, яко бы с одною старицею жити, не точию тогда было нелепотно; но аще бы кто ис числа таких духовных лиц, и в нынешнее время кто дерзнул сотворить, и то бы был зазрен от самого последняго лица. Да и самыя злохульныя поморцы, сего написать не умыслиша. Ибо и они пишут, что к нему тогда же многия от скитов и монастыря прихождаху исповеди ради.

5-е. Яко бы братия имели лист, что бы по смерти Андрея Дионисьича, быть настоятелем Симеону Дионисьевичю, и прочая.

Сие невероятно сего ради, яко отшествие от света сего Андрея Дионисьича бысть, в 7238 [1730] лето. а Даниила Викуловича, в 7242 [1734] лето. Да и всем есть ведомо, что правителем монастыря был, не Андрей Дионисьич, а Даниил Викулович. то почто же писать такой лист, егда еще жив есть держащий оный. Да и того ради невероятно сие. что сицеваго понятия и в поморском житейнике не обносится.

6-е. Яко бы инок Филипп с Терентием, из монастыря вышли. Сие и самим вам зделало замечание, о неправильном выходе показании, инока Филиппа. понеже выше сего писали, яко бы он вышел с одною старицею, а зде яко бы забыли, пишите что с Терентием. при конце же списаннаго вами сего житейника, вопреки 4-го, замечания, одобряете его воздержанием. И о сем дозде.

В заключение сего мы вам скажем, почтенныя рачители миротворства, аще воистинну любите мир и правду, или оправдайте се, или принесите плод достоин покаяния. И тем кончится плачь, 155-тилетняго терзания церкви православныя.

Списася 7370 [1862] лето, мая 1 дня.

ПУНКТЫ,

Мирнаго основания братства древлегрекороссийскаго исповедания,

соловецкаго и древлепоморскаго потомства.

предложенныя ко исполнению, братству преображенскаго общества.

По личному и обоюдному нашему собеседованию, о мирном состоянии решения, в неразрывный союз единьства, для твердой памяти вечнаго незабвения, и потомственнаго ведения, мирнаго события основания завещание. о нем же Основатель мира, Предвечная Правда, Спаситель, Господь наш Исус Христос предрече; мир Мой оставляю вам. и вас вси познают, яко Мои ученицы есте; аще мир и любовь имате между собою; его же средостение враждебныя ограды древле бывшия, словом Божиим сошедшим с небеси на землю разорися. и ангели Божии хвалебную песнь воспеша в рожестве Его, слава в вышних Богу, и на земли Мир, в человецех благоволение. сиречь, благохотение. сию настоящаго века, разделением единьства, и погашенную; мы силою Распятаго воспамянити усердствующе. единением Духа, во уповании веры любви и надежды, яже есть союз совершеньства. и всякаго возношения кичащееся, на разум Божий, ударяюще о камень претыкания и соблазна, подражающе Духом смирения, смирихся и спасе мя, по реченному Давыдом. сопрягая вящьшая закону окормление; веру суд и милость. самим Спасителем реченное наставление, которое определяется главнейшим догматом, в разсуждении упования. почему и полагаем в назидании основания нижеследующее предводительное изъявление.

1.

Веру православную в символе изображенную; правила святых апостол, и святых отец, и вся церковныя законы, уставы и предания свтоотеческая писанное и неписанное, кроме недоумения, и превратнаго мудрования, хранить и соблюдать непременно без нарушения, и последовать потомству наставления и учения; соловецких и поморских отец; яко корню благочестия блаженной памяти отцем, Корнилию, Виталию, диякону Игнатию, Даниилу с Тихвины, Досифею, Петру Прокопьичу, Андрею Дионисьевичю. и в Олонской земли бывшим, Михаилу Ивановичу, Спиридону Ивановичу; с прочими в Помории бывшим, Филиппу, Терентию, Матфею, с прочими. и бывшим в Москве, Корнилию, Варлааму, Василию Матфеевичу, и прочим. А равно и в напутьствии отправления божественной службы; совершать богослужения по уставу соловецких отец, и московских российских патриарх. в некоторых же недоведомых темностях, касающихся до чина и обрядов в церковных писанных и неписанных, иметь более доверчевости и повиновения, к старейшинству потомства первоначальнаго корня благочестия, поморских и соловецких отец. в наставлении и учении относительнаго, до предания и обрядов вышепомянутых; по реченному, вопроси отцы твоя, и возвестят ти, старцы твоя и рекут ти.

2.

Первоначальным нашим предводителем Феодосием Васильичем, от создания мира в 7214 [1706] лето, учиненный неправильно, выключая богословных в сем церковный раскол, за четырелитерное надписание на крестах. I.Н.Ц.I.. за старыя еретическия браки, за торжищное брашно, мнимое скверно быти, и за прочия невообразныя святой церкви мудрования. признавать и почитать за сущий раскол, отсекшийся от единьства сочленовения тела Христовой церкви. котораго греха по сказанию Златоустаго [ефесеом, нравоуч. 11] кровь мученическая загладить не может.

3.

В лето от мироздания 7235 [1727], месяца августа в 5 день, при животе любомудрых наставников и учителей церковных, Данииле Викуловиче и Андрее Дионисьевиче, и прочих в поморском Выговском общежительстве, именуемом Даниловом монастыре; бывшее примирение перваго предводителя, московских стран, Игната Трофимыча. и даниловской страны настоятеля, Федота Калинича, и других; признавать и почитать, не за всеобщее и совершенное примирение, которое краткое время существовало, и тем же миротворцем до лет 7271 [1763] оказалось разрешеным конечно. как видится в 5-м ответе, на шесть вопросов, писаных на польском соборе, в статиях, 1, 4, и 45, в житейнике Феодосия Васильевича, в письмах Евстрата Феодосьича, и Ильи Ивановича московскаго; и в соборном отказе бывшем в Москве в лето, 7271 [1763]; идеже соборне никоново на кресте написание похвалиша. Сей мир почитать за разрушимость, яко не бывшим.

После же сего бывшия миротворныя события не всеобщими и совершенными, но единосторонними, яко сии, 1), в лето 7271 [1763] сентября в 1 день, московскаго настоятеля Преображенскаго кладбища, Ильи Ивановича, и Феодора Аникича, с старцем Феоктистом. которое обносится в собственноручной памятной книжице Егора Гавриловича. 2), в лето 7278 [1770], которое обносится в той же. и в предисловии шестивопросоответнаго миротворнаго написания, со стороны нашей, 7316 [1808] года. 3), 7297 [1789] года, генваря в 4 день начавшееся; и совершившееся 7299 [1791] года, апреля в 24 день. которое обносится в книге Завещаний отеческих, во главе 11. 4), в 7312 [1804] года, декабря в 20 день, которое обносится в той же книге Завещаний отеческих, во главе 32.

Сии четыре мирныя события, бывшия с растерзанием церковнаго союзнаго единьства тела Христова; за неимением во всех текущих веках от Христова Рожества, на показ сей надежды упования, ни единаго образца, ни каноническаго показания, еже бы от единьства отсекшаяся малая часть, присоединяя себе раздорствующих без всеобщаго совета, и склонения лиц церковнаго единьства старейших, имела бы признаваться и почитатися единьством тела Христова православною церковию. признаем быти неправильными и незаконными.

4.

О помяновении же первоначальнаго предводителя, Феодосия Васильевича, за содеянное им церковное разделение в Выговском общежительстве, в лето 7214 [1706], сомнение имеем по свидетельству, яже о Арсакии наместнике святаго Златоустаго [в житии, Маргарит лист 179 обор.]. того и по смерти, реша измещем его и с теми всеми, иже в суд приступили к нему епископы. его же имя да не напишется в помяновение вечное. По сей сообразности почитать и сына его Евстрата Феодосьича, и прочих с ним упорно стоящих; ратующих и хулящих, блаженной памяти достойных, отшедших, отца Игнатия соловецкаго и прочих. да не напишутся в помяновение. Аще в книге Завещаний отеческих, во главе 54, и обретается свидетельство, яко бы по прошествии двух лет, после раздела, сиречь, в лето 7216. Андрей Дионисьевич был в Нове граде, и с Феодосием Васильевичем всякое согласие имел, и прочая. но сие свидетельство в дело миротворения привести недостоверно есть, по нижеследующим притчинам. 1). того ради, что в составленном со стороны вашей о нем в житейнике видно, что он из пределов Поморья, возвратился в пределы Польския, а не в Нова град. что подтверждается и житейником составленном о нем, со стороны новопоморцов. прибытие же его в Нов град, аще и показуется, обаче не из предел Польши, а Великолуцких; и то не в 7216 [1708]. но в 7219 [1711] лето. 2). Того ради, что в 7217 [1709] лето. от Андрея Дионисьевича, бысть ему послание увещательное, к первобытному его положению и единомыслию. в Польшу, а не в Нов град; на которое бысть написан ответ от его личности, в 7218 [1710] лето. То отсюду является две притчины сумнения. 1. Яко аще бы был мир, у Андрея Дионисьевича, с Феодосием Васильичем. то бы где либо обрелося об отъезде Феодосия Васильевича из приделов Польши, и прибытии в Нов град. 2. Аще бы был совершенный и законный той мнимый мир церковный; то почто бы туне писать оное послание, и почто бы отвечать, и оное исполнено всякаго несогласия.

5.

Иконы писанныя и меднолитныя от подозрительных иконостроителей изображенныя и починенныя, находящиися во многих странах в домах, на разсмотрение и разобрание оных, избрать по сей части сведущих людей. и все оныя иконы, по разобрании и разследовании, оставить от почести поклонныя, или променять внешним; но хуления и гаждения над оными ни малейшаго ни чинить. содержателем же оных икон, добровольно и благосклонно до разсмотрения допущать, и претензии на разсмотрителях не искать; но за благое дело сие почитать и признавать. Не следующих же сему упорных духом, по определении законнаго показания, от лика верных сообщения отлучать. Находящиижеся неизвестными, в разследовании от коих именно иконостроителей изображены и в кое время, и от коих рук и времен, переходя от рук в руки. от древних ли художник, или по падении изображены; таковыя оставлять в судьбы Божия. и должную им почесть по закону не воздавать, и не хулить.

6.

Образ изображения Пресвятыя Богородицы Скорбящия, за неимении онаго в подлинниках, и древних образцах изображения. отселе и впредь от поклонныя почести оставлять, и иконостроителям писать и отливать воспрещать; всем странам о сем дать знать, дабы никто поклонения не чинил, и гаждения и хуления не произносил.

7.

Иконы от внешних, и инославных, и от своих иконостроителей, под подозрением жительствующих. аще и по существу писанныя или отлитыя; таковых отнюд непринимать, и поклонения им не чинить и не хулить. И в руки внешним икон християнских, разве познанных не предавать. а равно входя во инославныя и внешния домы, без известнаго ведения, иконам трех поклонов не полагать, и сему никого не учить.

8.

Книги печатныя и писменныя, от рук неверных и неизвестных, аще и зело добре и во всем согласны будут с преданными от церкви православныя; обаче за сравнительную святыню почести их с иконами; за божественную службу, яко же соборную, сице и келейную не употреблять. в прочее же время произволяющих к почитанию пению и учению не отревать.

9.

О вашем [исправлено карандаш. - О чине] иноческом пострижении, мы сумнения не имеем; О своем же за разнообразное действие сумневаемся, но обаче до обыскания явственнаго свидетельства, обоюдно почитать, и не подозревать. [статья перечеркнута каранд. и надписано: до обыскания]

10.

Во время гонительных случаев древле и в настоящия времена, по необходимым нуждам, за соблюдения благочестия и чистоты самоубившихся; имена их в помяновение употреблять, и с православными причитать. выключая же богословных вин, самоубийству никого не поучать, но воспрещать.

11.

Зазорным лицам, мужескому полу с женским единодомовно наедине не жительствовать, разве матери сестры тетки и престарелых лет, отнюд не держать.

12.

Ельлинския и внешния обычаи и обряды истреблять; власы по християнски постригать. галстуков, манишок, желеток, полталонов, брюков; вытяжных смазанных кривых сапогов, непристойных разнообразных модных одежд, как мужескому, равно и женскому полу отнюд не носить. А в молитвенныя домы, или инде где либо, на общую молитву отнюд не приимать. такоже и о пищи и о питии, по разсуждению нынешняго последняго, и горькоплачевнаго времени, в лишении святыя евхаристии и брака, и прочих пространных таин, и по уподоблению воздержательной жизни Ноя в ковчеге, во дни потопа; по преданию поморских преждебывших отец наших; воздерживатися от мясоядения, и виннаго пития [статия 15 и 43]. Такожде и от прозябших вновь, безместных сластей, чаю, сахару, кофею, и других сластей, от рода християнскаго истреблять, и в трезвости себя сохранять, и богоугодно житие свое провождать, и истинным покаянием каждому свою смерть, или Христово пришествие ожидать.

13.

По разнообразным духовным божественным службам. по молебнах или понахидах. желающии удовлетворить гостей трапезою, на устройство оной, стряпши должны призывать благоговейных лиц; и составлять пищу с благоговением и с молитвою. деланнаго головнаго сахару и патоки, ни в какую пищу не употреблять, по притчине имеющейся в сахаре животных крови, которая служит вместо души, у каждаго животнаго. поэтому самим Богом, в естественном и благодатном апостольском и церковном законе строго воспрещено. вкусивый от сих, да не причастится лета, два и канон. Номоканон, правило, 131.

Внешних же кандиторов поваров и стряпух, для уготовления пищи или трапезы, отнюд никогда не призывать, и за мнимое удовлетворение приятнаго вкуса, и наслаждение в пищи, впряженной с нечистотою, суеверия и нечестия. Не уподобиться бы древнему Исаву, продавшему первеньство свое за ядь некую, и древним июдеом, возгнушавшимся небесным ангельским хлебом манною. за желание смраднаго египетскаго брашна, роптанием погибшим в пустыни. Ибо кое участие свету со тмою, и кая часть верному с неверным. горе человеку тому им же соблазн приходит; яже вместо мзды, не поучить бы жернов осельский, на выю свою, гостиннику с гостями и стражами хранящими винограда за оляденение; аще погружается в пучине морстей, за соблазн единаго от малых сих, по Господню словеси; кольми паче за многих. генерально за лакомство, чревобожныя утехи, сия соблазны до конца истребить.

14.

Новоженов и внешних неприобщенных, при службе с лестовками стоять не попущать, и не кадить, и свещи им в руки не давать, молебнов за них не петь, и на жертву ничево ни принимать, и на праздник Христова Рожества, Христа у них не славить. со внешними и со инославными, в одном дому, по разным углам, без твердой преграды не молитися.

15.

Обращающихся в покаяние явно испадших лиц, келейно и тайно не принимать и не разрешать. но по определению церковных правил, поставлять на месте перваго степени плачющих, послушающих, припадающих, и молящихся с верными, проходя степени все по окончании епитимии, во всем приобщать церковному лику верных.

16.

Иже до познания православной веры, приявших браковенчание во внешних церквах, и приходящих к православию, за неимением священных лиц; по уподоблению девьственнаго пребывания Ноя в ковчеге во дни потопа, поучати на чистое житие; падших же явно, приимати в церковь на покаяние, с распустом союзнаго их сожития.

17.

Християн спрягшихся каковым либо образом с неверными. аще неверная часть познает путь истинный, или падшее лице восхощет приити на покаяние. то прежде даже не расторжется союзное их сожитие, не принимать неверное лице ко крещению, а верное на покаяние.

18.

Християн приявших венчание во внешних церквах; или инако како либо спрягшихся, не принимать в церковь на покаяние, без расторжения союзнаго их сожития.

19.

Бывший собор в Польше, в лето 7260 [1752], месяца октября в 1-й день, в них же содержащееся заключения хранения сего учения и предания до скончания века. как о титлах, о браках, о торжищном брашне, и о молитве за оны; и о прочих преданиях Феодосия Васильевича, с прочими собратиями; так же и раздел его с поморскими отцами; со Андреем Дионисьевичем, и с Даниилом Викуловичем и с прочими пустынножителями, почитать бы за самый истинный и правильный раздел. о чем и книга Отеческих завещаний, соборующими сочинена, и рукоприкладством оными утверждена; в нерушимо и неизменно хранение, все то что предали, Феодосий Васильич. а не повинующихся тех учению, и отметающих их предания; как поморцы и филипповы, таковых уклонятися, яко мятежораздорных и толкователей. сие почитать за истинну, и хранить неизменно. А поморских отец учение вовсе с хулением отмещем. что последи прображенскаго общества настоятели подписанием своих рук скрепили, и Илья Алексиевич Ковылин, к сему соборному Отеческому завещанию подписался. А ныне имеется по всем местам в оной книге скрепа утверждения и хранения. почему ныне мы желающии мирнаго благоухания с вами насладитися; все оное вышепомянутое, несообразное восточной церкви учению определения; как Феодосия Васильича, равно и в книге Отеческих завещаний находящимся; и подкрепили оной рукоприкладством, яко незаконно и неправильно бывшее, испровергаем и уничтожаем, и яко памяти недостойное за возмущение и соблазн несмыслящих, конечно отвергаем, и вечному забвению предаем; следующих же сему соблазну, и непокаряющихся от церкви отлучать будем.

20.

Родителем детей своих некрещенных, находящихся в возрасте, не поучать и не благословлять, прежде женитися, а после креститися. но с юных лет креститися и воспитовати во всяком наказании и наставлении християнскаго закона, в целомудрии и чистоте провождати вся дни живота их. се есть угодно Господеви, еже пещися о спасении их. а не о растлении цветущия юности мирострастием.

21.

Во все посты, в Петров, Госпожин, и в Филиппов, по уставу церковному, аллилуйныя земныя поклоны, по чину великаго поста непременно отправлять.

22.

В торговых банях вкупе со внешними не мытися, равно и во время вечерни подпраздники кто мыется, то неомовен будет во веки.

23.

Прочая же постановления и обряды, церкви православны, аще за краткость зде и не написуются; обаче не туне и без внимания до времени подобнаго оставляются. яко же се о обязанности настоятелей, и истреблении явных блудников и отступников, и прочих явно согрешающих и кающихся. сия вся обретаются в книге Отеческих завещаний.

Такожде о молении за брашно еретическое [глава 11]. О каждении [глава 30]. О положенных вирвицах после вечерни, по утрени, в праздники и воскресныя дни [глава 31]. О лишении святыя литургии [глава 32]. О молении за всякое нововозрастшее плодоприношение [глава 33], и прочая.

Сия всяко обретаются в книге жития християнскаго [63]. О всем том по заключении сего боголюбезнейшаго мира, отцем духовным, и учителем церковным сообразоватися с потомством начальнаго определения отец; и на оном незыблемо основать и утвердить церковную храмину, в единстве понятия и учения, древлеправославнаго корня исповедания.

24.

Посему завещанию миротворнаго основания, обещаемся все вышеписанное предложение по определению, святыя древлегрекороссийския церкви, и по сообразному оной, соловецких и поморских отец установлению, помощию всесильнаго Слова Божия, без ущерба следовать и выполнять. Не слушающих же и не повинующися, с таковыми по евангельскому предписанному закону поступать [от Матф. зач. 71]. Аще кто преслушает церковь, да будет ти яко иноязычник и мытарь.

25.

Окончательное заключение, ко определению мирнаго совещания.

По признании всех вышепомянутых притчин, раздела церковнаго, и частных миротворных событий; не присоединяющихся законно к церковному телеси, за разчленения, сечением от единства всеобще мы прибегаем, и обещаемся выполнить без ущерба, требуемый долг Христовой церкви. в которой паки, как к естественной матери, по правильному ея определению, с достославным покаянием, с залогом обета; чрез довлетворения, по ея милосердому снисхождению, в едино тело неразрывно вечнаго спасения, безвозвратно соединяемся, и сохраняем сие свято и нерушимо в род и род; в славу триипостаснаго Божества, Отца и Сына и Святаго Духа обещаемся. и к выполнению евангельскаго блаженства поучаемся, по реченному от Христа. блажени миротворцы, яко тии сынове Божии нарекутся. Благословим Отца и Сына и Святаго Духа Господа, во вся веки, аминь. К сему завещанию мирнаго союза, мы нижеименованнии своеручно подписуемся.