Обаче не подобает единодомовно жити и гостеприимствовати.

Аще убо родители оныя и мирских детей брачили, обаче сами быша християне. А потом с сыновьями единодомовно жительствуют, дочерей же к себе в гости приимствуют, и при том в полноте церковней пребывают. Для пресечения же таковаго беззакония, и написаны быша в сентябре месяце прошлаго 7403 года три статии, коими и определяются сице.

Аще котории с теми сыновьями пребывают единодомовно, а дочерей принимают в гости; таковых родителей отрешать всякаго с християнами общения. Аще ли восхотят исправитися, и быти в полноте церковней; то чтобы первее вышли от женатых ими сыновей в другия храмины; хотя бы и на том же дворе, но под разными крышами. Затем наложити на них две четыредесятницы поста, с отлучением и прощением, и год или два епитемий; и по исполнении онаго, разрешать их в полное с християнами общение. А котории по сущей скудости не возмогут поставити особых помещений, таковым делается уступка: По исполнении канона, принимаются в оглашенный чин, молитися с християны, а питатися по себе. Дозде из статей.

Но закоренелыя и мирострасныя обычаи вкрадшияся в сердца маловерных и упорных людей, трудно есть в краткое истребити. Ибо нецыи яве и жестоко оным статиям воспротивишася; А наипаче тупоумнии и несмысленнии Кокшенския жителие; по получении оных, не замедлили зазрети их, и написати по своему смыслу, грубое на них возражение. Причем не усомнились и порещи их небывалою новостию. Таковое по груборазумию их противление, и понудило нас убогих, для желающих веру православную, обычаи же и предания благочестивых древлепоморских предков наших сохранити, и души своя спасти, изложити кратко сие пояснение.

Оныя убо паки статии, никакоже отнюд не противны, ни божественному писанию, ни отец наших преданию. Понеже убо всякий из нас ведает, что каждый християнин неуклонный имать долг, ближняго своего пользовать, и от грехов отводить. О чем великий апостол Павел сице завещавая глаголет [к римл. зач. 116]; Должни есмы мы сильнии, немощи немощных носити, и не себе угождати; кождо же вас ближнему да угождает, в благо к созданию. И паки [коринф. зач. 146]. Никто же своего си да ищет, но яже ближняго кождо. И еще паки [солуняном зач. 272 и 273]. Сего ради утешайте друг друга, и созидайте кождо ближняго, яко же и творите. [ниже] Повелеваем вам братие [зач. 277], о имени Господа нашего Исуса Христа, отлучатися вам от всякаго брата безчинно ходяща, а не по преданию, еже прияша от нас. [ниже] Аще ли же кто не послушает словесе нашего, посланием его сказуйте, и не примешайтеся с ним, да посрамится. И паки той же [Тимоф. зач. 286]. Согрешающих пред всеми обличай, да и прочии страх имут. Божественный же Златоуст, пространнейши о том сице завещавая глаголет [беседы апост. ефесян. зач. 229]. И не приобщайтеся, рече, делом тмы неподобным, паче же и обличайте. яко бо тай бываемая от них, срамно есть и глаголати. Вся же обличаемая от света являются. Услышите молю, вси елицы не хощете туне ненавидими быти [лист 1759 обор. обличать брата благопритно есть]; похищает, и не обличаеши ли, но боишися ненависти: [ниже] обличи брата, приими вражду, любве ради юже в Христа, любве ради яже к нему; возбрани ему в ров отходящему. Еже бо трапезы приобщитися, и глагол благих и привета, и пресыщения, не зельныя любви есть. Таковыя другом нашим даруем дары, да души их извлечем от гнева Божия, в пещи злобы возлежащих их зряще, воставим. но не исправляется рече, но ты свое сотвори, и дал еси ответ Богу. не скрый таланта. Сего ради слово имаши, сего ради язык и уста, да исправляеши ближняго, безсловесныя токмо не печалуют о ближнем, ниже слово имут некое о безсловесных. Ты же Отца нарицая Бога, и брата искренняго, зря его бесчисленная творяща злая; благодать юже от онаго пользы ради предлагаеши ли. Ни молю, ни единоже есть сице дружества знамение, яко еже не презирати согрешающих братий. Видел ли еси лихоимствующия, возбрани; видел ли еси обидимыя, заступи; не онем но себе первому угодил еси. И паки [лист 2503]. Согрешающих пред всеми обличай, да и прочии страх имут. сиречь, не скоро отсецай; но со многим опасением вся много испытуй. Егда убо увеси яве, зело казни, да инии уцеломудрятся. яко же просто осуждати вредно есть, сице еже не казнити явленныя грехи, путь есть подаяти иным, еже таяжде творити и дерзати, обличай же, рече, являй яко не просто, но с отсечение. тако бо и прочии страх имети будут. И инде той же [Маргарит лист 158]. Да не речеши к себе, мирский человек есмь, жену имам и дети, и сия иерейска суть, сия иноческая; не бо самарянин он сицевая рече; где ныне фарисее, где июдейстии учителие; но яко же некий лов великий обрет, тако восхити прибыток. И ты убо егда видиши кого требующа врачевания, или телесное, или душевное, неглаголи к себе, чесо ради он сица, и он сица того не уврачева; но премени его от болезни, и не истязуй оных вины небрежения. Аще ли нецыи о всем вышеписанном вознебрегут, и не восхотят обличати и исправляти братий своих, таковым божественное писание сице грозно воспрещая глаголет [Никон Черныя горы слово 3]. Аще истину скрыем, ияже имать суть на слабость советуем. никоеже различие имать ложных пророк, иже прельщаху люди, и желаемая комуждо глаголаху. Паки Златоуст. Не зрите ли [глаголет] над таинствы, что вопиет часто диакон. возлюбим друг друга. како вручает опасное о братии ваших истязание. [ниже]. Аще ли преслушаете [лист 81], или некая от иже таковая смеющих укрыете, яко клеветницы зельнии представятся вам. И инде [Потребник больш. лист 700. Номоканон прав. 165]. Аще кто сведе согрешающаго [глаголет] и могий возбранити греху, а не возбранит. или обличен быв от епископа, скры; толико время и той запрещен будет, елико же и грех сотворивый, по 71-му правилу Великаго Василия.

Пристежение. Се же разумно да будет, яко же людини, или духовнии, иже от сожительства и пребывания вкупе, сведят, или слышат прочих грехи и беззакония, вреды и тщету творящих; тогда любовию исправления, и спасения ради ближняго, должни суть предстателем и старейшим возвестити, да препнутся от греха и зла оного. да убо утаенныя грехи души не погубят, ниже падеежа какова не наведут. но творяй грех исправлен же сый да спасется. И Василий Великий глаголет [О Постничестве, глава 39, лист 138 часть 2]. Всяко согрешение воспоминати подобает настоящему, или от самого согрешившаго, или от познавших. Лучьше же обличение со дерзновением крыемыя дружбы. ниже убо ин иному да скрывает, да не братоубийца будет. Сие же все вышеизложенное божественное писание, повелевает каждому християнину ближняго своего обличати, и от греха отводити, и исправляти. А кольми паче отцы присных детей своих, еще более должны суть, не токмо воспоминати и обличати за беззакония их, но и запрещати; понеже и власть имеют над ними. яко же и святоотеческое предание сице завещавает о том.

Глаголет убо великий апостол Павел [ефес. зач. 232]. И отцы не раздражайте чад ваших, но воспитывайте их в наказании и учении Господни. Святый же Иоанн Златоустый, на оныя апостольския слова сице беседуя глаголет [беседы апост. лист 1799]. Но воспитывайте их [чад] в наказании и учении Господни. Зриши ли, яко духовным сущим, и плотьская последовати имут. Хощеши ли да будет сын покорив; изначала воспитывай его в наказании и учении Господни; да не вознепщуеши быти излишнее еже божественных писаний тому послушати. Тамо бо первое услышит, чти отца твоего и матерь твою. тем же тебе ради сие бывает. Да не речеши сие иноков есть. Еда бо инока творю и; несть нужда ему быти инока. Почто боишися боязни, многаго прибытка исполненыя; християнина сотвори его. Наипаче бо мирским нужно есть, еже отсюду ведати учения; наипаче же детем. [ниже] Како бо несть безместно, в художество убо отсылати, и в училища, и вся творити о сем; в наказании же и учении Господни не воспитывати сицевых. Сего ради мы первее плоды восприемлем дерзския, невоздержныя, непокоривыя, гнусныя, воспитающе дети. Да не творим убо сего, но да повинуемся блаженному сему наказующему, воспитываем их в наказании и учении Господни. дадим им образ от перваго возраста, в чтении писания творяще их упражнятися. Увы [лист 1800]; яко часто сия глаголя буесловити непщуюся; но обаче не престану еже мое творя. [ниже] [лист 1801] не ищи како благоискусна соделаеши во учениях внешних, и славна сотвориши. но пецыся како его научиши пренебрегати славу еже в житии сем. оттуду бы светлейший был. Сия и нищему и богатому мощьно сотворити. [ниже] Не возбраняя наказывати сия глаголю, но возбраняя онем самем внимати, да не вознепщуеши яко иноку токмо, сих требе есть наказании, яже от писания: наипаче бо сих требе детем, хотящим в житие сие приходити. яко же бо корабльнаго устроения, и кормчия, и исполнения корабчиев, не сей требует иже выну на пристанищи стоя, но иже в мори плавающии и присно. Такожде и мирянин и инок. Сей убо яко же в пристанище есть невлаемом [лист 1802], житие безвещественное живый, и всякия бури свободное; сей же выну в пучине есть, и плывет посреде пучины, многими треволнении боряся. [ниже] [лист 1805] Таковыя прочее уготовляем дети, тако яко возмощи ко всем справитися находящим, воспитываем их в наказании и учении Господни; и многая нам соблюдается мзда; Аще бо человецы творяще образы царския, и иконы пишуще [лист 1806], толику честь восприемлют. мы царский образ укрывающе [образ бо есть Божий человек] не безчисленных ли насладимся благих, еже по подобию воздающе. се бо есть подобное, душевная добродетель, егда отроки благия быти накажем, егда не гневливы, егда не памятозлобивы. [сия вся суть Богу свойственная] Егда благодетельны, егда человеколюбивы, егда научим настоящая ничтоже вменяти. Сие убо нам дело да будет, и себе и онех воображати и управляти в потребное. Зане коим дерзновением станем пред судищем Христовым. Аще бо епископства не достоин есть дети непокоривыя имеяй, много паче царства небеснаго. Что глаголеши; аще жену без чину имамы, аще и дети, испытания подъимем ли; ей, аще не с опасением яже от себе введем. Не довлеют бо своя добродетели ко спасению аще бо един талант не вдавый, ничтоже приобрете, но и тако мучим бывает; явленно яко не довлеет своя добродетель ко спасению, но требе есть еже инаго. Тем же многое да творим о жене попечение, мног и о детех промысл; и внегда себе, и внегда оныя управляти, Богу молимся, яко да поможет нам дела. аще увидит нас о тем пекущихся, о сем печалующих, поможет; аще же ни едино творящих слово, не даст руку. Не бо спящим нам, подает помощь Бог, но и самем труждающимся. Помощник бо, но не празднующим есть помощник, но и тому делающему. Премудрый же Исус Сирахов сице глаголет о том [глава 30]. Любяй сына своего участит ему раны, да возвеселится напоследок свой. Кажай сын свой, насладится последи о нем, и посреди знаемых о нем похвалится. [ниже] Не даждь ему власти в юности, сокруши ребра его дондеже млад есть, егда како ожестев, не покорит ти ся накажи сын твой, и делай о нем, да не в безстудие его поткнешися. И в четвертых царствах тако пишется. Бысть некто священник во Иеросалиме именем Илия смирен кроток, угодник Божий на всяко дело благо. Сий же бе двою чаду отец. И видя ею на зло шествующа, и не казняше их, ни возбраняше им, ни учаше боятися Бога, и казни ни нанесе детем своим жезлом, но волю им бяше вдал. они же в буести и в ненаказании, все злое творяста. И рече Бог Илию отцу их; понеже не казнил еси чада [сыны] своя добре. ныне умрета сына твоя мечем, и ты сам, и весь дом твой погибнет, сыну твоею деля; понеже не казнил я еси добре боятися. И инде [Пролог, июня, 5]. Слышасте ли братия словеса сия, яко Илию тако сотвори Бог в ветсем законе; да что подъимем мы в новем суще законе, не учаще детей своих на добро. Но вы братия и чада любимая, учите дети своя измлада, всему Божию закону, и доброму нраву, да страх Господень приемше, не опечалят вы на старость вашу. Аще ли не послушают тебе дети твоя, не щади на них лозы, яко же премудрость Божия глаголет. до шести ран, или до двунадесяти ран даси сыну. Аще ли велика вина, и ты двадесяти ран даси. Братие наказуйте детей своя боятися Бога, а злых дел остатися, да не зле погибнете. О сем Иоанн Златоустый глаголет; Иже детей своих целомудрию не наказует, той горее разбойник осудится. разбойник бо тело смерти предает, а он душу.

Да внимаем же сему Господа ради прилежно, яко тамо повелеся комуждо, о спасении ближняго попечение имети, но точию обличати, и любовно советовати, еже отстати греха, или возвестити старейшим и более ничто же. Зде же иначе; родители убо обязуются, не точию детей своих от грехов отводити; но и спасению и всякому добронравию их учити: ибо дети от самого рождения и при родителех находящеся, тем тии и видят вся движения и вся начинания их; а от сего и удобно могут, от всякаго дурнаго и гнуснаго начинания отводити, а ко всему доброму приводити их. И яко же воспитывают их телесно, сице должны совоспитывати в них и страх Божий, и ведение божественнаго писания, и добрый нрав и всякия добродетели. Понеже родителие Богом учинени над детьми своими; и господие и старейшины и игумени, и власть дадеся им от Бога, не токмо учити, но и телесно наказовати. Того ради и не имеют они ни единаго ответа или оправдания рещи, яко бы не могоша.

Зде же паки лишше подобает нам внимати писанному. Аще кия родители детей своих не научают страху Божию, и божественному писанию, и не приводят их к Богу; таковыя яко же мы выше видехом, бывают горши разбойников, и лишаются царства небеснаго.

Что же подобает рещи, и како судити о тех родителех; иже не токмо не приводят детей своих к Богу; но еще с полным своим тщанием и желанием отводят от Бога, и конечной пагубе предают; Сиречь, неверных детей своих, не точию не воспитывают по християнски, и не приводят их в познание истины; но еще конечно и навсегда лишают того, совокупляюще их внешним браком. Но не рекут ли нам зде нецыи, суемудрое разсуждение имущии невегласи; Что де по настоящему временю, мы их совокупляюще оным браком, отводим от растленнаго жития и развратнаго поведения. Сие еже отводити от таковаго гнусства, добре и нужно есть, но не таковым нравом, но предупреждати подобает их от того, яко же святии отцы научают нас, а наипаче божественный Иоанн Златоустый, страхом Божиим, учением писания, и приучением к добродетели. Аще ли же браком тем мнятся, от гнуснаго жития избавити детей своих, таковым весма прилично есть предложити притчю сию. Нецый идоша и видеша человека углебоша в тину до колену, и приидоша ему помощи, погрузиша его до выи. Тако и сии сотворяют чадом своим. О качестве же сего преступления оных родителей и о наказаниях за сие им, мы убозии разсуждати и определяти не дерзаем; но по долгу християнскому обращаемся к божественному писанию, и благочестивых предков наших завещанию сице пишущему о том.

На новый сей отступнический брак [самобрачным ответ 7, лист 467], аще коего православнаго християнина сын или дщерь восхощет прийти; и таковым родителем, мы завещаваем; чтобы они чад своих, сице на отступнический брак изволяющих, елико возможно наказовали, и от таковаго беззакония возбраняли и отводили, а не на воли бы их оставляли. Понеже родителем святое писание заповедует, имети о чадех всегдашнее попечение, не токмо о воскормлении их телесном, но паче о спасении их душевном, и о соблюдении душевнаго их здравия, елика силы пещися. Аще же коих православных християн, чада свою волю вземше, не восхотят благаго родительскаго наказания послушати; и на известную души своея пагубу восхотят, на сицевый отступнический и скверный брак прийти, или на иное кое беззаконное сожитие устремятся, и на таковое скверное их изволение родителем помогати, и соизволяти, и на зговоре и заручности их быти. всячески душевредно, и зело богопротивно есть. Понеже где бы должно им возбраняти и воспрещати, и от беззакония чад своих отводити; они же тамо на беззаконие чадом своим, соизволители и потакатели явятся, и сим всяко повинни греху чад своих таковии родителие бывают. или еще вящьший грех согрешающих чад своих приемлют. Дозде отец наших. И святый Златоуст подтверждая сие тако глаголет [беседы апостол. рим. зач. 81]. Не точию бо сия творят рече, но и соизволяют делающим. лютейше убо первое положив и непростительное. ибо грех похваляяй, паче согрешившаго много лютейши есть. И паки [беседа 5. лист 59; там же лист 2512, зач. 287]. О согрешенных онех, и ты казнь восприимеши начало подавый, и мимошедшим грехом, и хотящим быти, оставль бо первыя неказненно, повинен будеши и будущим. Подобно сему и Гедеон епископ Львовский тако же пишет [из книги Ключ Разумения, слово на Рожество Христово]. Ибо двоякий грех есть, един наш властный, еже мы сами творим. а другий его же иный человек творит; единако и мы того чюжаго греха бываем участниками; егда бы кто грех творил, а мы бы ему благословили тое творити, или позволили, или научили, или принаразумили до того. Ниже, Или не возбранили его от того могуще возбранити, или похвалили ему то, и не хулили и не карали его за тое. Тогда аще и иный учинит кто той грех единако и мы того чюжаго греха бываем участниками. И инде [Катихизис мал. лист 56 обор.] Вопрос. Может ли человек быти причастник чюжих грехов; Ответ. Может. Егда кто могий кого от греха отвести, и не уведет. Такожде кто не накажет имея силу к наказанию. Глаголю же, господин раба и подданнаго, отец сына, муж жену, и всякий начальствующий подначальствуемаго. Такоже кто дает кому возбужение ко греху яковым любо образом, причастник есть греха того.

Сим святоотеческим писанием, и предков наших преданием, зело ясно показуется: Что не легкое, но весьма тяжкое преступление родителей тех, кои брачат аще и мирских детей своих. но непщуем: никакоже меньши и легче быти, от еже и християн детей своих брачющих. Понеже и божественное писание, и отеческия наши статии не разликуют сего. Посем лепо есть показати образ наказания, и количество епитимии им за грех той. яко же священная повелевают правила. Татем приятель [Номоканон прав. 46 и 47], яко тать запрещается. Разбойник, и разбойником приятель; яко убийца запрещается. И паки [Номоканон лист 671]. Аще жена исходатаит кому блуд, и та яко блудница запрещается. И инде [Василия Велик. прав. 30]. Восхищаяй три лета да припадает. От толкован. Се же правило наводит и се еже восхитившему, и помогшим ему на восхищение, три лета вне молитв быти, и с припадающими сочетанным. Обаче же се запрещение дается им, потом егда девицу поставят у своих; инако бо не будут прияты в церковь. И паки инде [4 вселенскаго собора правило 27]. Причетник восхищая жену, да извержется. мирский же человек да будет проклят, и вси помогающии ему. От толкован. Аще ли же есть мирский человек, и помогший ему словом и делом на восхищение девицы, да будут прокляты, дондеже восхищенную девицу, аще есть обрученица, да поставят ея у своего обрученаго. Подобно сему, и 95-е правило, 6-го вселенскаго собора заповедает. Восхищающии жены на брак, и действующии с ними, и помогающии им; причетницы убо да извергнутся, мирстии же человецы прокляты да будут. От толкован. Яко дондеже восхищенную девицу, не поставят восхитившии ю, аще убо есть прежде обручена кому, в своем обручении, аще же есть праздна, у родителю ея, причетницы убо извержения, мирстии же человецы суще проклятия не избегнут. Зонарь, глава, 163. Таковым [епитимия] три лета, поклонов 66 на день.

Зде никто же отнюд да не пререкут вышеписанному, яко оныя правила не прямо на брачющих мирских детей своих написаны. Но аще они и уподобительны, обаче весма приличны к тому и приискренни. Таковыя убо свидетельства, не точию в настоящее последнее время, но и в цветущее еще благочестие, церковь православная приимала; яко же преподобный Матфей канонист сице пишет о том: Аще писание [рече] не лежит [состав е, глава 4], закон сохранити подобает навычение и обычай. Аще ли и сего есть оскудение, последовати подобает, иже множае приближающимся, и уподобление имущим ко искомому. Аще ли же ни се будет, разумнейших вкупе и множайших совет да держится.

А на основании вышесказаннаго божественнаго писания, и правил, и отцы наши такожде повелевают о том. Отец инок Феодосий Ярославский, в послании своем в Кимру сице пишет. Слышно нам в вашей стране новопоженившихся, отцы и матери вкупе живут с новопоженившимися во едином дому, а долженствует им особливо, хоша на том же дворе, да особливыя иметь им храмины. И то тем отцам и матерям сей чин соблюдати; которыя не имели своему сыну женитися, а дочери своей замуж итьти, никаковаго совета с ними о женитве не имели, ни о невестах не вопрошали, и никакова большаго, или средняго или малаго к беззаконному браку не причастны, а только с ними во едином дому жительствуют, то и тем разшедшимся в разныя домы, молитися вкупе с православными християны, а дондеже не разыдутся новожены от християн в разныя домы, то повременить им отцам и матерям с християнами вместе молитися, дондеже разыдутся, тогда примирятся. Дозде ис послания.

Не не рекут ли нам паки нецыи. яко де послание сие инока Феодосия, писано о новоженах християнах, а в статиях тех, определяются родители за мирских детей. Отсловствуем. Сие верно, что в послании поминаются дети християне; но мы выше писахом, что внимати подобает нам писаному, такожде и зде повторяем и просим; не мимоходом, но с прилежанием, нужно внимати и писаниям и действиям родителей, над детьми християнами и мирскими. И аще мы с надлежащим вниманием и безпристрастно будем вышеписанное чести и разсуждати, тогда мы обрящем сих родителей, у коих дети мирския, многое виновнее тех, у коих дети християне. Но прежде чем будем показывать о сем, нужно предложити приклад таковый. Рече Господь, не уведевший раб волю господина своего и не сотворивый, биен будет мало. Великий Василий в книзе своей О Постничестве, пишет о сем тако [глава 140, лист 184. и Никон Черныя Горы, Тактикон, слово 27]. Неуведевший дабы волю господина своего и не сотворивший; но с неведящими вменятся, но паче ведящих и не сотворивших осудятся. Понеже яко аспид заткнувши уши свои, еже не слышати слово Божие, и не хотяще уведети. Дозде Василий. Посему тако и родителие, брачившие мирских детей своих, оказываются виновнее живущих идинодомовно с поженившимися христианами детьми своими. О них же отец Феодосий пишет. Понеже сии родители, о них же и статии тии написаны быша, их же ради и настоящее изъяснение нами изложися. Первое; Аще и мирских детей своих, но женили сами; и всякое промышление же и тщание и полное попечение, к тому беззаконному браку прилагали. Оныя же родители, аще и християне их дети быша, обаче оженились без малейшаго участия своих родителей, котории были от всего того душепагубнаго содействия и совета свободны. Второе; Аще бы и нимало никоего участия в беззаконном том мирских детей своих браке не имели, тогда бы они по завещанию святаго Иоанна Златоустаго были бы горее разбойников, и лишены царства небеснаго, яве, яко и вечную муку наследовали бы, за ненаучение детей своих страху Божию, и не привели их в познание истины.

То убо ли сии родители за сии вины могут оставаться без покаяния. Аще бы и дети их мирския брачились сами; без малейшаго своих родителей участия; или уже должны они оставаться в чину, и равнодушно ждать себе вечныя муки; яко же нынешнии сердоболи и заступники их, оную участь сострояют им. А не паче ли по завещании православныя церкве, и по долгу християнскому во спасение душ своих, должни они за таковый тяжкий грех свой, принести Богу и церкви подобающее покаяние. Они же вместо покаяния, к первому преступлению своему несравненно большее приложили еще и другое беззаконие. Ненаученным ими страху Божию, и неприведенным ко истине детем своим, они состроили и исходатаили вечный блуд, и еще далее и навсегда отдалили их от Бога. И после таковаго страшнаго сугубаго преступления своего, остаются равнодушны без покаяния и творятся правыми. вышереченнии же их сердоболи потворствуют им в том и поблажают; и безтрудное и безприскорбное обещают им спасение. О увы горе; до каковых времен мы грешнии достигохом; в ня же нигде же видится, еже бы здравое советование и на душеспасительныя подвиги подавалося направление, и еже по настоящему последнему и скорбному временю, покаянием и слезами и терпением скорбей и напастей, спасения своего достигати, друг друга учити бы и наставляти, нигде же слышится. Но повсюду кождо ближняго своего, напаяют пития мутнаго, и в ров погибели поревают, глаголюще сладкое горько; а горькое сладко; о них весьма подобныя речения в писании имеются. Таковии [рече] власы ваши умащают, а души ваши сокрушают и погубляют. и паки, слепец слепца аще водит, оба в яму впадутся. О сем дозде. На предлежащее возвратимся.

Како же тии родителие. иже беззаконным браком детей сводят и без подобающаго покаяния и епитимии оправдятся, и вечнаго мучения избудут и жизнь вечную получат; не вемы. Аще убо за праздное слово, ответ дати нам будет, или аще речем брату, ракка, или урод и не покаемся, и за то писание грозно претит. Сии же чад своих дияволу предали. и с ними пребывают, како могут геенны избавитися; на них же и священныя правила, таков грозный износят суд идеже глаголется; Аще разбойник, и разбойником приятель; яко убийца запрещается. убийцы же запрещаются, от пяти и до двадесяти лет. Сии же таковому запрещению по Златоусту подлежат, точию за то, что не наказывали детей своих целомудрию. а еже еще и в вечный блуд вринули их, чему будут достойны. и паки; аще исходатайствовавшая блуд, при том же и чюждему, яко блудница судится; а блудник запрещается седмь лет, что же рещи о сих иже чадом своим сострояют блуд.

К тому же еще подобает взирати и инии правила: Василия Великаго, 30-е, четвертаго всел. собора 27-е, и шест. всел. соб. 94-е о похитивших, в них же дондеже не возвратят похищенную, и запрещение налагати не повелевается. А по сим правилам не подлежат ли томужде суду и родители отдавшии беззаконному браку мирских детей своих; еже без расторжения того блуднаго сожития и в покаяние не прияти. Сие возлагаем на общее обсуждение благоразумнейших. Нам же лепо есть кончити предлежащее. Ибо Василий Великий, и Зонарь в показанных правилах, определяют восхищающим, три лета епитимии, подобно достойны и сии тому же. Аще не по расторжении того сожития, то всяческо по расходе в разныя храмины. Сие о брачющих мирских детей своих, о соживущих же точию с новоженами родителех, рещи таковаго ничтоже не леть есть. Понеже дети у них аще и християне; обаче они к содействию беззаконнаго их брака ни мало не прикасались, но еще полное подает вероятельство; что и возбраняли; понеже и ко истине привели их; и воспитовали по християнски. А еже они родителей своих не послушали, но дерзнули на явную душам своим пагубу; то родители за сие не отвечают по писанному. Аще ли [рече] проповеси нечестиву путь его, яко обратися с него; и не обратится с пути своего, той в нечестии своем умрет, а ты душу свою избавиши. А еже обязуются таковии, разделитися жительством с детьми своими новоженами, то не за свои кия либо преступления, но за отступления [..?] детей тех. Ибо не леть есть овцам с волками водворятися, чистым же с c погаными пребывати; а християном с отступниками вместе жити. Аще ли же кии не послушают и не разыдутся, тии тогда конечно под виною будут. Угличскаго собора 10-я статия, уже прямо о тех родителех [о них же и все изложение сие состоится] сице повелевает. А которыя отцы и матери будут женить или выдавать мирских детей, и к тому будут прикладывать старанье к спеху свадебному, или благословлять, или дары принимать, и прочия присвоения делать; на сих налагать две четыредесятницы, и год поста. Такожде и сродственникам, которыя будут помогать, по разсуждению дела их и вины, правильно наказывать. Дозде статия. За краткое же выражение статии сея, потребно есть обратити внимание, понеже в ней не глаголется, яко разделитися с теми сыновы имением и жительством. Сие же умолчано бысть, или за известность християнскго обычая в том, или же делал он собор снизхождение падшим староженом, и самым новоженом, повеле их приимать к молению без расторжения; сице и родителей онех не обяза, еже разытися от сыновей своих в разныя домы. Тем яко же в приятии новоженов и староженов, церковь православная оному собору не последовала. Тако и о родителех во единех домех, со введенными ими в блуд сыновьями живущих, утверждатися на оной статье не можем; последовати же и утверждатися подобает на предании и на обычаях, кои к благочестию християн приближают, а не отдаляют. Ибо отец Феодосий, ничим же погрешившим и не участвовавшим в беззаконном браке детей своих, родителем повелевает отъитти от них. Сии же аще и мирских детей имущии, обаче [яко же выше рехом] на самих их великия и тяжкия преступления находятся, сиречь не учили их страху Божию, и не наказывали целомудрию и не привели ко истине, наконец еще далее отвели их от Бога, в вечный блуд погрузили их. А за сие и находятся много крат виновнее тех родителей, у которых дети аще и християне, но женились сами. то как мощно не разшедшихся допустить ко исправе и к молению. они убо за исходатайство детем своим блуда, по вышепоказанным правилом подлежат запрещению, яко же и блудники. блудников же дондеже не расторгнут беззаконнаго своего сожития, церковь на покаяние не принимает. А по иным правилом, уподоблены они помогающим на восхищение жен. такожде и сих дондеже не поставят восхищенную обручнику, или ея родителем, на покаяние церковь не приемлет. А на основании таковых правил, весма не долженствовало бы и сих родителей, дондеже не расторгнут ими сведеннаго детей своих блуднаго сожития, приимати на исправу но по всему уподобити бы их тем родителем, кои християн детей брачат; и оставити бы их тако жити до смертныя болезни; или паки когда разведут то сожитие. Но сие предоставляем будущаго времени, благоразумным ревнителем благочестия; аще они определят сих заедино с вышепоказанными родительми, да будет тако. Ныне же убо почему то прежде нас отцами, зделана им в том уступка. того ради в сентябре месяце прошлаго 7403 [1895] года написанными статиями, поне подтверждается то; чтобы таковии отнюд ни по каким суемудренным разсуждениям, дондеже не отъидут в особыя от сыновей своих храмины, на исправу принимаемы не были. Причем строго обязуются духовнии правители, неуклонное и точное иметь по оным статиям исполнение; в противном же случае, приемлющии подвергаются правильному наказанию. Понеже церковь наша православная, изкони сицеваго обычая не имать, еже бы допускати родителем, с детьми блудниками единодомовно жити. но она не токмо таковым преступникам, но и каждому християнину воспрещает с неверными даже имением сообщатися. о чем Ярославский собор сице завещевает [в 7323 (1815) году]. Християнину не иметь общаго имения с еретиками, и в наследие не давати еретикам, аще и дети будут. [ниже]. Всякому християнину обще не торговать, и имения с ними не иметь общаго [статия 7 и 8].

Тем аще всякому християнину возбраняется с еретиками иметь общение имением; то кольми паче родителем сим, о них же и весь труд наш сей произыде. Наконец и Московский собор в 7381 [1873] году бывший, о выданных дочерех сице повелевает [статии 9 и 10]. Которыя родители выдали дочерей своих верных в замужество, и после будут в гости приимствовать и снабжать, таковии подлежат томуже суду, как и сожительствующии с новоженами детьми. [ниже] А котории родители не готовили своих дщерей к беззаконному браку, и не выдавали, а после будут гостеприимствовать и снабдевать; таковии уподобляются изходатающим блуд свои детем.

Тем же просим и молим всю правоверную нашу братию, а паче духовных правителей, чтобы нигде и ни у кого бы, таковой проказе в церкви отнюд не быти. И тако желающим невредно сохранити православную веру, и истинно спасти свои души, то ко убеждению и ко исправлению, довлеет сие краткое по силе нашей написанное изложение. Аще ли кто пространнее сего что ведает, того прилежно просим не лишити и нас.

ГЛАВА, 7.