Отчего отступают от веры православныя, и ко антихристу в различныя прелести идут.

Аз приидох [рече Господь] во имя Отца Моего, и не приемлите Меня; аще ин приидет во имя свое, того приемлете [Благовестник от Иоанна зач. 17 лист 86]. От толкования. Ин рече, приидет антихрист яве, [ниже] оного же во имя свое приходяща приимите, се же случится вам по вашему нраву; яко он убо жития славу возвестит вам, ея же вы ищите. [ниже] Аз же не едино же что в житии красно вам возвещаю, но многу видите нужду от Мене глаголемых. Сего ради убо рече, Мне не веруете, ничто же сладких чаете от Мене в житии прияти. И апостол тоже свидетельствует рече [солуняном зач. 275]. Зане любве истины не прияша, во еже спастися им; и сего ради послет им Бог действо льсти, во еже веровати им лжи, да суд приимут вси неверовавшии истине, но благоволиша о неправде. И святый Златоуст сказуя сие тако глаголет [беседы апост. лист 2341]. Не бойся, рече, возлюбленне. но слыши того глаголюща, в погибающих может. иже аще бы и не пришел он, не быша веровали. А что же есть действо льсти; внешния толкуя глаголют [Церковный словарь часть 1 стр. 276 буква д]. То есть, по правосудию своему, попустит их в действительное заблуждение, или ложь, или обман. Зане ныне мнящиися християне повсюду [Кирила Иеросалим. лист 15], ради свободнаго жития законы превращают, и пределы уставленныя им прелагают, и от веры отступают, а православие с еретичеством соединяют. И в лепоту яко [О Вере глава 30 лист 270]: Антихрист многих прельстит и отлучит от правды; наипаче же тех иже растленное любят житие. и ныне преболе тии от святыя церкве, и от православныя веры отступают, иже не хотят уским путем ходити. И от сея вины, попустит Господь Бог прияти область антихристу во всем мире. о которой пишет святый Иоанн Богослов, во Откровении своем глаголя [Апокалипсис 3-х толк. глава 36 стих 161 толков. 2]. И дана бысть ему область на всяком колене людий, и на языцех и на племенех. А святии толковницы наводят; Сим, рече, знаменает отступление от веры, яже Павел к солуняном вещает. Где Златоуст уясняя пишет [беседы апост. лист 2333]. О антихристе, рече, беседует, и велия открывает тайны, что есть отступление; того самого антихриста нарицает отступление. Которое может случатися и на мнящихся християнех, правоверующих, и в кафоличестей церкви находящихся. ибо пишет [Апостол толков. июдин. послан. зач. 77. лист 216]. И единаго Владыки Бога и Господа нашего Исуса Христа отметающеся, рече, сиречь, житие их нечисто суще. Велиим яко же гласом Исуса отметаются. Кое убо приобщение свету ко тме. И паки во евангелии [Благовестник от Луки зач. 87. лист 189]: Яко антихристу пришедшу, безместными сластьми обложени будут человецы. [ниже] будут бо тогда человецы во всякой пищи, яко же и при Нои, ничтоже зла не чают, но и не веруют, еже им кто о каком чем случится глаголет, яко же и при Нои и при Лоте. Яко же и бысть: ибо по списателю О Вере [глава 15. лист 127]. До какова своевольства и презорства ослепше чревобожницы вдашася, широким путем в погибель ведущим, един другаго предваряюще, и от часу дале и глубочайше бежат. Отчего по Златоусту. Тысящими злыми церковь исполнихом. И по иному [Апостол толков. лист 679. зач. 195; от книги Пандок святаго Антиоха. глава 104]. От послабления принесе нам сатана язву, могущую и утробу и мозг досящи, и кости сокрушити. Обаче все сие будет строити и уряжати, по апостолу, в погибающих точию. Якоже глаголет Златоуст [беседы апост. лист 679]. Иже аще бы не пришел Он, не быша веровали.

ГЛАВА, 5.