О новопоявившейся в России на крестах четырелитерной I Н Ц I, титле

Кресту Твоему подолгу покланяемся Христе. ибо чтем на нем имя Твое написано. Исус назарянин царь июдейский [из книги новоизданныя Меч Духовный, слово, в 3 неделю Поста, лист 396]. Сему имени еже на кресте написано [ниже, на обор.], да поклонится земля благодаряще, яко Исус царь июдейский, престол Его царский на земли постави изволи, егда крест в ней водрузи. не похвалится земля дражайшим в себе бисером, паче крестнаго древа, еже в ней сей царь июдейский насади. Евсевий Пимен [в книзе Лифос, лета 1642]; И в костели римском, во время литургии на агньце, егда не узриши ли на едине стране воображения Распятаго Спасителя сих слов под титлою, I Н Ц I, от Пилата на кресте написану. ниже: на просфире греческой грамота, IС ХС, ника: Яко у латин, на просфире сия надпись, I Н Ц I, имеется.

О проклятая еретическая и богоборная уста, како на святый и пречистый верх отверзаетеся. О изощреный еретичеством хульный языче. како от устен своих яд аспиден пролиясте; доколе противу рожна лаяние злое бреханием своим отрыгаете: титлу бо положисте Пилатову в другий ряд, на животворящем кресте Христове, аки бы незнаючи яко царствует всеми Исус назарянин: царь июдейской, а не ваш. а он живет ныне не в Назарете, но седит одесную Божия славы в небесных. и тою титлою нам верным християном подписовати непристойно; понеже ведаем яко прославися царь великия славы, божественною славою своею. и купно кланяются Ему всяческая, небесная колена и земная и присподняя. иже и седит одесную велелепныя Божества Отеческия славы, а не в Назарете с человеки пребывает. и тою титлою своею называют богоборцы Спасителя света простым человеком. сия бо титла бысть от Пилата написана, не о божественной и боголепной славе Христове, но познания ради креста Христова. яко с ним вместе и ина два злодея распята быста. Паче же и в укор приносяще, яко противника кесарева на распятие предали, и они бутто к кесарю радеют. и тако жидове Христа света пресветлаго, немерцающаго солнца к Пилату оклеветаша сим злодейством, яко противник кесарев есть и августу римскому непокорством [ниже] и Пилат тогда разсмотри убо, яко завистию злобною жидове подстрекаеми быша чюдес деля Христовых, июдей к нему приклоняющихся. того ради на распятие предаша. обличает их жестокосердую лукавую злобу. обаче же Его всей твари Бога не славят, но называют Его назарянином простым человеком. понеже Пилат бысть иноязычник, и Христу Свету истинному Спасителю нашему правою верою не прилепися. и пророческим писанным книгам не научен бысть, и сея тайны от всех родов прообразованныя не искатель. сие же наречение Христу свету истинному во устех человеческих, и всех живущих во Иеросалиме, и около Иеросалима бысть обносимо, и небесною славою славитися еще не начатся. тем же Пилат тако просто пишет, называя Его назарянином простым человеком, якоже и прочих. и что прилучися, то тако и повеле просто и написати.

Сию же титлу ныне новыя злыя еретицы воздвигоша. Зане яже в то время и Нафанаил законник, егда не хотящи воспроповеда ко Христу идущи, равви ты еси царь израилев. обаче аще и тако возгласи рек, но самем Спасителем не ублажися, но паче и поношен бысть, яко боговиднаго ради слова Христова, аще сыном Божиим и проповеда, но то аки бы добродетели ради и по благодати. плотскаго же ради смотрения, человеком равна Христа света помышляет, а не Творца всех и Бога прославляет, и царем израилевым нарицает, а не всех Царя славит. того ради и Спаситель свет наш Христос истинный, истинный по существу Сын Божий, и Сын девичь быв. милостию своею сия глаголы ему претерпевает, яко еще боголепныя славы своея и силы начаток, правоверию и чюдесы приемлет, а Нафанаилу тем и боголепным гласом превечнаго Божества своего силу и славу объявляет: аще ты Мене и проста человека и царем израилевым помышляеши. сыном же Божиим прославляеши не по существу, но добродетели ради. и по причастию благодати. Аз же аминь аминь глаголю вам, яко отселе узрите небо отверсто, и ангелы Божии восходяща и низходяща над Сына Человеческаго. Мне и ангели Божии и небеса и вся тварь послужит, яко Творцу всех во очию вашею. и оттого времене начат свою боголепную славу объявляти и проповедати чюдесы и ученьми. последнее же крестом и распятием, и во гроб положением, и славным воскресением, и по воскресении на земли 40 дней со ученики своими хождением. последи же всех на небеса вознесением. и одесную Отца седением. и такою славою прославися в небесных и земных и преисподних. и егда славою своею великою прославися, и седит одесную Отеческия славы Божества в небесных. а не в Назарете соводворяяся яко же и прежде. Они же богохульныя еретическия уста, и адския присподния огорелыя главни, содомскаго пламени останки, разоренаго вавилонскаго столпотворения семя, египетскаго лакомства ласкордство. и боголепную присносущную к безначальному Отцу, и присносущную и единосущную превечную славу отмещут, и Творца всей твари, и Владыкою не проповедают. и во двою естеству, божественном и человеческом, во едином лице, не исповедают единороднаго Сына Божия по существу, и Бога истинна, и Владыку и Содетеля. и Тварца всей твари не славят, но тако еретически лают. из ада погибели изшедши, простым человеком укорно называют, полагаючи титлу Пилатову; еже евангелист Матфей и Марко и Лука, именуют вину, яко жидове вину написали, за нея же распяли, еже есть Исус назарянин царь июдейский. Нынешнии же еретицы тое вину объявляют, и тако веруют, якоже и древнии жидове. пишут Исус назарянин царь июдейский, а не всей твари Царь. И аще назвать по существу Сына Божия ныне нам верным християном познавшим истинну святую назарянином, простым человеком, по прославлении Его по воскресении Его, и на небеса по вознесении, и одесную безначальнаго Отца по седении. еще же от крещенных истинным крещением, и познавшим Его Бога всех: то станет сие их дело еретическое, яко от мужеска семени зачатие Его баснословят проклятии. и от Христовы веры отступили, еже како крещени были. и всю проповедь святую евангельскую и апостольскую опорочили, наипаче же благочестие святаго Иоанна Богослова, еже пишет в начале бе Слово. Писал бы о сем подлинно и подробно, да тесно мне ныне. и времени и места не имею. Точию нужная малая воспоминаю объявления ради. возражал нынешних проклятых еретических уст. О богоборная лающая еретическая уста, геенскому огню пища, вечныя тмы наследницы. послушайте внятно и разумно; аще бо святии апостоли, ученицы Спаса Христа, проповедь сотворяюще по вселенней, неверных идолопоклонников в веру приводяще чюдотвореньми различными многими уверяюще, на время уверения ради, и познавания к неверным и некрещенным идолопоклонником сие слово по возводству изрицаху, но не и догму уставляюще. изрицаху бо святии апостоли сие слово на время, яко же верховный апостолом Петр сотвори, к разслабленному рек, исцеляет тя Исус назарянин мною, или во имя Исуса назарея встани и ходи; и абие разслабленный воста вскоре. но и Петр сие к разслабленному изрече, не догмы ради не устава. но временно к неверному и некрещенному. понеже они идолопоклонницы, идолом прилежаще, и пророческих и законных святых книг не имуще. и таинства сего ни слухом слышали, что есть Бог, всея твари Творец. и по существу Сын Его на землю сниде, и плоть прият сущую нашу, от преблагословенныя Девы Марии, осенением Святаго истиннаго Духа, пренепорочныя и пресвятыя Богородицы, и зачатие плотьское архангеловым гласом бысть ей возвещенно, и плотию воистинну без мужеска семени родися Сын Божий присносущный. таже и крестися, и чюдеса сотвори многа, и распятся и погребеся, и воистину воскресе в третий день, и на небеса вознесеся. и мертвым всем воскресение будет, и страшный Судия судити приидет. и месть комуждо противу делом воздати имать. праведным вечную радость даст. а грешным иже в Него не вероваша, вечную муку. Того ради святии апостоли сие слово к некрещенным и к неверным изрицаху, Назорею поминаху уверения ради, ко крещению приводяще некрещенных, и ненаученных святым книгам, яко да познают в Кого им крещьшеся будет веровати, и кто есть Сын Божий; и котораго Сына Божия единым призыванием имени, силы и чюдеса великая действуются и сотворяются. и таковая чюдеса видевше сотворяема святыми, да не приимут идолопоклонники, в своя мысли, от своего безумия. яко их бога идола, или иного котораго сын таковая чюдеса сотворяет; и апостоли в того им веровати велят: к тому же и сего да не помыслят, яко Бог Отец безначальный, единороднаго Сына жену имел. того ради святии апостоли Назорею поминаху, некрещенных идолопоклонников в веру приводяще: яко сей есть воистинну Спас миру Христос, по существу Сын Божий, и небеснаго безначальнаго Отца, и всея твари Содетель и Творец, свет от света, Бог истинный, от истиннаго Бога. образ и подобие присносущия Отча, и образ ипостаси Его, еже бо бе пребысть неизменен, и еже не бе, сниде на землю плоть прият от пресвятыя и пренепорочныя присносущия Девы Богородицы Марии, и по рожестве и по пришествии из Египта, в Назарете точию воспитася плотию. пророческое слово исполняя, от Египта возвах Сына Моего. и паки другое пророчество, яко назорей наречется. Назорея же толкуется святыня: сего святый и пресвятый и преблагословенный Сын Божий, со отцем мнимым Иосифом от Египта пришедши. и с нескверною материю вселися в Назарет. и в нем плотию вскормися. и бе родителем мнимому отцу Иосифу, и матери присносущей Деве до времени повинуяся, и тако назорей наречеся, еже есть свят и пресвят. И благословен и преблагословен сый во веки, аминь, а не земный Назарет вознося назарянином именовася, ниже жителем его нарицался. [ниже] И аще назарянином простым человеком Сына Божия нарицати ныне, то уже и лютое богоборство стало. а нетленное рожество Его не хотяще, или будет и вправду знающе лаете, от блуда сказываете было. его же вси небесныя безплотныя силы нечюша когда воплотися, и ни самый благовестивый Гавриил архангел возможе уразумети. ниже сама приимшая присносущая Дева, в свою пресвятую и пренепорочную утробу возможе почюти, како зачатся. [ниже] И аще по вашему лукавому сему размыслу, О гнилая еретическая и богоборная уста, новая суетная жидовская сонмица, пречистую и пренепорочную присносущую чистую Богородицу и Деву нетленную и нескверную блудницею именовати. и Христа света непорочнаго, Агньца пречистаго, праведнаго немерцающаго солнца, от блуда рождена нарицати. [ниже] Яко же и титлу пишет, Исус назарянин царь июдейский, аки бы от назарянина от кого зачатся, и сам назвася царем июдейским. того ради и распясте, яко противника римскому кесарю. вы же ему радеете и пишете, Исус назарянин царь июдейский. а не ваш; за него же верных истинных християн, томительными муками смерти предаете. ваш же кто царь; кому покаряетеся, разве антихристу, служите ему усердно, за то вас пожалует вечною и неизбудущею смолою. и огнем преисподним тартаром лютым. и аще тако по вашему злому умыслу, то напрасно и тою прелестию свое лукавство проклятое прикрываете, еже зовете Богородицею: но аки Несторий проклятой, такоже изостристе язык свой. он изрек христородица, вам же достоит нарицати цареродице: но помышляетмися и изрекли бы вы и тако, да еще нельзя, яко не вся омрачены суть прелестию вашею истиннии християне. нарицаете же богородицею. Исповедающе лукавно от мужеска семени зачатие ея бывшо. а от человек земных никто же Бог бывает. да суетное сие ваше и лукавое проклятое мудрование не утаися, но бысть всем явлено. и воистинну мы християне, Богородицу чистую и нескверную Матерь, присносущную Деву прославляем и почитаем. и Сына Божия, от пресвятыя Девы нескверно и неблазнено, осенением Святаго Духа плоть приимша, прославляем и покланяемся, и веруем и славим, купно со Отцем безначальным, и с пресвятым и благим и животворящим Духом. ваша же хула да обвяжется о вашей еретической главе. и клятва святых апостол и святых отец положенная на седьми святых вселенских соборех, и девяти поместных, и ваша клятва, еюже сами себе и хотяще и не хотяще, клянете на всяко время.

Древлепоморских благочестивых предков наших отец, выговских пустынных жителей, во благочестии всетвердых стоятелей, и заповедей евангельских, усердных и зело опасных хранителей, и всероссийских истинному благочестию богомудрых учителей, и душеспасительному уставу на нынешнее горкоплачевное последнее время положителей, общее советное соборное их утвердительное положение ко всем духовным правителем наказание, яко не без разбору подобает принимать во исповедь, а за ослушание и самочиние, и самих отцев духовных наказывать, и отлучать от християнскаго общества. писано сие ими уставоположение 7227-го [1719] года, марта 20-го дня, и рукоприкладством подтверждено, собственных их рук.

Общесоветне общежительнии, и скитстии пустынножители духовнии отцы, и книжнии братия, со старостою вкупе, слушающе священных правил, по апостольским и священным правилом, приговорихом, еже весьма духовником безразборно не приимать во исповедь:

1-е. Неприобщенных; которыя неприобщенным приобщаются. и по правилу 9-му, поместнаго собора, еже в Карфагене, неприобщенному приобщаяся, и сам неприобщен.

2-е. Такожде и отлученных; которыя со отлученными молятся. по правилу святых апостол 10-му, моляйся со отлученными, сам такожде да отлучен будет. К сим же и по многим иным церковным правилом, неприятных церкви весьма во исповедь. аще ли же которыя учнут по безбоязни страха Божия, и по презрению священных правил, неприобщенных приобщевати, и отлученных, и в церковь неприятых, во исповедь не исправя приимати, и ходити в мир на соблазн, исповедовати миряны, чрез священныя правила, по писанному, слепец слепца аще водит, оба в яму впадают. таковых якоже священныя правила отлучают, и мы отлученных имеем, и от них по священным правилом, всем скитяном отлучатися. и тех дерзостников, старосте и выборным наказати, и ис скитов выгоняти. Написася сие в лето, 7227-е [1719], марта, 20 дня.

Старец Варлаам руку приложил. Старец Пафнутий руку приложил. Выгорецкой общежитель, Данило Викулов руку приложил. Священным правилом соглашаюся, и отцем, многогрешный Андрей Денисов, и рукою моею приписал. Уставщик церковныя службы, Петр Прокопиев недостойный руку приложил. Симон Иовлев руку приложил. Староста Иван Михайлов руку приложил.