Тех же благочестивых древлепоморских отец наших завещание.

Благочестивым и боголюбезным отцем и братиям. всякаго чина и возраста, обитающим в сей пустыне Выгорецтей. соглашающим еже о Христе, и соблагоревнующим во всякое предоброе благочиние церковному исполнению. Собравшейся о Господе в Богоявленском общежительстве, соборнии грамотнии братия, и староста с выборными, о Христе Бозе в душеспасительном пребывании всем обще радоватися всеусердствуем.

Древле убо данным Богом Моисею закон, самыя грехи токмо, и действа страстей отсекаше, глаголя: да не убиеши, да не прелюбы сотвориши. в новей же благодати, Господь Бог наш Исус Христос, большее опасение полагая, и внутреннее сердца и души очищая; самое начало злобы, самый вход греха от сердца отсекая глаголет. Слышасте яко речено бысть первым, не прелюбы сотвориши; Аз же глаголю вам, яко всяк иже воззрит на жену, к еже вожделети ей. уже прелюбодействова с ней в сердцы своем; верно слово и всякаго приятия достойно. Кая бо полза есть человеку от внешния чистоты, идеже внутренняя дева растленна, о ней же Христос умре, сего ради и божественнии отцы наши церковнии предстателие, всячески поспешествующи, во спасение и хранение души и сердца чистоты всем християном. паче же действовати произволяющим. подобная места, чины и урядства и жительства таковым изобретоша мирскаго пребывания кроме. и не точию сея, но и хождения трапезы, седения и беседы, девьствовати хотящим со женами весьма отсекоша. да отвсюду непорочное девьства, и неблазненное чистоты и целомудрия явится. и оных спасение по евангельскому гласу, яко свет пред человеки возблистает. глаголет бо святый вселенский седмый собор, во 2-м правиле своем. мирским убо мужем с женами ясти неоклеветанно есть. иноком же не подобает единем с женами ясти. Божественный же Златоуст [Никон, слово, 12], и большее богобоязньство влагая глаголет: отнюд неприлично есть человеку хотящему иночествовати, с женою ясти или пити. и паки с женами яси и пиеши и беседуеши, и смеешися безчинно с ними. и над сими всеми еще хощеши девьственник нарицатися, не к тому тя девьственника зрю. Варсонофий же Великий к вопросившему брату, аще где призываем от любовных ясти, и прилучится жене внити на трапезу, что хощу сотворити: рече хощеши пояти особь звавшего тя, и рещи ему, прости яко забых рещи ти, яко заповедь имам не ясти с женою, но отпусти мя и отъиду. и аще отпустит жену пребуди. аще ли же ни, отъиди; и не преслушай заповедь, да не будет ти смерть от преслушания: и да не убоишися, не бывает бо в соблазн, но в сизидание. Предивний же Исаак Сирианин, запретительнейше некако глаголет: лучше тебе ясти яд смертоносен, нежели с женою ясти, аще и будет ти мати или сестра. О путешествовавших же со женою. глаголет священное правило, еже в Номоканоне, 105-е, инок аще идет с женою поприще едино, да отлучится дней седьм. в том же Номоканоне правило, 169-е. ниже да стоят мужи с женами вкупе, в женском припрате, сиречь преграждении, кроме великия нужды, по 38-му правилу святаго Никифора.

О благочинии же жительства жен, глаголет великий Василий; едино же лепо есть ведети яко множайше и вящше истязует благообразие, еже в женах житие; [и паки ниже] Еже о происхождении опасство, и от бесед ухранение, и яже друг к друзе любовь. и не имети еже отчасти дружбы, во всех сих множайшим тщанием девическое должное есть исправлятися житие. Сия вся почетше и разсмотривше, общесоветне сошедшиися о Христе братия. заповедаем отныне, по священным преданиям святых отец, всем живущим в согласии церковнаго мира, девьственное и безженное проходящим житие; еже со женами отнюд не ясти, ниже пити. аще и близокровных сродниц кия будут, аще бо крепким и благоговейным, святыми отцы запретися сие. нам немощным и слабым, колико паче неотложно соблюдати сие подобает. Такоже по священным правилом, и путешествования со женами огребатися повелеваем: да никтоже отнюд со женою путешествует. аще бо безстрастнии не прощаются. страстнии же и слабии, множае сохранятися должни. К сему же и в рыбных ловитвах соблюдатися потребно. и никому же от мужеска полу с женским кроме близокровных ловитву деяти, паче же немногим: яко да не прежде рыбнаго ловления, уловлени будут в диявольскую мрежу. Тем же отныне никтоже со женами чюжими ловитву деет, в соблазн и претыкание неверным. в поношение именю Христову. аще ли кая неотреченная нужда, и благоговейным и престарелым, и советом духовнаго выборнаго сие да бывает. подобне же и на брание ягод, или волнух, и иных каковых овощей, мужи со женами, или отроки со отроковицами, никогда же да ходят. разорение бо сие есть целомудреннаго о Бозе жития, и знамение безчестия. и ко всякому греху руковождение. тем же отныне сему вкупохождению престати повелеваем. аще же потреба на брание, да ходят жены и девы особь. мужие же и юноши особь, далече негде в своя места. К сему же и сие смотрити подобает. да никогда же дева или жена путьшествует едина далече негде или близ, или между келиями когда ходящи едина отнюд да не обрящется, во укор соблазна и разорения предобраго християнскаго благочиния. но ниже по келиям лепо деве или жене ходити, разрушение бо сие благоговеинства, и безчинию вина. тем же и сие отселе да престанет. каждая же жена или дева да седит, или трудится в безмолвии в дому своем целомудренно, пекущися о спасении души своея. аще ли коим сиротам неотреченная нужда случится, советом духовнаго выборнаго да исходят. такоже и в мир, рекше в волость, жены и девы никогда же да исходят, изветом видения своих сердоболей; во общую укоризну церкве, и на поношение правоверным. идеже и мужеску полу исхождение не безвредно, паче же юным женам, толико вреда придобытие, и девьственнаго благолепия разорение. от неподобнаго мирохождения зло творится. аще бо во отишии пустыни, между тожде верными християны, по келиям ходити жене или деве неприлично есть, и отнюд не подобает. в море же злострастия мирских, и пребывания мирожителей, толико неподобнейшо. паче же беззаконнейшо исхождение, и девьственнаго целомудрия конечное разрушение. от тех бо безчинных мирохождений, освященнии Богу, девы и жены, всяких злокозненных, паче же безбожных обычаев научеваются; и в пустыни сущим ниже когда во сне мира познавшим, и беззаконная учения, яко крастовая овчата, здравым приближающися, свою красту преподавают. и сему убо неблагочинию, конечне отныне слезне моляще престати повелеваем. аще ли коим сиротам неотменная нужда, с советом выборнаго да исходят. еще же к сим и о сих зело смотрети, иже юннии мужеска пола, к юнным девам, или женам, в жилища или виталища их, отнюд не дерзали бы входити, никоим изветом, во разрушение девьствохранительнаго целомудрия, и в разорение святых отец предания. о сем крепце запрещающим, и соборным и старейшим благоговейным братиям, зело таковым возбраняти, и взущати крепце подобает. К сим повелеваем на отходных службах пашенных, прятках, жатвах и сенокосах, и прочих. мужем со женами во единой келии отнюд не спати, ниже ясти, ниже стояти, ниже молитися отнюд. сими бо безчинии имя Божие хулится во языцех. и християнское благочестия согласие, укоры и поношеньми досаждается. немощным же и слабым, соблазн и претыкание, и конечная пагуба бывает. сего ради отселе сие безчинное вкупосмешение да не будет. но особныя жены да имеют. но и во трудах на нивах. не без разбору и смешенне некак и безчинне. но женам купне особь, мужем же такожде особь на своей стране трудитися повелеваем. К сим же всем и в жительствах домовых, подобает всем келии особныя имети, мужескому и женскому полу. аще бо мирским не повелеся в церквах во едином припрате со женами стояти. суть же нецыи от мирских, и в домех преграждения особныя состраяют женам. кое прощения и милость или извет будет нам, от мира изшедшим, и девьственное и безженное гонящим житие, со женами же вкупе по мирскому безчинию, безпреградне живущим. сие бо безлепотное сожитие, всякому греху и злобе дверь. и всякому благолепию и целомудрию разорение. Тем же и повелеваем о Господе, отселе ни быти ни именоватися единокелейному безпреградному со женами вкупожитию. но каждому полу особый предел состраяти. К сим же сожительства соблазненная с зазорными лицы, паче же юных, и витания схождения и собеседования, соблазн и позор творящия прочим, отсекати подобает. яко вреду и соблазну ходатайственна, и грехом и падением родительна. Сия убо вкратце написаше, не своя предложения, но святых отец запрещения. молим вашу любовь боголюбивии, бедим и повелеваем сим всем соблюдатися неизменне. старейшим же и благоговейным братиям, с благоревностным радением о сих всяко тщание и попечение о Господе показовати, и всякое благочиние, паче же написанное зде. во всей пустыне сей, во всех християнех уставити и укрепити. да написаная сия от словес божественнаго писания, делом возъисполнятся в благоговейное украшение, и в благолепие християнства. в славу же и похвалу, всесвятому имени Божию. от Него же щедроты и милость изливаются на хранящия заповеди Его, по божественному гласу, славящаго Мя прославлю, и уничижающий Мя без чести будет. аще ли кто непокорив и прекословен явится божественным отеческим преданием. и сему о Господе богособранному совету. безчинне же и неблагоговейне начнет жительствовати. предобрая же отеческая благочиния, презирати и разоряти. о тех нужда нам исполнити апостольское слово оное, еже пишет в послании солуняном 2-м, глаголя [зач. 277]. Повелеваем же вам братие, о имени Господа нашего Исуса Христа, отлучатися вам от всякаго брата безчинно ходяща, а не по преданию еже прияша от нас, и паки; Вы же братие не стужайте добро творяще. и паки. Аще ли кто не послушает словеси вашего, посланием сего сказуйте, и не примешайтеся с ним, да посрамится. и в божественных правилех святых отец, запрещению должно покарятися, глаголющему. Аще ли нецыи неотступно держатся своих обычаев [Потребник, лист 674. Номоканон], к таковым ни едино нам общение. слышим бо от писания, спасаяй спаси свою душу, и блюди себе неисправленным приобщаяся. мир же Божий, всяк ум преимеяй, да озарит сердца ваша. и крепит в соединение исполнения глаголемых. в славу и хвалу и велелепие, преславному и всесвятому имени Его, ныне и всегда, в настоящем и грядущем веце, аминь.

Вас убо о вожделеннии единоумнии сынове кафолическия церкве. любезне молим, стати крепце на камени благодатныя ревности, оставльших песок человеческаго малодушия. Подвигнитеся за благочестивая церковная заповедания. Воблагоревнуйте о доброговейном благочиннаго пребывания жительстве. потщитеся святая отеческая благочиния в скиты вводити. безчинныя же мирская предания, подзазорная сожития. схождения витания, спутьшествования и собеседования с зазорными лицы, их же ради бывают прелютыя падения. за которыя по апостолу Павлу, грядет гнев Божий на сыны противления. сия от исполнения искоренити попецытеся. Не ужасайтеся наветов от ненаказанных бывающих. не бойтеся поношений, не устрашайтеся ненависти. глаголет бо пророк. страха человеческаго да не убоишися, и устрашению его неу повинуйся. якоже бо ухлебленныя овчата, тако снедена будут. похвальна убо есть вражда, за ревность яже по Бозе, паче мира от Бога разлучающаго. якову же ревность показа в ветсем, блаженный он приснопоемый Финеес. людем всем во истление плоти скверною. во истление же души идольскими жертвами низпадшим. мечем гнева Божия за сие наострися, люта казнь найде, всегубительныя язвы вред, всех без милости поядая смерти предаяше, избавляяй не обреташеся. увы падения, им же море устыдеся, нетлаченныи путь сотвори к прехождению сих. скверна плоти в пустыне на суше телом, во гневе ярости Господня умертвивше. души к вечней смерти препосла. бяше бо падших числом двадесять четыре тысящи. что же Финеес возревнова по Бозе, возгореся рвением любве Божия, обрете согрешающа нека, прободе своим копием оба, наложи страх прочим сквернолюбцем. устави же и гнев Божий иже на израиля: прият завет мирный от Господа. отступи и всегубительная язва, казнящая люди израилевы. Сего предобрую ревность, похваляя и богоотец поет, и ста рече Финеес и угоди, и преста сечь. сия ли приобрете ревностию, еже гнев Божий уставити токмо; ни; но вменися [рече] ему в правду, в род и род до века. Елико ревность яже по Бозе, вознесе онаго мужа. и в сей вселенней даже до века, славна и чюдна сотвори. Подобно же сему ревность и прочии святии, ветхаго и новаго завета, за любовь Божия чествования показаша. и даже до смерти о заповедех Его подвизашася. и друг друга поощряху наказоваху, обличаху, и в хранение закона Божия понуждаху, и нам всем християном той же закон положиша. слыши Иоанна Златоустаго, от послания Павла апостола к ефесеом, нравоучение 18. Услышите молю вси, елицы не хощете туне ненавидимы быти. похищает, и не обличаеши ли. но боишися ненависти. обличи брата, приими вражду любве ради яже во Христа. любве ради яже к нему, возбрани ему в ров отходящему: [ниже] но неисправляется рече. но ты свое сотвори, и дал еси ответ Богу. не скрый таланта. сего ради слово имаши воздати. того ради язык и уста, да исправляеши ближняго. [ниже] видел ли еси лихоимствующая, возбрани их. Того же от послания к евреом, в нравоучении, 30-м глаголет сице. Аще увидиши друга блудяща, рцы к нему, зла есть вещь юже дееши. не срамляешилися, ниже чермнееши, зло се есть. той ли убо не весть, рече, яко зло есть. ей весть, но от похоти влеком есть. и недужнии бо ведят, яко студеное питие зло есть, но обаче требуют возбраняющих. аще гневлива увидеши, аще лихоимца удержи, свяжи наказанием. се есть дружество, тако брат от брата помогаем, аки град тверд будет. не бо еже ясти и пити творит дружество. таковое бо имут, и разбойницы и мужеубийцы. выше: рече убо некто от отец, аще увидиши брата согрешающа. и не речеши да познает грех свой. от рук твоих взыщется кровь его. И сия убо о свойственнем братопоболения творим обличения. Божия ради, и братни любве, колико тщатися, и вся презирати, ненависти и клеветы повелевает. О соборнем же и церковнем, божественный апостол к Тимофею пиша законополагает [зач. 197]: Проповедуй слово, настой, понуди, благовременне, обличи запрети умоли. и паки той же [зач. 286]: Согрешающих пред всеми обличай, да прочии страх имут. На сия же святый Златоуст толкуя глаголет [беседы, лист 2503]; сиречь, не скоро отсецай, но со многим опасением вся много испытуй, егда убо увеси зело казни, да инии уцеломудрятся. якоже бо еже просто осуждати, вредно есть, сице еже не казнити явленныя грехи, путь есть подаяти иным, еже таяжде творити и дерзати. обличай же рече, являяй, яко не просто, но с отсечением. тако бо и прочии страх имети будут. и паки [лист 2504], якоже бо без томления пребывшем согрешающим, мнози суть согрешающе, такожде мучимым, мнози исправляются. Июда же Ияковль глаголет; овех убо милуйте разсуждающе, овех же страхом спасайте, от огня восхищающе. С сими всеми апостольскими и отеческими наказании. молим вашу пречестнейшую любовь о Господе, всечестнейшии отцы и братие, чада единомысленная церковнаго исполнения. любве ради щедрот Божиих, единокупно и единоумно возблагоревновати, о святых отеческих законех. и не благолепная и душевредная безчиния отсекати и прогоняти. благополезная же душеспасительная святыя обычаи вводити, и уставляти во всех скитех. и не давати дерзновения востающим, на благолепныя церковныя законы, безчинными пребывании; но по апостолу умоляти, обличати запрещати. непокаряющияжеся, от церкве и сообщения християнскаго отсекати, яко гнил и непотребен уд. Иже ли чрез божественных повелении возводят таковыя [Кормчая, от собора единения, лист 571], или рещи потакают; Да слышат Исаию велегласно вещающа к ним, от лица Божия [Исаия, 65]: Аз рече, предам вы во оружие, и вси заколением падете. и чада ваша, в глад и в плен предам, яко звах вас, и отзвастеся. и глаголах, и ослушастеся, повеления Моя отринусте, и сотвористе злое предо Мною, их же не хотех Аз, вы возлюбисте. Сего ради тако глаголет Господь, с работающими ясти и пити имут, вы же взалчете и вжаждете. Се творящии волю Мою, возрадуются зело в веселии сердца, вы же восплачетеся и возрыдаете з болезнию сердца, яко остависте закон Мой, и исполнисте волю вашу. [ниже][лист 572] несть бо ино что, имже величие Божие верным бывает, якоже правила церковная крепко держати. егда убо святая и божественная церкве, без пакости и немятежно в мире бывают, тогда нам вся благая строения от Бога бывают подаема, мир и умножение плодом, и врагом одоление, якоже в левитице пишет [26]. рече Господь к Моисеови; аще по заповедем Моим ходите, и повеления Моя храните. дам вам дождь во время свое, и земля даст плод свой. такожде и древо польное, даст овощь свой. и дам мир земли вашей, и рать не пройдет сквозе ню. аще ли пройдет, то падут пред вами смертию. и призрю на вы, и благословлю вы, поставлю сень Мою в вас, еже есть нынешняя церкви. и буду вам Бог и вы будете Ми люди изрядны. Аще ли ослушаетеся рече заповедей Моих, то наведу на вас мечь, отмщающь суды Моя, и вбегните во грады ваша, и послю глад и смерть на вы, и снесте плоть кождо искреняго своего. и предам вас в руце врагом вашим. и опустошу святая Моя вас ради, и труд ваш инии снедят. Видиши ли, яко преслушания божественных книг, вся злая приходят на вы. Да аще убо в ветсем законе, толики казни, толика запрещения, то кольми паче в благодати требе нам есть смотрение велико имети. Дозде от соединения. Убоимся возлюбленнии и вострепещем, да не делом клятвы сия привлечем на ся от Бога, преслушающе повеления Его. но да потщимся паче мира и благословения сподобитися от Него, и послушанием словес закона, и исполнением воли Его святыя, в благочиннем пребывании жития, аминь.

Вы же о богособранный пустынный народе, обоего пола, мужеска и женска. юноши и девы, мужие и жены, подклоните выи ваши, под ярем Божиих законов. возлюбите церковная святая законоположения, благочинным житием исполняти. восхощите воли Божией святей, а не своей последовати. да и зде срама и поношения, и написанных клятв от Господа, в будущий же вещнаго томления избавитеся. А иже жестоковыйнии от вас, и необрезаннии сердцы и ушесы, присно противляющиися церковным преданиям, и в своевольном ума скитании хотящии жити, и на наказующия гневающияся. почто убо зде в пустыне живете: пространен мир вмещаяй вы; широка вселенная, приемлющая вы, по своему нраву прочее избирайте места;

Что убо спастися хотящим соблазн подаваете; чесо ради добре живущим, вместо диявола бываете; аще убо по месту не хощете жити, изберите место по житию вашему, и прочим спасающимся в претыкание и соблазн не бывайте, да имя Божие святое и славное, нашими безчинии не хулится во языцех. но да паче свет преподобнаго благочиннаго пребывания, восияет пред человеки. о самом Христе Бозе нашем, Ему же слава со Отцем и со святым Духом, ныне и присно и вовеки, аминь.

В сем же да будет ваши и во иная полезная прилежное попечение, и безчинию возбранение. еже да не будет у кого с зазорным лицем сожития. по другим келиям, блазненнаго безчиннаго схождения. возбраняти же в мир безнужная хождения, клеветная блядословия, за трапезами и по павечерницы немолчания. отсекати же лжи и неправды, и прочая злотворения. кощуны и игры, и иная безчиния. татьство же и сквернение весьма да не будет. да некогда нерадения ради умножится безчиние, и гнев Божий найдет на ны, якоже пишет преподобный Иосиф Волоцкий. Сих всех вина, старейших и соборных братии, приемшим правления монастырская, и всех служебников. [ниже] яко да сего ради возмогут единодушно вкупе вси попещися, о церковном и монастырском и о трапезном благочинии, и благоговеиньстве. ащели же в небрежении и безчинстве пребудем, того ради в запустение предадимся, в нынешнем веце, и в будущий век, того ради осуждени будем, яко нерадиви и лениви. Глаголет убо великий Василий, внемлем себе братие. небрежения бо ради и безчинства, грады разоришася, и монастыри запустеша. и божественныя церкви огнем пожжени быша. глаголет же святый Исаак братиям; яко аще сохраните заповеди Божия, и отеческая предания; послати имать Бог благодать свою, и сохранити имать Бог место сие. ащели же не сохраните, запустети имать место, и вы не пребудете в месте сем; глаголет святый Никон, внимаем себе братие опасно, яко да не в небрежении и безчинстве бывше, в запустение предадимся.

Сего ради братие потщитеся всеусердно, во еже благочинное богоугодное житие, по преданием отеческим утвержати. безчиние же и злодеяние, от среды пустынножития истребляти. а о противниках и непокорниках отеческому преданию и наказанию, той же преподобный Иосиф изложи сице: Ащели же кто от настоятеля, и от преимущих братии, не приемлет наказания и обличения, подобает таковаго пред всею братиею обличати. ащели же пребывает в непокорстве, да изгнан будет из обители. тако бо повелевает божественный апостол Павел, и прочая божественная писания. измете рече лукаваго от вас самех, занеже мал квас все смешение квасит. и паки глаголет, обличи рече, и запрети согрешающая пред всеми, да и прочии страх имут. и в законе глаголет, обличением обличиши искренняго своего, и не приимеши о том греха. и святый апостол Июда глаголет: овех убо страхом спасайте от огня восхищающе. и великий апостол Петр глаголет; се убо есть воля Божия, еже благочестивым человеком, нечестивыя обуздовати. и Господь наш Исус Христос глаголет; аще согрешит тебе брат твой, обличи его между собою и тем единем. ащели тебе не послушает, повеждь церкви. ащели и церковь не послушает, буди ти яко язычник и мытарь. И великий Василий глаголет, изжени губителя из сонмища, и изыдет с ним и молва, да не и прочим своя красты подаст. сим последующе писанием божественным, преподобнии и богоноснии отцы наши, и в предняя лета, и в последняя. кротцы бяху и милостиви, егда потреба беяше. жестоцы же и немилостиви, егда подобаше. [ниже], не точию пастыри и наставники, но и ученицы их, иже суть старейшая и соборная братия, и вси служебницы, иже суть в монастыре, иже прияша от них правления монастырская, такоже кротцы бяху и милостиви, егда подобаше. И не точию сами содержаще отеческая предания, но и инех понуждающе и наказующе, не боящеся ниже срамляющеся никогоже, ни самого того настоятеля, егда что видяху стропотное же и развращенно, и не по обычаю отеческих преданий творимо. сим божественным писанием, долженствуете вси вы старейшинствующии в скитех последствовати, и прочии церковныя чистоты ревнители, тако ревновати, тако усердствовати. и яко присная церковная чада, матерни болезни сболезновати, и за священныя ея законы, мужественне стояти, и всякому безчинству и злодеянию возбранити.

Потщимся убо братие потщимся [генваря 1, на память св. Василия Велик.], яко да сами спасемся, и другия научим. не глаголы токмо, но и делы паче еже делаем. да просияет свет наш пред человеки, яко да видят добрая дела наша, и прославят Бога; и они таковая начнут делати. И не токмо мы делатели евангелию будем [в неделю 2, слово 23], но и другим будем наставницы и учители, и к нашей ревности их подвигнем.

Сего ради потщимся братие, и бдим и трезвимся [в неделю по крещении], како угодити Богу, правою нашею верою, и благими делы нашими, или паче покаянием исповедаем.

Соблюдаем же братие заповеди Божия [август 15], и почитаем повеления Его, потом же и предания отеческая соблюдаем. Аще ли же земных человек законы преступаяй [август 1], не ответну приемлет муку. кольми паче тяжким мукам предан будет, иже и небеснаго Владыки презираяй повеления. невозможно есть нам спастися братие, не творящим заповеди Господни, и дела Божия. к тому же и презревшим нам некое. от заповеданных нам без беды быти.