Статии московскаго собрания, в лето, 7368 [1860], бывшаго.

Господи Исусе Христе Сыне Божий помилуй нас, аминь.

Благословением убо Бога Вседержителя [Потребник Иосифа патриарха, лист 768], и споспешением сопрестольнаго и единороднаго Сына Его, Господа Бога и Спаса нашего Исуса Христа, и содействием Пресвятаго и единасущнаго и равнопоклоняемаго животворящаго Духа, единаго трисоставнаго Божества, милость и благодать излияся всем человеком, по богатьству славы Его, в славу и хвалу велелепную величества Его, яко да усвоит и учинит сыны света и дне восприятием, аки от некоего многоводнаго источника преизлишше воды истекающа, сиречь, от божественных писаний благодатных, и духовных плодов, по проречению пророческаго гласа, приступите ко Мне, и свет разума восприимите, рекше просветитеся. И сия убо всегда приимая в сердца наша, мы грубии и смиреннии раби Его; и предания святых апостол, и святых отец, без сомнения крепко держаще, вседушно рачительства своего тщанием, любяще Христови законы, и прежде бывших отец наших, душеполезныя наставления. Того ради мы ныне, сиречь в лето 7368 [1860], месяца маия, в 27 день, собравшеся в царствующем граде Москве, из разных стран. Зане внидоша в нецыих из нас некия неправильныя разсуждения. Сего ради имать приити на нас гнев Божий; аще не очистится путь истинный от сего терния. якоже рече Господь Моисеови [Кормчая лист 572; Левит глава 26]; Аще ли ослушаетеся, рече заповедей Моих, то наведу на вас мечь, отмщающь суды Моя, и вбегнете во грады ваша, и послю глад и смерть на вы, и снесте плоть кождо искреняго своего, и предам в руце врагом вашим, и опустошю святая Моя вас ради, и труд ваш инии снедят. Подобно сему Исаия глаголет от лица Божия [Кормчая лист 571; Левит глава 26]. Зря сие всяк благоразумный, да разумеет; яко преслушания ради заповедей Господних, вся злая приходят на ны. Подобно сему и инде глаголет [Потребник, лист 563 обор.]. Понеже несть бо ино что, им же величие Божие верным бывает, якоже правила церковная крепко держати [Кормчая лист 572]. Аще ли же собору не сущу, вся Божия в небрежение приходят [Зонарь глава 123].

Но егда убо святая и божественныя церкви, безпакостно и мятежно в мире бывают [Кормчая лист 572]. тогда нам вся благая строения от Бога бывают подаема; мир и умножение плодом, и врагом одоление. Яко же в Лествице пишется [Лествица глава 26, Кормчая лист 572]; рече Господь к Моисеови. Аще по заповедем Моим ходите, и повеления Моя храните; дам вам дождь во время свое, и земля даст плод свой, такоже и древо польское даст овощь, и дам мир земли вашей, и рать не пройдет сквозе ю; аще ли пройдет, то падут пред вами смертию; и призрю на вы, и благословлю вы, и поставлю сень Мою в вас; еже есть нынешняя церкви; и буду вам Бог, и вы будите Ми люди изрядны. И прочее множайшее о нем мощно есть предложити, но краткости ради оставляются. И о сем дозде.

Аще ли нецыим и возмнится нечто в статиях сих быти строго и неснисходительно, в отношении немощи ради человеческаго соблазнительнаго ради времени; то мы не обинуяся речем таковым разслабленно зиждущим столп сей. яко несть воля Божия иметь снисхождение к беззаконию и разрушению заповедей Его. Понеже бо токмо, в начале убо евангельской проповеди, не требоваху твердаго законоположения, или запрещения, но точию еже приводити на крещение [Кормчая лист 568]. По крещении же и по исполнении веры; дерзновение восприемше, вся совершаху елика подобаше, яко со властию, Владычния заповеди совершиша. Тогда убо основанием твердым, святую церковь оградиша; запрещения же и отлучения соборныя церкве безчинным и непокоривым по божественному закону положиша, некия же и до смерти отлучиша. Яко же в Деяниих, верховный апостол Петр, Ананию и Сапфиру [Деяния зач. 13]. И велегласный апостол Павел, судив соблудившаго в Коринфе. таковаго рече предати сатане [1 коринф. зач. 132]. Аще ли же кто паки возглаголет нам; яко того ради имут быти которы и расколы; И мы им паки возответствуем; Не везде бо есть добро соединение, но бывает иногда и разделение добро, по евангельскому гласу [Евангелие в Неделю всех святых и Благовестник от Мф. зач. 38, лист 78; Беседы апостольск. лист 1761]. Сваритися же рабом Божиим аще и не лепо есть, обаче в подобное время и похвально есть. По сицевому свидетельству [Альфа и Омега, глава 28, лист 172 и 177]. Обаче есть похвала и сваритися о церковных, на утвержение им. Ниже [Беседы апостольск., лист 1475; Кормчая лист 569]; Таковии убо не сварливи, но паче похвальни и премудри, и прочее зри тамо. Подобно сему и в сказании о первом и втором соборе речено есть [Кормчая лист 218]. И о сем дозде. Мы же на предлежащее возвратимся. Яко мы се не новое предание введше, но древнее укрепляюще поновихом. Ниже; Что любо развращающе от предания отец наших [Патерик, лист 587]; понеже мы аще и зело буи, но возымехом потщание собрать мало что не все предание отец наших, их же ради общей пользы кратко и воспомянем. 1, Статии писаны в Помории, их же числом, 33. Писаны в Москве 7283 года [1775]. их же числом, 100. В Ярославле, 7323 года [1815]. их же числом, 21. В Угличе 7335 года [1827]. их же числом, 34. В Москве, 7338 года [1831]. их же числом 3. В Угличе 7347 года [1839]. их же числом 7. и прочих частных лиц писанныя в разныя времена. Вся сия добре испытавше, и обретохом в некиих , сиречь, сотворено мало нечто приотшествие во отношении к снисхождению [в 66 и 67-й, и в углических, в 5 и 6 статиях]. Того ради мы и потщахомся согласовать их с священным и божественным писанием, без всякаго суемудреннаго снисхождения. Обаче аще и обретается ныне у нас с некими, от преждебывших отец наших якобы некое приотшествие во отношении к снисхождению; но мы, аще зело и груби, и всякаго священнаго писания неискусни, дерзновения же Хама на ся не приемлем, но всячески любовь, Сима и Афета; или якоже речено есть у Фотия о Иерониме, Иринеи, и Августине, и о прочих святых отцех, сотворших в своих писаниих, некое приотшествие, обаче святии отцы после их бывшии, аще писания их не прияша, хулою же коею отнюд не оглаголаша. Сице и мы аще некиих от преждебывших отец наших, снисходительное предание отсавляем в судьбы Божии, опасения ради, за неясность онаго протолкования, отцем же тем вечную память присно возглашаем, аминь.

А что у нас еще обретается о устройстве духовных правителей. уподобление с правилами принадлежащими до лиц рукоположенных; то сие сотворися нами того ради; что не обретоша вящьше сих ничтоже в священном божественном писании приближающагося к устройству духовных правителей, не имущих на себе никоея священническия степени, посему свидетельству. о них же писание не лежит закон сохранити подобает навычение и обычай [книга Матфея Иеросалим. Сост. г, глава 4]. Аще ли же и сего есть оскудение; последовати подобает, иже множае приближающимся, и уподобление имущим ко искомому. Аще ли же ни се будет, разумнейших вкупе и множайших совет да держится. и прочее зри тамо.

Статия, 1. Аще кто от духовных правителей, страха ради властей неверных, даст подписку, или токмо речию, духовных дел не править, сиречь, не крестить, или не исповедывать, или не учить. Такоже и сотворенаго им отвержется. таковый по правилу, 62, святых апостол, чюжд остается своего правления.

Пояснение. Понеже убо различно есть падение; того ради и речено зде. Аще кто речет, яко не буду крестить, или не буду исповедывать, или учить. Таковый по правилу сему, чюжд остается своего правления, которое зде на среду представляется, правило, 62.

Отметник Христов отверженный, причетническаго имени отвергшийся, и обратився паки, яко простый человек приемлется [Кормчая лист 18, пр. 62; Севаст, коп.]. Толкование [Кормчая лист 18, пр. 62. ст. 1; Арменоп. Книга 1, сеч. 3, надп. 2]. Аще который причетник страха ради, страха ради человеча, жидовска или еллинска, или еретическа, отвержется имене Христова, весьма от церкве да изринется. Аще же не Христова но имени причетническаго отвержется причетник сый, сиречь, убоявся епископ речет, несмь был, и нихощу быти быти епископ. такоже и презвитер и диякон и прочии причетник, аще отвержется своего имене, да извержется от сана своего. обративжеся паки и каяся; яко мирский человек да приимется. Дозде от Кормчей.

Такожде аще кто от прежде сотвореннаго им отвержется, сиречь, речет яко не крестил, или не исповедывал, или не научал. аще и от единаго из сих коего либо богоугоднаго дела отвержется, един суд приимет.

Седмое же надесять правило великаго Василия, сицевым творит прощение; обаче не в соборнех местех. понеже, да общих убо собрании ошаются [рече], особь же презвитерская да действуют.

Статия, 2. Аще кто от духовных правителей, буйства ради, или совершеннаго смирения, отречется при братстве самовольно, духовнаго действия; писменно, или токмо речию. Таковый по е-му составу, 28-й главы иже в Матфеи, и по Потребнику Иосифа, на листе 728 обор., чюжд остается своего правления.

Пояснение. Такожде и зде различно есть падение; ово буйства ради, сиречь, с некиим умыслом, по своей мудрости содея, ово же совершеннаго ради смирения, сиречь простоты ради, и не искуства ради, всякаго священнаго божественнаго писания. таковии обоя чюжди остаются своего правления. Кирила о отречении епископстве.

Сим святый присуждает Кирил, в третией главе иже к Домну епистолия [книга Матфея Иеросалим. сост. е, глава 28; епистолия яже к Домну. достойнии да не творят отречения]. отрицатися бо рече священнодействующим своим, церковным неугодно есть уставом, достойни убо суще служити, не подобает творити отречение. Аще ли же недостойни не отречения да исходят, но от указанных наших согрешений. Аще ли и отрещися кому епископства приключится, и вверенное ему стадо оставити; держатися службы к тому, несть убо праведно, неразумно бо и неискусно, трудное и не болезненое, отрицатися председания, учения глаголю людей, к лучшему преданию; и елико по силе возбранять, еже на горшее сих поношение. и елика же почесть приносят и похвалу, содержати и усвояти. небрежение и о множайшем еже о душах прилежание сотворшу.

Показуетжеся и от 16-го, правила, 1-го, 2-го собора излишно иже судящих. безумие еже мощи. яве яко архиереом епископства уво отрещися, священство же и еще паки содержати. Сие бо правило иже множае шестих месецех, от своея отшедшаго епископии, нужною некоторою виною, невозбраняема. Да аще убо иже меньше согрешивый, сице осужден бысть. како иже отнюд отрекийся епископства, иже отнюд попечения во всем житии пренебрег, не паче ли множайше томим будет, елико по того воли влеком, оставль вверяемое ему, от перваго Пастыря Христа, священное стадо. Сему же не точию яко не томиму, но паче яко чисто тому подаватися яже священства старейшинство, еже есть не по правилех и законех. Дионисия, 10-е правило. О сем же и десятое правило святаго Дионисия сказует. Аще бо во предстательство людьское призываемыя правило отлучатися повелевает, аще не повинуются. Кто убо от иже ум имущих без вины поставленных архиерей приим отречение, а не последнее елико убо силен будет сих мучить.

Инако же еже епископства имя вещи есть и действа явительно. Отрясый же волею действо отпаде, яве яко и звания, епископ же зватися не будет; како священства держатися может. како же иерарх назовется, еже не имый под собою, ниже убо начало будет священником, а ему же несть иераршества имена иного же паче подобает действа, иже бо имене не причастен паче вещи [не приятны именю ниже вещи, отречение да не будет приятно-на полях]. не приятно убо будет просте отречение, разве аще недостойная кто себе священству исповесть. Сему же указану бывшу, вкупе со отречением, и всякаго священническаго достоинства отрицаяйся отпадет. Епистолия 3-го, собора к сущим в Памфилии [зри о сем Евстафий, 10 книга севаста Арменопула 1. неделя 8].

Но и от иже к сущим в Памфилии послания, святаго и вселенскаго третьяго собора о некоем Евстафии, и показуется [зри о сем Евстафии 29. 1 недели и севаста Арменопула]. иже праве смотряющим. Отрицающихся церковь, обоего вкупе отпадати, и епископства и священства. к сему же еще, и еже весма отрицатися архиереом епископства не быти безгрешно. Сей бо Евстафий епископ сый Памфилийский, в напасти впад, и стужив сый от малодушия ино искуства, с написанием отречеся епископства; и ту убо он поставлен бысть. он же плачася, священному приступи собору; по сих не церковь вспять иский, неимущему ея, чесо притужая, имя же и почесть имети епископску прося. Они и слез и глубокую старость устыдевшеся Евстафиеву, и да и ему нечто прилучится от безмерныя печали, убоявшеся, имя епископово имети оправдаша, и почесть и приобщение. Яко же внутрь святаго жертвенника входящу причащатися, ниже убо священнодействовати ему, ниже хиротонию творити, аще не повелено ему будет от поместнаго епископа [Евстафий епископ Памфилийский отреклся епископства. того ради и священства обнажен бысть. от собора последиже раскаявся моляше со слезами точию имя и почесть епископску имети]. сия же не неправильне речена быша святыми. но строение сотворшим, и не обычное снизхождение. яко же епистолию опасне печатая, яве уведати имать. Подобно сему и инде глаголет [Потребник лист 728. Номоканон]. Вопрос. Аще подобает по вине извержену бывшу священнику, или волею священство оставльшу, зазревшу себе, предглаголати, благословен Бог наш. и иже ущедри ны. и Христос истинный Бог наш, или кадити кадильницею, или причаститися внутрь олтаря. Ответ. Никакоже. Ибо в простолюдин место учинен бысть.

Статия, 3. Аще кто от духовных правителей, по каковому либо случаю, от чад своих духовных, послет исправить кую либо духовную потребу; однажды и более, то таковый не имать власти и иметь себя обдержным правителем духовенства, до соборнаго избрания. По прав, 43-му, Карфагенскаго собора; по 39, святых апостол; и 49 главе, книги Симеона Фесалоникийскаго, разве смертнаго случая, по 90-му правилу книга Зонарь.

Пояснение. Несть се правильное строение; еже по нужди посылаему кому для исправления некиих треб духовных, привлачать на ся полную власть правителя духовнаго, дондеже аще не избран будет от общаго собора, или поне от своея си страны общества християнскаго, и по благословлению от общеизбраннаго тоя страны духовнаго правителя. Яко же к уподоблению мощно есть видети о послах, исправляющих дело посылающих их. Селивестр и Иулий, вместо себя послаша, Витона и Викентия [в предисловии книги Матфея Иеросалимскаго], на Карфагенский собор. Африканския епископы послаша вместо себя, тоя страны местоблюстителей, такожде и на шестый, и на пятошестый, и на седмый святый собор; вместо епископ и патриарх, приидоша презвитеры, диякони, и иноцы, и прочее. Подобно сему и инде глаголет [Потребник лист 724, Номоканон]. Священник позван быв на праздник от кого, и не имея подобнаго времене отъити и благословити. аще повелети старцу благословити, да благословит, или диакон, или чтец. Или и самех презвитерех, им же еще не дано есть вязати и решати. Таковии аще и зело добре суть, яко же верою, сице и житием. обаче пребывают под властию своего епископа, ниже дерзают на неповеленное, дондеже не сподобятся таковыя степени, о ней же рехом, яко же мощно есть видети от представленнаго зде на среду свидетельства, для надлежащаго к сему уподобления. Правило, 43 [собор Карфагенский, Кормчая лист 134 обор.] Кающимся, противу грехов епископ дает запрещение, презвитер же без воли его, ни нужди нашедше, не разрешит кающагося. Толкование. Иже от Бога приемше власть епископи вязати и разрешати противу числу грехов, и противу обращению от греха кающагося, запрещения повелевают, презвитер же без повеления епископа, ни умножити ни умалити запрещение не может, ни кающихся в заповеди сущих разрешит, ни Божественных Даров сподобит их, аще и отшел будет епископ. и паки [Кормчая лист 10 обор., прав 39 святых апостол]. Без воли епископа своего, презвитери, или диякони, да не сотворят ничтоже. тому бо суть поручени людие Господни. Толкование. Несть достойно презвитеру, или диякону без повеления епископа своего, ни людий связовати, еже есть отлучать, или умножити, или умалити епитимию, сиречь запрещение, или ино что таковое творити, аще не будет дано им от епископа о том писание, сиречь, приимати в покаяние, и вязати и разрешати, кроме того не могут ничтоже творити, яко епископу суть поручени Господни людие, и той хощет воздати слово о душах их. И инде [книга Симеона Фесаллоник. глава 49. зри и в Поребнике патриарха Иосифа лист 701 и 738]. Еже убо иереов действовати, сицевое по нужди бывает, и с повелением епископским, неприсутствующу ему, но священствующу. В случае еже смерти или ином каковом либо сему подобном, лепо есть исправити всякую духовную потребу, аще и несть избран, яко же выше рехом, посему свидетельству. Иерея аще человек умирая, позовет его исповедатися ему [Зонарь глава 90. аще близ есть смерти сущей отрицается иерей], а иерей не приидет, но речет, яко не имам повеления от архиерея приимати чада, не смею се творити; Аще умрет сей человек не исповеда вся; то грех той на иереи том. Понеже не внимают писания глаголюща, яко не отвратити приходящаго к тебе. но скорбиши его дух; безумный иерею, добре глаголеши, яко не имам повеления; но нужди ради притекающаго к тебе приими Бога ради; тем же да покается иерей той три лета, поклонов сто.

Статия, 4. Общеизбранный не имать власти избрать из чад своих духовных, в неподлежащую ему паству, идеже жив есть тоя страны избранный. Аще и по прозбе тоя страны общества християнскаго. По 35 правилу святых апостол, 22-му Антиохийскаго собора, и 2-му, 2-го вселенскаго собора, и по 1-му правилу, Потребник, Иосифа патриарха, и по 9-й главе, сост. д, прав, 16, первовтораго собора, иже в Матфеи.

Пояснение. Не точию из чад своих духовных, но и от иныя каковыя либо страны, аще и от тоя в ню же просят житилие, на определение в духовное правление, не имать власти сотворити се, сиречь, благословити, аще жив есть тоя страны общеизбранный, или по частному избранию жительствуяй, и не подлежащие по каковым либо видимым пороком законному отрешению от духовнаго правления, по сим свидетельствам. [Кормчая лист 9 обор. святых апостол, зри о сем же книга Матфея Иеросалим. состав х, глава 16 на 35 прав. святых апостол и книга 1 севаста Арменопула на 4, 13 и 22 Антиохийский собор. 2-е Сардикийскаго, и 16-е 1-го, и 12-е Сардикийскаго, Кормчая лист 67 обор. прав. 13 Антиохийскаго собора]. Правило, 35. Не поставляти от чюждаго предела, ни в пределе; аще же без воли того места епископа се сотворит; с поставленным от него и сам не поставлен. Толкование. Не подобает никому же от епископ вне своих предел приходящих поставляти кого, презвитера или диякона. аще же таковое что сотворит кто без воли страны тоя епископа, да извержется и сам, и поставленный от него. и инде [книга Матфея Иеросалим. состав д, глава 9 прав. 16 1-го и 2-го собора]. Таже и 6-е правило, 1-го и 2-го собора яве заповедает, не хиротонисати кого повелевая в церкви, ей же епископ аще жив есть, и не у своея совершенне отвержен бысть чести, аще и от некиих о гресе обвиновен бысть, и малодушествовав; негли, остави епископство, крамолы бо и смущения виновно се убо. подобает же церковным всяко любовное навистие на се отлагати, но правильне яже о нем истязовати, и аще по слову, рекше по правде оставления епископства бысть, или правильне за согрешения извержен бысть; абие иного в епископство поставляти. но аще кто во своей чести добре утвержен, не хощет своя пасти люди, но своего отступль стада множае шестих месец, во ином провождает месте, ни некоей нужди удержавающей, епископства и седалища праведне отъят будет.

Статия, 5. Аще кто и зело добр житием и верою, обаче менее четыредесяти лет, таковый в духовное дело избран да не будет, но по 729-му листу, обор., Потребника Иосифа патриарха, и по 46-му правилу книги Зонарь.

Пояснение. Многажды обретается, яко тридесяти лет подобает поставляти в презвитеры, обаче таковии презвитери не имеша области духовнаго правления, дондеже не достигнет в целомудренную старость, яко же и самое правило свидетельствует глаголя сице [Потребник лист 729, обор., Номоканон. духовник прежде 40 лет неприятен]. Вопрос. Колико лет должен есть имети дети, хотяй быти духовник. Ответ. И сие святии отцы уставиша, аще есть добродетельный, и тщательный в духовных чинех; должен быти повышше четыредесятих лет. А ниже сих лет, аще видиши коего духовника, не имей его духовника, ниже дерзай ему что исповедати, ибо диявол в нем ликует, и уязвляется на всяк день, и не познавает сокровищуя себе вечный огнь, аще и скопец есть, но сердцем на всяк день блудит. И инде [книга Зонарь глава 47. исповедь женская со опаством да бывает; книга Никона Черныя горы глаголет. Тактикон, глава 28. пятидесяти лет повелевает быти духовнику]. Женам повелевает исповедатися в паперте церковнем, отверсты двери имети внешния, соблазна ради заповедаем, совершенным мнихом и действующим яко не приимати жены к себе на исповедь. точию еже есть доспел в старости целомудренную благочестну, сий да наричется к таковым, да не помышлением соблажняется. ибо со женами диявол творит брань, мнихом честным.

Статия, 6. Духовным правителем не подобает явити грех исповедавшагося его духовнаго чада, по 120-му правилу, Потребник Иосифа патриарха, лист 694.

Пояснение. Понеже истинное покаяние есть еже вся тайне содеянная изрещи отцу духовному. тому же не подобает возъявити ничтоже от онаго исповедавшагося. Аще по покаянии обрящется достоин той, каковаго либо духовнаго действа отречению, или отлучению; вопрошен же быв, учинит запирательство о гресе ему исповеданному; таковый отречением или отлучением не осуждается; посему свидетельству [прав. 133 Кормчая лист 169 обор. Карфаг. собора]. Глаголя епископ, яко мне единому, причетник грех исповеда; аще же причетник запрется, не неверен есть. Толкование. Не подобает веровати аще возглаголет епископ на некоего причетника; яко он сице причетник, мне единому исповеда грех. того ради греха, хощу его, или из сана изврещи или общения отлучити. аще бо вопрошен быв причетник, его же рече епископ, исповеда ему грех запрется, глаголя, яко несмь исповедал, глаголя, таковаго греха, не подобает ему осудити его. ни того досаждает, яко той един епископ неверен есть. Ниже каковаго либо инаго греха отрешению или отлучению неподлежащаго. Посему правилу. 120 [Потребник лист 694. законник]. Духовный отец аще кому грех исповесть исповедавшагося, имать епитимию три лета, да есть празден, токмо да причащается в месяц единою, и да творит на всяк день поклонов, 100.

Гражданский закон глаголет, ископати язык сзади сицевому. Таже и о вышесказанном глаголет. Аще епископ, или иерей, исповесть грех на сына своего духовнаго, на исповеди от него слышанный, никакоже подобает верити сицевому свидетельству, по правилу 133-му, собора Карфагенскаго. Святейший патриарх Лука запрещение положи, на игумена обители Гиротрофия, сущаго архиерпископа Ираклийскаго, еже не литургисати; зане свидетельствова на духовное чадо свое.

Статия, 7. Иже до познания православныя веры, в церквах неверных приявших браковенчание, приходящих к православию, за неимением священных лиц поучати на чистое житие, падших же явным телесным грехом, таковых приимати в церковь на покаяние, с распустом их союзнаго сожития. По Барониеву летописцу, в лето Господне, 604, числа 2-го; о подтверждении еретических браков, сиречь, о священническом благословении. По тому же летописцу, в лето, 769-е, числу 1. И по большому Соборнику, листу 855-му, стиху 17-му.

Пояснение. Понеже таковыя браки в первеньствующей церкви, аще и были принимаемы, обаче не просто яко же мнят нецыи, но с довершением, сиречь, еже есть благословением. И таковое довершение, яко же и самое венчание, ни от кого же имать быти, разве епископа, или презвитера, яко же мощно о сем видети, в 8-й статье, и от представленнаго зде свидетельства [летописец Барон. в лето Господне 604, часть 2]. Егда папу Григорию нецыи епископи поношаху, или паче, вины и учения от него вопрошаху. чесо ради противу правил святых отец, Августину английскому епископу, во Англии попусти в 3-м, и 4-м колене супружество восприятное подтверждати, а не терзати его; и он им отписа; яко сие новым токмо християном попустися, разве нравов поганских неудобь искореняемых. А како и от кого бысть сие подтверждение; мощно есть видети от сего свидетельства [в лето Господне 764 числа 1]. А епископи и иереи и диякони, их же посвятил ложный папа, новым папиным благословением; а не посвящением подтверждены. От сего ясно видно, что вышепомянутое браком подтверждение, ничто иное есть, но разве церковное благословение. понеже бо аще и несть тамо речено, яко благословением подтверждати, зде же благословение приложи. Аще ли возмнится нецыим, яко оное благословение было, не поганским браком, в силу их довершения, но кровосмесным, в силу их приятия. То да уведят таковии, по показанным в 8-й статии свидетельствам, не точию брак, но и самое обручение, без молитв и благословения церковнаго совершити не может. Како же сий совершен быти может, не имущь ни молитвы ни благословения; откуду возъимеет божественную и человеческую правины, понеже яко же та, сице и она, должны быти не по нраву языков, но по уставу церкви православныя. Сего ради и сицевыя браки, аще и возъимеет подобенство с браком церкви православныя, обаче единою токмо правиною, а потому и без подтверждения благословением совершены быти не могут. В силу же сего протверждения, нечто есть изглаголано сице.

Что же ино есть утверждение, разве освящения ради совершение, и еже во благом твердость и непревращение [Соборник большой слово Григория Богослова на святую 50-цу, в толковании на стих 17 лист 855 обор.] Мы же неимущии никоея от вышепомянутыя степени священства; то и подтвердить сицевыя браки не можем. Того ради при обращении в веру, имущих оныя браки, аще и не расторгаем; обаче не брачному, но целомудренному житию всячески поучаем. Не сохранившим же сицеваго обещания, и обличившимся же пред всею церковию, не к тому паки купно жительствовати; но разлучитися между собою подобает [по 23-му правилу Никифора патриарха, иже в Кормчей глава 58, лист 598; и по книге Матфея Иеросалимскаго, состав ω, глава, 36].

Статия, 8. Християн принявших венчание в церквах неверных, или инако каково либо спрягшихся, не подобает приимати в церковь на покаяние, без расторжения беззаконнаго их сожития, по правилом безсвященнословных браков и явленных блудников.

Пояснение. Понеже брак есть мужеви и жене, сочетание и сбытие во всей во всей жизни, божественныя же и человеческия правды общение. Или; Брак есть, мужа и жены совокупление и снаследие во всей жизни [книга Матфея Иеросалим. состав г, глава 2, законы], божественныя же и человеческия правины приобщение; либо благословением, либо венчанием, либо с записанием, и яже чрез сия бываемыя, яко не бывша вменяем. И паки, по иному [севаст Арменопул книга определ. брака]. Брак есть мужа и жены совокупление, и сжребие всея жизни божественнаго и человеческаго праведнаго общения. Аще же, благословением, аще же венчанием, или словом; паче же сих бывающа, яко небывшая вменяем.

Блуд же не брак есть, ни браку начало; но грех и преступление закона Божия [Кормчая 234 от толкован. на 26 правило Василия Великаго]. Сего ради и святый Златоуст глаголет [Маргарит лист 587 обор.]. Не можеши ли быти девьственник, брачися с целомудрием; точию в церкви, точию на ризе, точию пред царицею. В силу сего, и инии мнози святии реша [лист 335, 336, и 523 обор.], яко же в Кормчей, севаст Константин Арменопул, Матфей Иеросалимский, Симеон Фесалонитский, и прочии святии [книга 5 и 6. состав г, глава 8. 10. 5. V[?] глава 282].

Посему вси иже не сице спрягшиися не прияти, аще не расторгнут своего беззаконнаго сожития, [Кормчая лист 25 обор. и 28 обор. и 238. Потребник Иосифа патр. лист 703] По 4-му, и 5-му правилу святаго апостола Павла, по 13-му святых апостол Петра и Павла, по 39-му Василия Великаго, и по 176-му правилу Законника. Ниже приносы их по ω-му составу, 33-й главы книги Матфея Иеросалимскаго. И по 6-й книге вопросу 5-му севаста Арменопула, сице глаголющу. Вопрос; Аще имать человек неблагословену жену в витальнице его; аще подобает приимати просфиру его. Ответ. От дому его не подобает приимати, ниже просфиру, ниже воск, ниже елей, ниже кадило. Подобно сему и вопр. 10-м книги его.

Статия, 9. Християне спрягшиися каковым либо образом с неверными; и аще неверная часть познает путь истинный, не подобает прияти оное лице ко крещению, аще не отторгнется союзнаго их сожития.

Пояснение. Аще неверная часть и по неведению сотвори сие сопряжение, обаче по речению Господню не подобает сподобляти никого же святаго крещения, разве некоего нужнаго случая, дондеже не научен будет добре, вере истинне; и не возвестится все подобающее новоприходящему. И того ради в силу реченнаго свидетельства и предлагается [Апостол толковый лист 682 обор. глава 2]. Некоим убо мнится, да вси без возбранения приходят в крещение, аще бы и житие их зло скверно и лукаво явственне было, и пременитися от злаго на лучшее не хотели; и аще бы в том скверном житии быти хотяще, явственне сие известили, яко же уподобление исповем. Егда убо кто блудницы придержится. глаголет, яко не подобает сию прежде оставити, посем ко крещению приити. но хощут да со оною пребывающи, и исповедающи яко с нею пребывати имать, в крещение прият был, без удержания и наказания, толико да будет удом Христовым. Аще бы и удом блудницы утвердися быти, и остати хотел, последи же о нравах и делах благих да будет наказан. О како си зло есть, прежде крестити, последи же о изменении в лучшия нравы наказывати. мняще си быти вещь развращенну, прежде наказывати жительству християнскому, последи же крестити. но непщуют яко прежде достоит крестити, последи же наказывати жительства и нравов; и аще стрещи и исполнити восхощут, тогда полезно сотворят, и прочее чти тамо.

В подобенство сему мощно есть представити святым Златоустом реченное, о месте идеже блудница предстоит. Како место то, наричет вертеп разбойником. аще той рече и не о чювственной блуднице, но о жидовстей церкви; обаче и зде сему глаголу лепо быти есть, и преискренно. Ниже верное лице с сим сопряженное на покаяние приемлется. дондеже не расторгнется от беззаконнаго своего сожития, по 12-й главе, г-го состава, иже в Матфеи, 39-му правилу Вас. Великаго, и по 52-му правилу Законника [Потребник, лист 685].

Статия, 10. Не подобает мнихом обоего рода, приимати детища от крещения, по 85-му правилу Законника, Потребник Иосифа патр., на 689-м листу обор., и 6-й книге севаста Арменопула, вопрос 6.

Пояснение. Понеже конечне отрекостеся мира, того ради и отречено есть, по сим свидетельствам [Потребник лист 689 обор.]. Калугер сый презвитер, не венчает женитву, неключимо бо есть; ниже приимец бывает детищу, сиречь, да то приимет от крещения. И инде [севаст Арменопул книга 6, вопрос 6. книга 1 сеч. 4-е недели 2-й толк. на 22 седьмаго]. Вопрос. Естьли достойно приимати мниху детищи от крещения, и прочее. Ответ. Чрез правило суть и возбраняются.