Соборное завещание в Москве, в 7370-е [1862] лето бывшее.

Господи Исусе Христе Сыне Божий помилуй нас, аминь.

Сего текущаго 7370 лета, июня, 4 дня. стекшееся братство древлегрекороссийскаго исповедания кафоликов на поновление винницы, благоволением триипостаснаго Божества, Святыя и Живоначальныя Троицы, Отца и Сына и Святаго Духа, не новое что введше, но древнее содержание кафолическия веры подтвердихом.

1-е; Стражем и блюстителем Христова винограда, весьма быть обозрительным трезвым и бодрым [Альфа и Омега больш. глава 46]. Яко же глаголет Господь пророку Иезекиилю [Иезекииль глава 34]. Сыне человечь, стража тя сим поставих дому Израилеву; и услышишь слово от уст Моих, и проповеси им от Мене. Егда реку грешнику; грешниче смертию умреши, и не будеши глаголати грешнику, яко снабдетися; кровь его, от рук твоих взыщу [Иеремия гл. 23]. Горе пастырем, иже расточают и растерзают стада паствы Моея.

Изнемогающаго не подъясте, больнаго не уврачевасте, и погибшаго не поискасте, и властию не наказасте я и наруганием. Василий Великий в предисловии Постничества [лист 7]. Внимай яже от богодухновеннаго писания указание; о иже всяко преступление заповеди Божия, зельне и страшне от мстившаго. Тем же аще и множайшая исправитися мнит, или мало негде и единоя, яковы заповеди нерадит, или согрешившему без разньства умолчит; а не ревность по суду Божию покажет; о сем едином муку приимет. Аще и от невежества постраждет что, ниже тако без мучения убежит. [ниже];

Аще жало смертное грех есть [глава 52]; не сей и он, но всякий грех. не милосерд есть умалчивая а не обличая, яко иже яд оставляяй, уяденный от ядовитаго беса, а не изимаяй; и любовь разоряет той.

Иоанна списателя Лествицы [слово 30, лист 274]. Аще приял еси очи, прозирати волны; сущим в корабли предглаголи; аще ли ни; ты истоплению виновен еси; яко паче всех вверен быв безпечальне окормлению. словесы усвояй яко же во инех, и истребити, есть стыдения всегда. о печали недугующаго на время, яко да не долго болит. или умрет от молчания проклятаго. И услышим Павла великаго, к Тимофею пишуща. Настой тем рече, благовремене. Благовременне убо мня; егда обличаемии сладце приемлют обличение. безвременне же, егда о сем хапаются. Избави иже от Бога избавленныи, и спаси спасенныи; ведомая на смерть искупуя убиваемыя от бесов не пощади. Зри да некако еже паче потребы твоея, твое в твоих смирение углие огненное на главу чадом твоим соберет. Во всех ти терпеливо потреба быти [Лествица, лист 287, обор.], разве глаголемых преслушания. Лучьше отгнати от обители, нежели оставити свою волю послушники творити. отгнавыи множицею отгнаннаго смиреннейша содела, и свою прочее отсецати волю. А еже мнетися человеколюбие и схождение таковым подаяти, во время исхода; окаянне того кляти сотвориша; прельстив паче, а не пользовав их. Златоустаго [на Деяния нравоучение 8]. Начальника ничим начальствуемых пользующаго, ничтоже окаяннейши есть. Проклят всяк творяй дело Господне с небрежением [Альфа и Омега лист 352, обор.]. и проклят возбраняяй мечю своему от крове. В толковании сице обретох на сей стих [Златоуст. от кн. 4. или 5. глава 48]. Оружие или мечь слово Божие, им же греси потребляются. сего ради старейшим иереом, достоит словом Божиим грехи искореневати и потребляти. Велия бо тщета и погибель в пренебрежении. Подобает иереом сильным быти, яко Самсону; и к сопротивлению врагов невидимых велиим, яко Самуилу, или Саулу, к ношению тяжестей церковных. Скорым и тщаливым, яко Израилю. Красным и целомудренным, яко Иосифу. Кротким и смиренным, яко Давыду, ко претерпению уничижений. И да сияет светлостию всем на себе зрящим. И да будет соль не смердящая, но приятная, и пользующая всех благими нравы, и богоугодным житием, и наставлением и наказанием. Да не хулится, но да прославляется истинная вера. Святый Калист. Яко же во пловцех; егда убо корабленник согрешит, малу наносит плавающим пагубу. егда же сам кормчий; всему сотворит кораблю погибель. Номоканон, правило 159. Должен есть священник. в неделю и праздники слово Божие проповедати; о вере и о житии учити, по правилу 58-му, святых апостол; и 19-му, шестаго вселенскаго собора. не точию бо молитися должни, но и слово Божие послушати. Глаголет убо в притчах, уклонивый ухо свое непослушати закона, сей молитву свою омерзил есть. Аще же иерей не проповедает слово Божие, и люди о вере и о житии, еже о Бозе не учит; да извержется по 58-му правилу святых апостол. Златоустаго [Иоанна, нравоучение 86]. Священник аще житие свое устроит добре. о врученных же не со опасением попечется; с лукавыми в геену отходит. и множицею от своих не предан, от чад духовных погибнет.

2. О пастырех нерадящих и законно не окормляющих овец Христова стада, и подозрительное житие имущих, и людем по своим похотям ходящих, и сих учению следующих, общая есть погибель, в надежде спасения их; таковых достоит от наследства обнажати, да не сих заразою все стадо овец растлится, по нижеследующему предлогу. Святый Афанасий Александрийский [Никон Черныя горы. слово 7 лист 48]. Шествующии непрелестный живоносный путь. око убо да извержем нечувственное, но умное; сиречь аще епископ, или презвитер, сущии очи церковныя, неподобне живут, и соблазняют люди, подобает изврещи их. уние есть им без них собиратися в храм молитвенный; нежели с ними воврещися, яко же со Анною и Каияфою в геену огненную. Подобне и рука, еже есть диякон, аще недостойно что творит; да отлучится от жертвенника. Нога же есть слуга, аще зле течет во лжу, к приятию имений по Гиезие, подобает и сего от служения чужда творити, яко люта и несмысленна человека, да церковь собираема, без соблазна хранится. Святаго Макария [лист 6, обор.] Слепый слепаго водит, оба в яму впадут. Глаголет Бог пророком Иезекиилем. Яко аще мечю приходящу, не потрубит людем, ниже знамение даст стражник; и пришедшу мечу повредит. душа та убо за беззакония своя ята бысть; крови же ея из руки стражника взыщу. Видиши ли возлюбленне отвещание Божие. яко в таковых вещех друг друга не измет, но паче сугубо согрешение наставляющаго. душа бо рече за беззаконие свое ята бысть, душу же ея из руки стражника изыщу. сиречь, душа убо по делом своим приимет; не оправдитжеся сего ради, но предана будет врагом своим; а о погибели ея, наставляяй осуждение приимет. Страж убо глаголется, на стражи стояй, некими же вылгарь именуется, еже приемлется в чин наставника, рекше настоящаго. Святаго Иоанна Златоустаго [Альфа и Омега в предис. лист 1 обор.]. Блажен град, от благочестивых царей царствуемый, и монастырь от воздержных и искусных строимый; и корабль от искусных управляемый. Горе же граду от нечестивых царей царствуему. и монастырю от сластолюбивых и тщеславных строиму, и кораблю от неискусных управляему. Град убо и страны пленени будут, а монастырь запустеет, а корабль разбиется. Горе всем иже о заповедех Господнех нерадящим, и о своем спасении небрегущим. Писано бо есть; проклят всяк творяй дело Господне с небрежением, о таковых речено бысть, лучьше бы им не родитися. Апостол [Апостол толковый зач. 297 лист 938 обор.]. Будет бо время, егда здраваго учения не послушают, но по своим похотем изберут себе учителей. Златоуст; Явственне рече изберут; сим неискусное и постыдное учителей назнамена множество. си же, от учеников к чину учителей взыдут. Апостол. Чешеми слухом. Златоуст. Сласти ради глаголюще, и слух увеселяюще. Хранящии бо священныя каноны [Кормчая предисл. Лист 25 обор.], Владыки и Бога помощи сподобляются. сия же преступающии, в конечное осуждение себе влагают. Божественным канонем несохраняемым, различна преступления бывают, от того же Божий гнев, на нас сходит, и многия казни, и последний суд. Поставленныи убо на строительство слову [Никон Черныя горы, слово 2 лист 14 обор. и 16], и небрегий; яко убийца судится, яко же есть писано. [ниже] Яко внегда совершатися грехом нашим, не хотяще отступити от злых наших деяний, зле учащих нас паче, паче воли Божии, и прилепитися воли Божии, добре нас от божественных писаний учащи; тогда и Бог отступает от нас совершенне, и дух к прелести приходит, к зле нас учащих; да прелесть яко от Бога приемши, отслани будем в глубину погибели. Святаго Макария. Не токмо же се, но и вся писания, и божественныя заповеди Господния, по волях наших плотьских растлеваем. и ови убо прельщаеми, ови же самопроизвольным хотением, и к любосластней части душевней устремишася, вся размешаем. Внегда глаголати и нам к простейшим послушником нашим, ищущим вины о гресех, яко аз ответую Богови о согрешении, о нем же ти повелеваю; ты же неповинен еси; таже простым и безсловесным паки всем послушником глаголющим, яко неповинен есмь за се; повелевай ми убо понесет осуждение. И ина подобная сим накриво сказуемо, по всякому человеческому житию; не от божественных писаний, но от сердца нашего, еже есть тщетно, и исполняется о сем божественное слово; аще слепый слепаго водит, оба в яму впадут. От Постных Василия Великаго [лист 6 обор.] И инде паки о том глаголет. яко не пользова ответ первозданнаго Адама, во еже рещи Адаму к Богу; яко жена, юже ми дал, та ми рече; Ни паки Евве, во еже рещи Богу, яко змий прельстил мя есть. Ниже слуги мучащия святыя, имут кий либо ответ пред Богом рещи, яко раби бехом, и повеленная нам творихом, и несмы повинны. Пилат игемон и руце умы пред людьми, оправдав себя; но понеже послуша беззаконно; не неповинен бысть согрешению. И тии убо беззаконнии июдеи, сице глаголаху предателю Июде; мы неповинни есмы, ты узриши. Сии вси, и инии множайшии, в ветсем и новем завете безсловесно и беззаконно послушаша послушание; и ничто же яко же рехом пользовашася, но кождо о гресе и беззаконии своем истязан будет. Сего убо безсловеснаго послушания, и служения прелесть, яве показуя Господь глаголя. Яко невозможно есть еже не прийти соблазном. горе же человеку, от него же соблазн приходит. Да никто же просто приемлет, еже в божественных писаниих положенное послушание и в ужасное падение падется. Не повелеваем во имя послушания, к нашей погибели приимати, но яко же отцы наши вселенстии учители, яко врачеве хитростнии повелевают. Первое настоящаго сказуют, каков должен есть быти; и какова повеления. По том же послушания положиша предел. Кроме сего воображения настоящаго образа, и повеления [и послушания], по сказанию Афанасия Великаго [Леств. слово 4 лист 46 обор.]; Всяк приемши дар разсуждения, мучен будет аще последует пастырю неискусну, и ложну славу яко истинну имущу; Яко же сей рече [Никон Черныя горы слово 7]. Аще неподобне живут и соблазняют люди; подобает изврещи их. уние есть им, без них собиратися в храм молитвенный, нежели с ними воврещися, яко же со Анною и Каияфою в геену огненную. и сие равно завеща, от священных и до слуги церковныя: да церковь собираема, без соблазна хранится. В сходство сего и в Златотоусте [Златоуст. 6 недели поста]. Вопрос. Добро ли грехи своя исповедати отцу духовному. Ответ. Добро и полезно есть, но не без искуса сущим. Аще убо будет поп груб, и невежа, или горд, или запойчив, или гневлив, или мздоимец, или завидлив, или клеветник, или сварлив; к таковому не достоит каятися. и исповедати грехов. таков учитель преобидлива, и нерадива и ленива, и ослаблена тя сотворит. аще же обрящеши мужа духовна, разумна и кротка, и тиха; то без срама и без сомнения исповеждься ему; таковый бо отец наставит тя на истинну. верен бо Бог, оставляти грехи по закону живущим. Иконостроителям [Стоглав. О живописцах, и о чести икон] и позлащающим оныя, находящихся в подозрительном житии, и пороках в пьянстве и нечистоте, и во всяком безчинстве; таковыя [по Стоглаву] в запрещение полагати. и от дела иконнаго отнюд отлучати. Сему подобно в древлеписменной Кормчей, в главе, 127. из выписки Феодосия Пустынника, священнику иконописцу [Матф. зач. 75. к евреом 335. Ефрем слово 83]. Будет им случится впасти в явленныя скверны; обои неприятны. В заключение сего всего, все овцы стада Христове. должны быть послушны церкви и настоятелям без прекословия, по закону Божию; окормляющим людей Божиих; по писанному апостолом Павлом; Повинуйтеся наставником вашим и покаряйтеся им; тии бо бдят о душах ваших. Иже повинуется старейшине, сей ангелы подражает. сопротивляяйжеся, сей диявола вселяет в себе [по Ефрему]. Лице земно кланяемся, Е. Н. Н. Я., и прочии. июня. 12. дня.